2 Kings 23

Mien Bible (Thai Script) © Thailand Bible Society, 2007

← Chapter 22 Jump to: Chapter 24 →

1ฮู่ง เตี๋ย ฯฒฯ เห่ว ยูดา เหธา เยลูซาเลม เญย หฒวัง เมี่ยน โก๋ ต้าย ฒุ้น.

2นิ่น เหธา ยูดา เญย หฒวัง เมี่ยน, เยลูซาเลม เญย แปะ ฝีง, เหธา ไซ เมี่ยน เหธา โต่ว หว่า เมี่ยน, เหยียด ฒู้ง แปะ ฝีง โฮลๆ ไฝๆ ฯฒฯ มี่ง เถา หฒั่ง เฒี้ยว เญย เปย๊า. นิ่น ฯฒฯ โตะ เยียม หฒั่ง เฒี้ยว เญย เปย๊า เฒาะ ธ้วด ต้าย เญย แล์ง แหง่ง หว่า โซว ปุน หฒวัง เมี่ยน หมวัง.

3ฮู่ง เตี๋ย โซ้ว เจี๊ยน เดี้ยว กะเฮลน, เยียม เฒี้ยว เญย หฑะเฮมียน เหลียบ แหง่ง หว่า ก๊อง นิ่น อ๋อย หล่ง เหฑ่ง เฮญี้ยว, หล่ง เหฑ่ง หฒะเอ๋ย กัน เฒี้ยว, หย่า เอย เจี๊ยน นิ่น หัด เญย หว่า เหธา นิ่น เญย หลี่ง เหธา เล์ย-หลัด. นิ่น ฯฒฯ แล์ง เอย เจี๊ยน น้าย หฌุ่น โซว เฟี้ย เญย แหง่ง หว่า. หฒวัง แปะ ฝีง หย่า แล์ง เอย เจี๊ยน น้าย เต๋ย แหง่ง หว่า โหฒว.

4ฮู่ง เตี๋ย พ้าย ฮินคียา ต้ม ไซ เมี่ยน เหธา ปอง-ปั์ว เญย ไซ เมี่ยน เหธา ฒั้ว หฒั่ง เฒี้ยว เญย เปย๊า เญย เมี่ยน เฒาะ เยียม หฒั่ง เฒี้ยว เญย เปย๊า หล่ง ป๋าย บาอัน เฒี่ยน เหธา อาเซลา เฒี่ยน เญ์ย เหธา เยียม ลู่ง หฒั่ง เญย หญู่งๆ เญย เหยียด ฒู้ง กะน้าย, เปี้ยน ธ้วด ต้าย. นิ่น เยียม เยลูซาเลม ฒี่ง กะเหญี่ย, ขิดโลน ฮ์อง กะเฮลน, ปั๊ว เหฑ่ง แอ๋ง ต้อ ซ้าย มี่ง เถา เบดเอน กวั่ง.

5โยสิยา ฮู่ง เฒาะ กวั่ง ยูดา เญย ฮู่ง เหลียบ ต้าย หฒั่ง เหญี่ย เญย เฒี่ยน วั้ว เต๋ย ไซ เมี่ยน, เซ เยียม ยูดา เญย มู้ง เหธา เยลูซาเลม ฮวีง หฑวน เยียม ฮลัง หฒั่ง เฒี่ยน เญย ต๋อง ปั๊ว ฮูง ปุน บาอัน เฒี่ยน เหธา บะฮนอย เหธา หฮลา เหธา เหฮลย เหธา ลู่ง หฒั่ง เญย หญู่งๆ กะน้าย.

6นิ่น หย่า เฒาะ ฆอย เยียม หฒั่ง เฒี้ยว เญย เปย๊า วั้ว นอม อาเซลา เฒี่ยน เญ์ย เญย ฝัง, ต้อ ธ้วด เยลูซาเลม ฒี่ง มี่ง เถา ขิดโลน ฮ์อง, เยียม วั้ว ปั๊ว. นิ่น เบ๊าะ หม่วน เป๋น ซ้าย แอ๋ง ฮ์า เหฌี่ย โพว-ทง เมี่ยน เญย โฒ้ว.

