2 Kings 19

Mien Bible (Thai Script) © Thailand Bible Society, 2007

← Chapter 18 Jump to: Chapter 20 →

1เฮเซคียา ฮู่ง ไฮ์ ลิ์ว วั้ว เต้า ต้ม แปง-เปย๊ย ก๊อง เญย หว่า, นิ่น เป๊ด นิ่น เญย ลุย แอ๋ง ฒุ เจี๊ยน ล่าม่า เดีย-โธว เปียะ หฒั่ง เฒี้ยว เญย เปย๊า.

2นิ่น พ้าย โก๋ว ฮู่ง ติ่น วั้ว เต้า เอลียาคิม เหธา เซ้บนา โซว-ปิ๊ว เหธา โหฒว เก้า โฮล วั้ว เต๋ย ไซ เมี่ยน, เหยียด ฒู้ง ฒุ เจี๊ยน ล่าม่า เดีย-โธว, มี่ง ล์อ อาม้อด เญย ตอน, โต่ว หว่า เมี่ยน, อิสะยา.

3นิ่น บัว ก๊อง บั๋ว อิสะยา, “อี้ ฮนอย เซ ด๊อด หน่าน, หฒุ ต้าน หฒุ ไญ้ เญย ฮนอย. เซ ฮนั้ง มเซียะ ตอน อ๋อย ยู์ง กู้งว์า หย่า ไม้ ม่าย ชะ ยู์ง.

4เหฑีย เฒี้ยว, เม่ย เญย ทิน-ฮู่ง, หมวัง ไฮ์ วั้ว เต้า ต้ม แปง-เปย๊ย, ต้ง นิ่น เญย เฒี้ยว, อัดซีเลีย เญย ฮู่ง, พ้าย ต้าย คี เฒี่ยง เจี๊ยน เญย ทิน-ฮู่ง วั้ว เต๋ย หว่า. เฒี้ยว, เม่ย เญย ทิน-ฮู่ง, ฯฒฯ เหว่ย นิ่น ไฮ์ น้าย เต๋ย หว่า ก๊อง นิ่น อ๊ะ. เหว่ย น้าย โท้ เม่ย เถง น้าย เต๋ย เหฒ่ง เหฌี่ย เญย เมี่ยน เต๋า เก๋า.”

5เฮเซคียา เญย เจียน มี่ง เถา อิสะยา วั้ว,

6อิสะยา ก๊อง บั๋ว นิ่น บัว, “อ๋อย หฒุ บั๋ว เม่ย บัว เญย เฒี้ยว, ‘ เฒี้ยว ฮนั้ง น้าย นอ ก๊อง. ไม้ ตู๋ง กั้ม เหฑีย เม่ย บัว ไฮ์ ลิ์ว น้าย เต๋ย หว่า, ต้ง อัดซีเลีย เญย ฮู่ง เญย โปว ก๊อง คี เยีย เญย หว่า.

7เยีย อ๋อย ปุน นิ่น ม่าย หญู่ง เฮญี้ยว. นิ่น ตุ๊ ไฮ์ หญู่ง หว่า-หฑยาว ฯฒฯ หฑวน นิ่น กั้น เญย เต่ย-ปูง. เยียม นิ่น กั้น เญย ป๊วน-เต่ย-ปูง, เยีย ฒู้ง ปุน นิ่น หฒุ หฑุ ด๊าว ไต๋ ไต่.’”

8วั้ว เต้า ต้ม แปง-เปย๊ย ไฮ์ ก๊อง อัดซีเลีย เญย ฮู่ง ธ้วด ลาคี้ด ฒี่ง, นิ่น ฯฒฯ ถุย แอ๋ง ล์อ ปวัด ฮู่ง เตี๋ย เยียม ลิบนา ฒี่ง เบ๊าะ จ๋า.

