2 Kings 20

Mien Bible (Thai Script) © Thailand Bible Society, 2007

← Chapter 19 Jump to: Chapter 21 →

1ต๋อย วั้ว เต๋ย เฒี่ยง โห่ เฮเซคียา ปุ๊ด แป่ง โค้ว, ค้า เต๋ย ไต่ หมี่ อ๊ะ. อาม้อด เญย ตอน, วั้ว เต้า โต่ว หว่า เมี่ยน, อิสะยา, มี่ง หมั่ง นิ่น แอ๋ง ก๊อง บั๋ว นิ่น, “ เฒี้ยว ฮนั้ง น้าย ก๊อง, ‘เม่ย อ๋อย หฒุ หลิ่ว เล์ย หญู่งๆ ซูง เหว่ย หฒุ เม่ย ฒู้ง อ๋อย หฒุ ไต่. เม่ย ไม้ ไฮ่ หลง.’”

2เฮเซคียา ฯฒฯ ฮวิน เฮมียน มี่ง หฌ่ง วั้ว ปูง เต๋า เก๋า ก๊อง บั๋ว เฒี้ยว,

3“โอ เฒี้ยว อ่า, โท้ เม่ย จั๋ง เจี๊ยน เยีย เยียม เม่ย เญย หฑะเฮมียน เหฒียบ ฒัวะ เญย กัน หลง เม่ย หย่า หฒิว เม่ย หมั่ง เยีย โหฒว ตุ๊ หลง.” เฮเซคียา ฯฒฯ เญี้ยม ตุ๊ เฮญี้ยว มุน ไห่.

4อิสะยา ไม้ แก้ง ตุ๊ ธ้วด ฮู่ง ติ่น บุด๋ง วั้ว คัง ทีง วั้ว หฒั่น, เฒี้ยว ก๊อง บั๋ว นิ่น,

5“อ๋อย หฒุ หฑวน มี่ง บั๋ว เยีย เญย แปะ ฝีง เญย เปย๊ย เฒ้ย, เฮเซคียา, ‘ เฒี้ยว, เม่ย เญย อง-ถาย, ดาวิด, เญย ทิน-ฮู่ง, ฮนั้ง น้าย นอ ก๊อง, “เยีย ไฮ์ เม่ย เต๋า เก๋า เญย หว่า หย่า ปวัด เม่ย เญย ววม-เหมว่ย. เยีย อ๋อย หฒ่อ หลง เม่ย. แอ๋ง เจี๋ย มี่ง เถา ตะฟาม ฮนอย เม่ย ตุ๊ มี่ง เปียะ หฒั่ง เฒี้ยว เญย เปย๊า.

6เยีย แอ๋ง อ๋อย จา ปุน เม่ย เฒี่ยง เหฒียบ ฮม์ หฮญัง หย่า อ๋อย เหฌียว น้าย นอม ฒี่ง เล่ย ดุ๊ด อัดซีเลีย ฮู่ง เญย ปั์ว-เดี๊ย. เหว่ย เยีย เญย โปว, ดาวิด, เยีย อ๋อย เปว น้าย นอม ฒี่ง.”’”

7อิสะยา ก๊อง, “เฒาะ เต๋ย ง่ง หญอ เปี๊ยว ต้าย.” เมี่ยน ฯฒฯ เฒาะ ต้าย อ๊บ เฮเซคียา เญย เฒว่ย. นิ่น ฯฒฯ หลง หมี่ อ๊ะ.

8เฮเซคียา หน่าย อิสะยา, “ม่าย หาย หญู่ง จั๋ง-โห่ ปุน ธีง เฒี้ยว อ๋อย หฒ่อ เยีย หลง, เถา ตะฟาม ฮนอย เยีย ตุ๊ มี่ง หฒั่ง เฒี้ยว เญย เปย๊า?”

9อิสะยา เตา, “น้าย เซ เฒี้ยว อ๋อย ปุน เม่ย เญย จั๋ง-โห่ เหว่ย ปุน ธีง เฒี้ยว อ๋อย เอย เจี๊ยน นิ่น แล์ง เญย หว่า โหฒว. เม่ย อ๋อย ต้ง ลิ่น มี่ง วั้ว ด่าง เหฒียบ หว่วน เทย ไฟ อ๋อย ต้ง ลิ่น หฑวน ฆะฮ้า ฆาง เหฒียบ หว่วน เทย?”

10เฮเซคียา เตา, “ต้ง ลิ่น มี่ง วั้ว ด่าง เหฒียบ หว่วน เซ เก้า เห่. เยีย เก้า อ๋อย ต้ง ลิ่น หฑวน ฆะฮ้า เหฒียบ หว่วน.”

11โต่ว หว่า เมี่ยน, อิสะยา, ฯฒฯ โท้ เฒี้ยว. เฒี้ยว ฯฒฯ ปุน ต้ง ลิ่น เยียม อาหัด เญย เทย ถุย หฑวน นิ่น เจี๋ย ด่าง เญย เหฒียบ หว่วน เทย.