7นิ่น แอ๋ง แธะ เยียม หฒั่ง เฒี้ยว เญย เปย๊า เหว่ย หฒั่ง เฒี่ยน หม่าย ป๊วน-ซิน เญย มจั่ง ตอน เยียม เญย ต๋อง, เซ ต้ง มเซียะ ตอน ดั๊ด เดีย ฒอง อาเซลา เฒี่ยน เญ์ย วั้ว นอม ต๋อง.

8โยสิยา ต้อ เยียม ยูดา เญย นอมๆ มู้ง เญย ไซ เมี่ยน ต้าย เถา เยลูซาเลม หย่า โหฒว ปุน เยียม เกบา เถา เบเอเชบา, เยียม ฮลัง หฒั่ง เฒี่ยน เญย นอมๆ ต๋อง, เซ วั้ว เต๋ย ไซ เมี่ยน ปั๊ว ฮูง เญย ต๋อง, ม่าย หวุย. นิ่น หย่า แธะ หว่าย ฒี่ง กะเฮลน หฒั่ง เฒี่ยน เญย ต๋อง, เซ เยียม ฒี่ง เฒี้ยว, โยซูวา, เญย แก้ง ด่าง, เปียะ ฒี่ง แก้ง เญย หฒาย แหมง.

9ไม้ กุ๊น เยียม ฮลัง หฒั่ง เฒี่ยน เญย ต๋อง ต้าย วั้ว เต๋ย ไซ เมี่ยน ไม้ ตุ๊ เยียม เยลูซาเลม, เฒี้ยว เญย เหฒี่ย-ต้อง ฟู-สู, นิ่น บัว ตุ๊ เยียม นิ่น บัว ไซ เมี่ยน ต่อย บุด๋ง จวั่ง หญั่น ไม้ อัน ปี๊ง เญย ฌั้ว.

10นิ่น โหฒว ปุน โทเฟ้ด ม่าย หวุย, เซ เยียม เบนฮินโนม ฮ์อง หฒั่ง เหญี่ย เญย เฒี่ยน เญย ต๋อง, เหว่ย ไม้ ปุน เมี่ยน ไฮ่ เฒาะ นิ่น บัว เญย น่าม โญ์ว หล่ง โต์ว ปั๊ว เหฒี่ย ฝ่ง ห่อ ปุน โมเล้ก เฒี่ยน.

11นิ่น เฒาะ ฆอย เยียม หฒั่ง เฒี้ยว เญย เปย๊า เญย แก้ง ด่าง เญย ม์า, ต้ง ยูดา เต่ย เญย หฒวัง ฮู่ง ฝูง เหว่ย หล่ง หฒั่ง บะฮนอย เญย ม์า. นิ่น บัว เยียม หลาด กะญั์ว นิด เต้า เจียน, บั๋ว เห่ว นาทันเมเล้ก, เยียม วั้ว ฉง. โยสิยา หย่า เฒาะ หฒั่ง บะฮนอย เญย ม์า-เธีย ปั๊ว กวั่ง.

12นิ่น หย่า แธะ เหฌี่ย ยูดา เญย หฒวัง ฮู่ง เยียม เปย๊า-ง่อ, นิด อาหัด เญย วั้ว ฉง, เหธย เญย เหฒี่ย-ต้อง เหธา มะนัดเส เยียม หฒั่ง เฒี้ยว เญย เปย๊า อี นอม หลาด กะญั์ว เญย เหฒี่ย-ต้อง. นิ่น เยียม วั้ว เต๋ย ต๋อง แธะ ต้าย ต้อ มี่ง เบ๊าะ หม่วน เหฑ่ง, ฒอย กวั่ง ขิดโลน ฮ์อง.

13โยสิยา ฮู่ง หย่า โหฒว ปุน เยียม ฮลัง หฒั่ง เฒี่ยน เญย ต๋อง ม่าย หวุย, เซ เยียม เยลูซาเลม เญย ตง ปูง, กะลั้น บง เญย น่าม ปูง แหมง, วั้ว นอม ต๋อง. น้าย นอม ต๋อง เซ อิสะลาเอน เมี่ยน เญย ซาโลมอน ฮู่ง เหว่ย ซีดอน เมี่ยน เญย กั้ม เฑี้ย ไห่ เญย อัดทาโล้ด เฒี่ยน เญ์ย, เหธา โมอับ เมี่ยน กั้ม เฑี้ย ไห่ เญย เคโม้ด เฒี่ยน, เหธา อัมโมน เมี่ยน, กั้ม เฑี้ย ไห่ เญย เฒี่ยน เหลียบ ต้าย.

