2 Kings 24

Mien Bible (Thai Script) © Thailand Bible Society, 2007

← Chapter 23 Jump to: Chapter 25 →

1เยียม เยโฮยาคิม กุ๊น เญย เฒี่ยง โห่, บาบีโลน เญย ฮู่ง, เนบูคัดเน้ดซา, เปียะ ต้าย ธ้าง ยูดา เต่ย-ปูง. เยโฮยาคิม หย่า หฒุ เยียม นิ่น เญย ปั์ว-เดี๊ย บัวะ นิ่น กุ๊น ปัว หฮญัง. ฆะฮ้า นิ่น แหง่ง, ไม้ หมวัง เนบูคัดเน้ดซา.

2เฒี้ยว ปุน บาบีโลน เมี่ยน, ซีเลีย เมี่ยน, โมอับ เมี่ยน เหธา อัมโมน เมี่ยน เญย เหยียด กวั้น เหยียด กวั้น หฒะ แปง ต้าย เบ๊าะ นิ่น. นิ่น พ้าย นิ่น บัว ต้าย เหว่ย อ๋อย เหมียด ยูดา หฒิว เฒี้ยว หล่ง นิ่น เญย โปว, หฒวัง โต่ว หว่า เมี่ยน, ก๊อง เญย หว่า.

3น้าย เต๋ย สี่ ธ้วด ต้าย หฒิว เฒี้ยว หัด เญย หว่า เหว่ย ปุน ยูดา เมี่ยน ไม้ ตุ๊ เยียม นิ่น เญย หฑะเฮมียน. เซ หลาย มะนัดเส โหฒว เญย เหยียด ฒู้ง ฒุ์ย,

4หย่า หลาย นิ่น ไต๋ คู้ เมี่ยน ธั้ม, ปุน ฑย้าม เหลี่ยว ธ้วด ปวั๊ง เยลูซาเลม. เฒี้ยว หย่า ไม้ กวั่ง ปุน นิ่น.

5เยโฮยาคิม กุ๊น เญย เฒี่ยง โห่ โหฒว ลิ์ว เหฒ่ง เหฌี่ย เญย สี่ เหธา นิ่น โหฒว เญย เหยียด ฒู้ง, เฟี้ย เจี๊ยน ยูดา ฮู่ง เญย ฮู่ง โต้ว ตาน.

6เยโฮยาคิม ฯฒฯ เกวย เสย หมี่ อ๊ะ. นิ่น เญย ตอน, เยโฮยาคีน, หย่า หฑิบ เจี๊ยน นิ่น โหฒว ฮู่ง.

7อียิบ เญย ฮู่ง ไม้ แอ๋ง ธ้วด นิ่น เญย กั๊วะ, เหว่ย หฒุ บาบีโลน เญย ฮู่ง เฒาะ เหฑ่ง นิ่น เญย เต่ย-ปูง หมี่ อ๊ะ, เยียม อียิบ โด๊ะ มี่ง เถา ยูเฟติด ด้าย.

8เยโฮยาคีน ฝาว เหว่ย โหฒว ฮู่ง วั้ว หฒั่น, นิ่น ตุ๊ เหฒียบ เป๊ด หฮญัง. นิ่น เยียม เยลูซาเลม กุ๊น ปัว หฮลา เหญียะ. นิ่น เญย มา เญย บั๋ว เห่ว เนหุดทา, เซ เยลูซาเลม เมี่ยน, เอนนาทัน, เญย เซียะ.

9หฒิว เฒี้ยว หมั่ง, เยโฮยาคีน โหฒว หว่าย สี่ ฮนั้ง นิ่น เญย เตีย โหฒว นอ.

10วั้ว หฒั่น บาบีโลน เญย ฮู่ง, เนบูคัดเน้ดซา, เญย แปง-เปย๊ย ต้าย เว่ย ก๋อม เยลูซาเลม.

11แปง-เปย๊ย เว่ย เจี๊ยน ฒี่ง วั้ว หฒั่น, บาบีโลน เญย ฮู่ง, เนบูคัดเน้ดซา, มี่ง เถา เยลูซาเลม.