9อัดซีเลีย เญย ฮู่ง ไฮ์ เฝียน ก๊อง, อียิบ เต่ย-ปูง, คู้ด เมี่ยน เญย ฮู่ง, ทีละหะคา, ธ้วด ต้าย อ๋อย เหธา นิ่น เบ๊าะ จ๋า. นิ่น ฯฒฯ พ้าย โต่ว เฝียน เมี่ยน มี่ง เฮเซคียา วั้ว ฮนั้ง น้าย นอ ก๊อง,

10“อ๋อย หฒุ ก๊อง บั๋ว ยูดา เญย ฮู่ง, เฮเซคียา, ‘เม่ย บัว เสียน เขา เญย ทิน-ฮู่ง ก๊อง, “เยลูซาเลม ไม้ หฒุ จิว ปุน อัดซีเลีย ฮู่ง” นิ่น ขูง ดั๊ว เม่ย บัว ฮนั้ง. ไม้ ตู๋ง หมวัง.

11เม่ย หย่า ไฮ์ ก๊อง อัดซีเลีย เญย หฒวัง ฮู่ง ฮนั้ง หาย นอ โหฒว ปุน หม่าน กั๊วะ, ฒู้ง เหมียด เหฑ่ง หมี่ อ๊ะ. เม่ย ฮนั้ม ต้าย เม่ย ไฮ่ ตุ๊ เหฌียว ไฟ?

12วั้ว เต๋ย นอมๆ กั๊วะ เญย เต้าๆ เฒี่ยน ไฮ่ เหฌียว ตุ๊ นิ่น บัว ไฟ? เซ เยีย เญย อง-ถาย เหมียด วั้ว เต๋ย กั๊วะ เญย เฒี่ยน, ต้ง โกซาน, ฮาลาน, เลเซ้บ เหธา เยียม เทนอัดสา เญย เอเดน เมี่ยน เญย เฒี่ยน.

13ฮามัด เญย ฮู่ง, อานปัด เญย ฮู่ง, เสฟานวาอิม ฒี่ง เญย ฮู่ง ไฟ เฮนา เญย ฮู่ง ไฟ อิบวา เญย ฮู่ง เยียม หาย?’”

14เฮเซคียา โตะ ลิ์ว โต่ว เฝียน เมี่ยน ต้อ ต้าย เญย เฝียน, นิ่น ฯฒฯ เปียะ หฒั่ง เฒี้ยว เญย เปย๊า คอย เฝียน อัน เจี๊ยน เฒี้ยว เญย หฑะเฮมียน.

15เฮเซคียา เต๋า เก๋า ก๊อง บั๋ว เฒี้ยว, “โอ เฒี้ยว, อิสะลาเอน เญย ทิน-ฮู่ง, ต้ง เยียม วั้ว เต๋ย อี เต้า เคลูบิม บุด๋ง วั้ว เต้า อ้า! ขูง เม่ย กั้น โหฒว ลู่ง เดี๊ย หม่าน กั๊วะ เญย ทิน-ฮู่ง. เม่ย เหฒย ลู่ง เหฒย เดา.

16โอ เฒี้ยว อ่า, โท้ แปง มน่อม หมวัง. โอ เฒี้ยว อ่า, โท้ หนูง ฆอย มฒีง หมั่ง. หมวัง เซนนาเคลิบ ฝูง ต้าย คี เฒี่ยง เจี๊ยน เญย ทิน-ฮู่ง เญย หว่า.

17“โอ เฒี้ยว อ่า, หฒะเก้ง เฒียน เญย. อัดซีเลีย เญย ฮู่ง ป่าย ฮวาง น้าย เต๋ย หม่าน กั๊วะ หย่า ปุน นิ่น บัว เญย เต่ย-ปูง ฮวาง เหฑ่ง,

18หย่า เฒาะ นิ่น บัว เญย เฒี่ยน ฒอย เปียะ โต์ว เหมียด เหฑ่ง, เหว่ย หฒุ ไม้ เฒ์ย เฒี่ยน, เซ เมี่ยน กั้น เญย ปั์ว หล่ง เดี๋ยง, หล่ง หละเปย๊ย โหฒว ต้าย.

19โอ เฒี้ยว, เยีย บัว เญย ทิน-ฮู่ง อ่า, โท้ เหฌียว เยีย บัว เปย๋า ดุ๊ด อัดซีเลีย ฮู่ง เญย ปั์ว-เดี๊ย เหว่ย ปุน ลู่ง เดี๊ย หม่าน กั๊วะ ฮิ้ว ตุ๊ เม่ย, เฒี้ยว กั้น, เซ ทิน-ฮู่ง.”