14โยสิยา เบ๊าะ ฮู้ เหฑ่ง หฒั่ง เฒี่ยน เญย หละเปย๊ย-ต่ง หย่า จั๊ม อาเซลา เฒี่ยน เญ์ย เญย ฝัง, แอ๋ง เฒาะ เมี่ยน เญย บู๊ง กวั่ง เจี๊ยน วั้ว.

15ไม้ ตาน บัวะ น้าย. โยสิยา ฮู่ง หย่า แธะ เยียม เบดเอน เญย เหฒี่ย-ต้อง, เซ ต้ง เนบัด เญย ตอน, เยโลโบอัม, เหธย ต้าย วั้ว นอม เยียม ฮลัง หฒั่ง เฒี่ยน เญย ต๋อง. ต้ง น้าย นอม เหฒี่ย-ต้อง เหธา เยียม ฮลัง หฒั่ง เฒี่ยน เญย ต๋อง นิ่น ป่าย หว่าย. นิ่น ปั๊ว เยียม ฮลัง หฒั่ง เฒี่ยน เญย ต๋อง แอ๋ง เบ๊าะ เป๋น ซ้าย. นิ่น หย่า ปั๊ว อาเซลา เฒี่ยน เญ์ย เญย ฝัง.

16โยสิยา ฮวิน มฆ้อง ฯฒฯ หมั่ง ปวัด เยียม วั้ว เจี๋ย บง-เฮลน ม่าย เต๋ย จั๋น-ไต่ โฒ้ว. นิ่น ฯฒฯ พ้าย เมี่ยน มี่ง วั้ว โฒ้ว ต้อ บู๊ง ต้าย แอ๋ง อัน วั้ว นอม เหฒี่ย-ต้อง ปั๊ว เหว่ย ปุน เหฒี่ย-ต้อง ม่าย หวุย. น้าย เซ ฮนั้ง ฒิ่น ด่าง ทิน-ฮู่ง เญย เมี่ยน ฒุ่น เฒี้ยว เญย ฒิ่น โฮ์ หว่า.

17ฮู่ง เตี๋ย หน่าย ก๋า, “เยีย หมั่ง ปวัด วั้ว เซ หาย หญู่ง จั๋ง-โห่?” วั้ว นอม ฒี่ง เญย เมี่ยน ก๊อง, “หน่าย เซ เยียม ยูดา ต้าย เญย เหยียด เต้า ทิน-ฮู่ง เญย เมี่ยน. นิ่น ก๊อง ฒิ่น โฮ์ หว่า, ก๊อง เบดเอน เญย เหฒี่ย-ต้อง ต๋อย เหฑ่ง ฮู่ง เตี๋ย โหฒว ปุน น้าย นอม เหฒี่ย-ต้อง เญย เหยียด ฒู้ง สี่.”

18ฮู่ง เตี๋ย ก๊อง, “เซว่ย นิ่น เยียม หน่าย อ๊ะ. ไม้ ตู๋ง ปุน หาย เต้า ซุ้ย นิ่น เญย บู๊ง.” นิ่น บัว ฯฒฯ เลี่ยว นิ่น เญย บู๊ง เหธา เยียม สะมาเลีย ต้าย วั้ว เต้า โต่ว หว่า เมี่ยน เญย บู๊ง.

19ต้ง ฒิ่น ด่าง อิสะลาเอน เญย ฮู่ง เยียม สะมาเลีย เญย ฒี่ง เหลียบ ต้าย วั้ว เต๋ย เยียม ฮลัง หฒั่ง เฒี่ยน เญย ต๋อง ธัวะ เฒี้ยว เฉีย เจี์ย ไห่, โยสิยา หย่า แธะ เหฑ่ง ฮนั้ง เยียม เบดเอน โหฒว วั้ว นอ.