12ยูดา เญย ฮู่ง, เยโฮยาคีน, เหธา นิ่น เญย มา, นิ่น เญย เจียน, นิ่น เญย โหฒว โฮล เญย เมี่ยน เหธา เยียม ฮู่ง ติ่น เญย เจียน เหยียด ฒู้ง เหญี่ยม เซวย ปุน นิ่น. บาบีโลน เญย ฮู่ง โหฒว ฮู่ง ตะเป๊ด หฮญัง วั้ว หฮญัง, นิ่น ต้อ เยโฮยาคีน มี่ง หววน เจี๊ยน.

13ฮนั้ง เฒี้ยว ก๊อง นอ, เนบูคัดเน้ดซา เฒาะ เหฑ่ง เยียม หฒั่ง เฒี้ยว เญย เปย๊า เหธา เยียม ฮู่ง ติ่น เญย เหยียด ฒู้ง จ๋าย เญย กะน้าย. นิ่น หย่า เฒาะ อิสะลาเอน เญย ฮู่ง, ซาโลมอน, เหว่ย หฒั่ง เฒี้ยว เญย เปย๊า โหฒว ต้าย เญย เจียม-จา-ต๋อง ฮงะ เป๋น เหยียด เหฮลง เหยียด เหฮลง.

14นิ่น แอ๋ง กว๊าด เหฑ่ง เยลูซาเลม เญย แปะ ฝีง, เหธา เหยียด ฒู้ง แปง-เปย๊ย เหธา เฮ้น ไห่ เญย แปง, เลี่ยม เหยียด ฒู้ง ปั์ว-เต้า หลง เญย หฒั่ง เมี่ยน เหธา เดี๋ยง-หฒั่ง. เหยียด ฒู้ง ม่าย เหยียด หว่าน เต้า. ขูง เหฒ่ง เก้า จ่ม เจี๋ย เญย เมี่ยน ตุ๊ เยียม เต่ย-ปูง ฮนั้ง.

15เนบูคัดเน้ดซา กว๊าด เยโฮยาคีน มี่ง บาบีโลน. เลี่ยม ฮู่ง หม่า เหธา นิ่น เญย เอ๊า บัว, นิ่น เญย เจียน เหธา วั้ว นอม เต่ย-ปูง โหฒว โฮล เญย เมี่ยน, เนบูคัดเน้ดซา เยียม เยลูซาเลม กว๊าด มี่ง บาบีโลน เหฑ่ง.

16บาบีโลน เญย ฮู่ง หย่า กว๊าด เหยียด ฒู้ง ไฮ่ เบ๊าะ จ๋า เฮ้น เญย แปง เสี่ย ธิน เต้า, หย่า กว๊าด ปั์ว-เต้า หลง เญย หฒั่ง เมี่ยน เหธา เฮลียะ-หฒั่ง เหยียด ธิน เต้า มี่ง บาบีโลน. เหยียด ฒู้ง เฮ้น เญย, ผุย ตุ๊ โหฒว แปง เบ๊าะ จ๋า เญย เมี่ยน.

17บาบีโลน เญย ฮู่ง เหลียบ เยโฮยาคีน เญย โย์ว-เตี๋ย, มัดทานิยา, โหฒว ฮู่ง ตี๊ เยโฮยาคีน, แอ๋ง ทิ้ว มัดทานิยา เญย บั๋ว เห่ว เสเดคียา.

18เสเดคียา ฝาว เหว่ย โหฒว ฮู่ง วั้ว หฒั่น, นิ่น ตุ๊ หญี่ เหฒียบ เยี้ยด หฮญัง. นิ่น เยียม เยลูซาเลม กุ๊น เหฒียบ เยี้ยด หฮญัง. นิ่น เญย มา เญย บั๋ว เห่ว ฮามุทาน, เซ ลิบนา เมี่ยน, เยเลมี, เญย เซียะ.

19หฒิว เฒี้ยว หมั่ง, เสเดคียา โหฒว หว่าย สี่, ฮนั้ง เยโฮยาคีน โหฒว นอ.

20เซ หลาย เฒี้ยว เฉีย เจี์ย ไห่, เยลูซาเลม เหธา ยูดา หธีง หฒุ น้าย เต๋ย สี่ เถา เฒี้ยว กวั่ง, ไม้ ปุน นิ่น บัว เยียม นิ่น เญย หฑะเฮมียน. โหฒว เกา, เสเดคียา แหง่ง เจี๊ยน บาบีโลน เญย ฮู่ง.

← Chapter 23 Jump to: Chapter 25 →