12ต๋อย วั้ว เต๋ย เฒี่ยง โห่, บาลาดัน เญย ตอน, บาบีโลน กั๊วะ เญย ฮู่ง, เมโลดักบาลาดัน, ไฮ์ ก๊อง เฮเซคียา ปุ๊ด แป่ง ฯฒฯ ฝูง เฝียน เหธา ฒี่ง เหญ่ย มี่ง ปุน นิ่น.

13เฮเซคียา ฒิบ น้าย เต๋ย โต่ว เฝียน เมี่ยน หย่า ปุน นิ่น บัว หมั่ง นิ่น เซียว จ๋าย เญย กะน้าย เญย ต๋อง เหยียด ฒู้ง กะน้าย. เซ ปุน นิ่น บัว หมั่ง เจียม, ญ่าน, หลาบ หลิ่ว, จ๋าย ไห่ เญย โย่ว เหธา นิ่น เบ๊าะ จ๋า เญย หวัวะ กิ่น, ต้ง นิ่น ม่าย เญย หญู่งๆ จ๋าย เญย กะน้าย. เยียม นิ่น เญย ฮู่ง ติ่น เหธา เฒี่ยง นอม กั๊วะ เญย กะน้าย. ไม้ ม่าย เหยียด หญู่ง เฮเซคียา ไม้ ปุน นิ่น บัว ปวัด.

14โต่ว หว่า เมี่ยน, อิสะยา, หน่าย ก๋า, “น้าย เต๋ย เมี่ยน ก๊อง หาย หญู่ง? เยียม หาย ต้าย?” เฮเซคียา เตา, “นิ่น บัว เยียม โก เญย เต่ย-ปูง ต้าย, เซ เยียม บาบีโลน ต้าย.”

15อิสะยา หน่าย, “เยียม เม่ย เญย ฮู่ง ติ่น นิ่น บัว ตุ๊ ปวัด หาย หญู่ง?” เฮเซคียา ก๊อง, “เยียม เยีย เญย ฮู่ง ติ่น นิ่น บัว ตุ๊ ปวัด หญู่งๆ. เยีย จ๋าย เญย กะน้าย ไม้ ม่าย เหยียด หญู่ง เยีย ไม้ ปุน นิ่น บัว หมั่ง.”

16อิสะยา ก๊อง บั๋ว เฮเซคียา, “หมวัง เฒี้ยว เญย หว่า ม่าะ!

17‘ฮนอย-เหญียะ ฒู้ง อ๋อย เถา. เยียม เม่ย เญย ฮู่ง ติ่น เญย เหยียด ฒู้ง กะน้าย เหธา เม่ย เญย อง-ถาย เซียว เถา อี้ จ๋า ฮนอย เญย กะน้าย, อ๋อย หฒุ ธ้าง มี่ง เถา บาบีโลน. เหยียด หญู่ง หย่า ไม้ เลี่ยว.’ น้าย เซ เฒี้ยว ก๊อง เญย หว่า.

18‘ม่าย เต๋ย เยียม เม่ย กั้น เญย ฑย้าม-เฟย ธ้วด เญย ตอน-เจว๊ย ฟุน-ฟะ ฒู้ง อ๋อย หฒุ กว๊าด มี่ง เยียม บาบีโลน เญย ฮู่ง ติ่น เป๋น หฒุ อิม โต๊ เญย เมี่ยน.’”

19เฮเซคียา เตา อิสะยา, “เม่ย โต่ว ต้าย น้าย โจ๋ว เฒี้ยว เญย หว่า เซ หลง เญย.” นิ่น ฮนั้ง น้าย นอ ก๊อง เหว่ย หฒุ นิ่น เยียม เฮญี้ยว ฮนั้ม, “ตะฟ่าน เยีย เญย เสย เฒ้ย ถาย-แป้ง เญย, ไม้ ม่าย สี่ ไม้ เฒ์ย?”

20เฮเซคียา กุ๊น เญย เฒี่ยง โห่ โหฒว ลิ์ว เหฒ่ง เหฌี่ย เญย สี่, เหธา นิ่น เญย ชะ โหฒว เญย เหยียด ฒู้ง, เหธา นิ่น เว้ด ววม-ต้ม, เว้ด ววม-เจ๊า กัน เดา-เดี๊ย มี่ง ปู๋ง ววม เปียะ ฒี่ง กะญั์ว น้าย เต๋ย เหยียด ฒู้ง สี่, เฟี้ย เจี๊ยน ยูดา ฮู่ง เญย ฮู่ง โต้ว ตาน.

21เฮเซคียา เกวย เสย หมี่ อ๊ะ, นิ่น เญย ตอน, มะนัดเส, หฑิบ เจี๊ยน นิ่น โหฒว ฮู่ง.

← Chapter 19 Jump to: Chapter 21 →