20นิ่น แอ๋ง เฒาะ เหยียด ฒู้ง เยียม ฮลัง หฒั่ง เฒี่ยน เญย ต๋อง เญย ไซ เมี่ยน เยียม เหฒี่ย-ต้อง กู้ หงว่าย ไต๋. นิ่น หย่า เฒาะ เมี่ยน เญย บู๊ง เยียม วั้ว เต๋ย เหฒี่ย-ต้อง กู้ หงว่าย ปั๊ว. ฆะฮ้า นิ่น หฑวน เยลูซาเลม.

21ฮู่ง เตี๋ย หัด หฒวัง แปะ ฝีง, “เม่ย บัว อ๋อย หฒุ เจี๋ย เสีย แหม่ง ฒิบ เหว่ย ท่าย เฒี้ยว, เม่ย บัว เญย ทิน-ฮู่ง. อ๋อย หฒุ เจี๋ย ฒิบ หฒิว เฟี้ย เจี๊ยน น้าย ป๊วน แล์ง แหง่ง หว่า โซว.”

22เยียม ต้ม เจียน กุ๊น อิสะลาเอน เต่ย-ปูง เญย ลู่ง เดี๊ย โหฒว ลิ์ว เถา อี้ หฒั่น, ไม้ ม่าย อิสะลาเอน ไฟ ยูดา เญย หาย เต้า ฮู่ง ฮนั้ง น้าย นอ เจี๋ย เสีย แหม่ง ฒิบ.

23มป่า โยสิยา โหฒว ฮู่ง เหฒียบ เป๊ด หฮญัง วั้ว หฮญัง, นิ่น บัว เยียม เยลูซาเลม เจี๋ย เสีย แหม่ง ฒิบ.

24ไม้ ตาน บัวะ น้าย. โยสิยา เหมียด เหฑ่ง ก๊าน เฮย เหธา โบ๊ว กว๋า เญย เมี่ยน, เยียม เปย๊า กะญั์ว หฒั่ง เญย เฒี่ยน เหธา หมิ่ว-ฝัง เหธา เยียม ยูดา เหธา เยลูซาเลม เหยียด ฒู้ง กั้ม เฑี้ย ไห่ เญย กะน้าย. นิ่น ฮนั้ง น้าย นอ โหฒว เหว่ย โหฒว เหฒียง เยียม หฒั่ง เฒี้ยว เญย เปย๊า ฮินคียา ไซ เมี่ยน ล์อ ปวัด วั้ว หฌุ่น โซว เฟี้ย เจี๊ยน เล์ย-หลัด เญย โจ๋วๆ หว่า.

25เยียม ด่าง โยสิยา เหธา เยียม ฆะฮ้า วั้ว เต๋ย เหยียด ฒู้ง ฮู่ง, ไม้ ม่าย หาย เต้า ฮู่ง ฮนั้ง โยสิยา หล่ง เหฑ่ง เฮญี้ยว, หล่ง เหฑ่ง หฒะเอ๋ย, หล่ง เหฑ่ง ชะ กัน เหฑ่ง โมเซ เญย เหยียด ฒู้ง เล์ย-หลัด.

26มป่า เฒี้ยว หธ่อ เฉีย เจี์ย ไห่, โน์ว ไห่ ยูดา เมี่ยน เถา อี้ หฒั่น, กะเฉีย หย่า ไม้ ฟิว, หลาย มะนัดเส โหฒว เญย เหยียด ฒู้ง สี่, ธัวะ นิ่น เฉีย เจี์ย.

27เฒี้ยว ก๊อง, “เยีย อ๋อย โหฒว ปุน ยูดา เมี่ยน ฮนั้ง เยีย โหฒว ปุน อิสะลาเอน เมี่ยน นอ, ไม้ ปุน นิ่น บัว เยียม เยีย เญย หฑะเฮมียน. เยีย อ๋อย กวั่ง เยีย กิ๊น น้าย นอม ฒี่ง, เยลูซาเลม, เหธา ต้ง เยีย ก๊อง ‘เยีย อ๋อย เหลียบ เยีย เญย เม่ง’ น้าย นอม หฒั่ง เฒี้ยว เญย เปย๊า.”

28โยสิยา กุ๊น เญย เฒี่ยง โห่ โหฒว เหฒ่ง เหฌี่ย เญย สี่ เหธา นิ่น โหฒว ลิ์ว เญย เหยียด ฒู้ง, เฟี้ย เจี๊ยน ยูดา ฮู่ง เญย ฮู่ง โต้ว ตาน.