20อาม้อด เญย ตอน, อิสะยา, ปุน หว่า มี่ง บั๋ว เฮเซคียา, “ เฒี้ยว, อิสะลาเอน เมี่ยน เญย ทิน-ฮู่ง, ฮนั้ง น้าย นอ ก๊อง, ‘เม่ย เต๋า เก๋า ก๊อง เถา อัดซีเลีย เญย ฮู่ง, เซนนาเคลิบ, วั้ว เต๋ย หว่า เยีย ไฮ์ หมี่ อ๊ะ.’

21น้าย เซ เฒี้ยว เญย หว่า ก๊อง นิ่น. “‘ไม้ เปว๋ย เจี๋ย ตอน เญย เซียะ, สิโอน, หมั่ง เผีย เม่ย, ฮว้วด เม่ย. เยลูซาเลม เญย เซียะ ปวัด เม่ย เปย๋า หย่า หฮวัง มฆ้อง ปุน เม่ย.

22เม่ย ก๊อง โตะ คี หาย เต้า? เม่ย หล่ง เม่ย เญย เฉีย ก๊อง หาย เต้า? เม่ย หนูง เม่ย เญย มฒีง โหฒว เหมา ปุน หาย เต้า? เม่ย โหฒว ปุน อิสะลาเอน เญย ธีง-เหฑ่ง เฒี้ยว.

23เม่ย หล่ง เม่ย เญย โต่ว เฝียน เมี่ยน คี เฒี้ยว. เม่ย ก๊อง, “เยีย หล่ง เยีย เบ๊าะ จ๋า เญย ม์า-เธีย ธั้ม ฝาว ฮลัง ไห่ เญย บง, ฒู้ง เปียะ เลบานอน โด เจี๋ย เญย ต๋อง. เยีย ก๋อย เก้า ฮลัง เจี๋ย เญย สีดา ฒ่ง เดี๋ยง, หย่า ก๋อย เก้า หลง เจี๋ย เญย ฒ่ง. เยีย เปียะ หล่ม เถา เก้า โก เจี๋ย เญย ต๋อง, เปียะ เถา เก้า โฮ์ เจี๋ย เญย เก้ม.

24เยีย เยียม กั้น นอม เต่ย-ปูง เว้ด ววม-ค้วด หย่า เยียม วั้ว ฮบ ววม. เยีย หล่ง เยีย เญย เหฒา-เป๊น ธ้าย ฆาย อียิบ เต่ย-ปูง เญย เหยียด ฒู้ง โด๊ะ.’”

25“ เฒี้ยว ก๊อง, ‘เม่ย บัว ไม้ ไฮ์ เจี๋ย ไฟ? เยีย ตี่ง เหฒียง เล่า อ๊ะ. โล์-ฮนอย เยีย ต๊า หฒะเอ๋ย, อี้ หฒั่น ปุน ธ้วด ต้าย อ๊ะ, เซ เยีย หล่ง เม่ย ปุน น้าย เต๋ย เว่ย ว้วน เญย ฒี่ง เป๋น หละเปย๊ย-ดุย.

26น้าย เต๋ย ฒี่ง เญย แปะ ฝีง เญย ชะ เหฑ่ง หมี่ อ๊ะ. นิ่น บัว ฯฒฯ เฮญี้ยว หว่าย เหฑ่ง หย่า หฒุ ไญ้. นิ่น บัว เซ ฮนั้ง เยียม เดา-ฮวาง เญย เมี้ย, ฮนั้ง เมี้ย-ยาง หลุน เญย นอ, เซ ฮนั้ง เยียม เปย๊า-ง่อ ธ้วด ต้าย เญย เมี้ย, ไม้ แก้ง โฮล, หฒุ หญุด โต์ว ปั๊ว ฆาย.

27“‘มป่า เยีย ฮิ้ว ตุ๊ เม่ย เยียม หาย, หย่า ฮิ้ว ตุ๊ เม่ย หาย หฒั่น ธ้วด มี่ง แอ๋ง เปียะ ต้าย, เยีย หย่า ฮิ้ว เม่ย เฉีย เจี์ย, โน์ว เยีย, ก๊อง เยีย.