29โยสิยา โหฒว ฮู่ง เญย เฒี่ยง โห่, อียิบ เญย ฮู่ง, ฟาโลเนโค, กัน ยูเฟติด ด้าย มี่ง เถง อัดซีเลีย เญย ฮู่ง. โยสิยา ฮู่ง ธ้วด มี่ง เยียม เมกิดโด เหธา ฟาโลเนโค เบ๊าะ จ๋า. ฟาโลเนโค เหธา โยสิยา ต๋อย เฮมียน วั้ว หฒั่น ฟาโลเนโค ฯฒฯ ไต๋ นิ่น อ๊ะ.

30โยสิยา เญย เจียน ฯฒฯ เฒาะ โยสิยา เญย เซย ตั๊บ เจี๊ยน เบ๊าะ จ๋า เญย ม์า-เธีย, เยียม เมกิดโด ทอ หฑวน เยลูซาเลม หฒัง เจี๊ยน นิ่น กั้น เญย โฒ้ว. วั้ว นอม กั๊วะ เญย แปะ ฝีง ฯฒฯ เฒาะ โยสิยา เญย ตอน, เยโฮอาหาด, ออน นิ่น ตี๊ นิ่น เญย เตีย โหฒว ฮู่ง.

31เยโฮอาหาด ฝาว เหว่ย โหฒว ฮู่ง วั้ว หฒั่น, นิ่น ตุ๊ หญี่ เหฒียบ ฟาม หฮญัง, หย่า เยียม เยลูซาเลม กุ๊น ปัว หฮลา เหญียะ. นิ่น เญย มา เญย บั๋ว เห่ว ฮามุทาน, เซ ลิบนา เมี่ยน, เยเลมี เญย เซียะ.

32หฒิว เฒี้ยว หมั่ง, เยโฮอาหาด โหฒว หว่าย สี่ ฮนั้ง นิ่น เญย อง-ถาย บัว โหฒว เญย นอ.

33ฟาโลเนโค เฒาะ นิ่น มี่ง หววน เจี๊ยน เยียม ฮามัด เต่ย เญย ลิบลา ฒี่ง เหว่ย ปุน นิ่น ไม้ ตุ๊ เยียม เยลูซาเลม กุ๊น. นิ่น หย่า ปาด ยูดา เมี่ยน ธ้วด อี ธิน เหยียด แป๊ะ จ้อย ญ่าน เหธา หญี่ เหฒียบ เยี้ยด จ้อย เจียม.

34ฟาโลเนโค เหลียบ โยสิยา เญย ตอน, เอลียาคิม โหฒว ฮู่ง ตี๊ นิ่น เญย เตีย, โยสิยา, แอ๋ง ทิ้ว นิ่น เญย บั๋ว เห่ว เยโฮยาคิม. นิ่น หย่า ต้อ เยโฮอาหาด มี่ง อียิบ เต่ย-ปูง. เยียม อียิบ นิ่น ไต่ หมี่ อ๊ะ.

35เยโฮยาคิม ธ้วด เจียม ญ่าน ปุน ฟาโลเนโค หฒิว นิ่น หัด เญย หว่า. มป่า เหว่ย ไฮ่ ม่าย น้าย เต๋ย เจียม ญ่าน ธ้วด, นิ่น อ๊าบ วั้ว นอม เต่ย-ปูง เญย แปะ ฝีง ธ้วด โฑว-ฒิ่น หฒิว เก๊าะ-เมี่ยน ม่าย เญย.

36เยโฮยาคิม ฝาว เหว่ย โหฒว ฮู่ง วั้ว หฒั่น นิ่น ตุ๊ หญี่ เหฒียบ ฮม์ หฮญัง. นิ่น หย่า เยียม เยลูซาเลม กุ๊น เหฒียบ เยี้ยด หฮญัง. นิ่น เญย มา เญย บั๋ว เห่ว เสบิดา, เซ ลูมา เมี่ยน, เปดายา, เญย เซียะ.

37หฒิว เฒี้ยว หมั่ง, นิ่น โหฒว หว่าย สี่, ฮนั้ง นิ่น เญย อง-ถาย บัว โหฒว นอ.

← Chapter 22 Jump to: Chapter 24 →