28หลาย เม่ย เฉีย เจี์ย โน์ว เยีย, ก๊อง เยีย, เม่ย ปู๋ง เญย หว่า-เหมา หย่า เถา เยีย เญย มน่อม, เยีย ฯฒฯ หล่ง เยีย เญย เฮลียะ-เงา, เงา เจี๊ยน เม่ย เญย บะฒอง, หย่า เฒาะ เยีย เญย ฮั่น โค้ว ฟับ เม่ย เญย ฑุ่ย, ปุน เม่ย ต๋าว ฆาง หฑวน เม่ย ต้าย เญย เจ๊า.’

29“โอ เฮเซคียา อ้า! น้าย เซ โหฒว นอม จั๋ง-โห่. “อี้ หฮญัง เม่ย บัว ตุ๊ หญั่น นิ่น กั้น ธ้วด เญย กะน้าย, ตะเหญ่ย หฮญัง ตุ๊ หญั่น เยียม วั้ว เต๋ย โฮล ต้าย เญย กะน้าย. มป่า ตะฟาม หฮญัง อ๋อย หฒุ หฒวัง หย่า อ๋อย หฒุ เซียว, อ๋อย หฒุ หฒวัง อะหงุ่น หฮวีง หย่า หญั่น วั้ว เต๋ย เปี๊ยว.

30ยูดา เญย โต้ว ฒง ตุ๊ เปย๋า ดุ๊ด เหฒ่ง เหฌี่ย เญย เมี่ยน, แอ๋ง ไฮ่ เยียม หน่าย ฮนั้ง กะน้าย-หฒวัง เหฌี่ย ฑู่ง, หฮยาง ต้าย เฒี่ยง เปี๊ยว.

31เหว่ย หฒุ ม่าย เต๋ย เหฒ่ง เหฌี่ย เญย เมี่ยน อ๋อย เยียม เยลูซาเลม ธ้วด, ม่าย กวั้น ตุ๊ แหม่ง ธ้วด เญย เมี่ยน อ๋อย เยียม สิโอน บง ธ้วด. เน่น เจี๋ย เญย เฒี้ยว ด่ง หาย ฒู้ง อ๋อย ฮนั้ง น้าย นอ โหฒว.

32“เหว่ย น้าย เฒี้ยว ฮนั้ง น้าย นอ ก๊อง อัดซีเลีย เญย ฮู่ง. ‘นิ่น ไม้ ตุ๊ เปียะ น้าย นอม ฒี่ง, หย่า ไม้ ป๊วน เหยียด ฑิด ฟอง เปียะ. นิ่น ไม้ ตุ๊ นั้น ท้อง-ป้าย เยียม น้าย นอม ฒี่ง เญย หฑะเฮมียน, หย่า ไม้ ตุ๊ ดุย เนีย ฮลัง เว่ย ก๋อม เบ๊าะ ฒี่ง.

33นิ่น ยั่ง หาย ติ้ว เจ๊า ต้าย หย่า อ๋อย หฒุ ยั่ง วั้ว ติ้ว เจ๊า หฑวน. นิ่น ฒู้ง ไม้ เปียะ น้าย นอม ฒี่ง.’ น้าย เซ เฒี้ยว ก๊อง เญย หว่า.

34‘เหว่ย เยีย กั้น หย่า เหว่ย เยีย เญย โปว, ดาวิด, เยีย อ๋อย เปว เจี๊ยน น้าย นอม ฒี่ง, หย่า อ๋อย เหฌียว น้าย นอม ฒี่ง.’”

35วั้ว ม์วน เฒี้ยว เญย ฟิน-เมี่ยน ธ้วด มี่ง เยียม อัดซีเลีย เมี่ยน เญย เธี้ยง ไต๋ เหยียด สิน เหฮยียด หว่าน ปยา ธิน เต้า เมี่ยน ไต่. ตะเหญ่ย ดอม เฑี้ยว เญย เมี่ยน เจี์ย ซิน ต้าย ปวัด เป๋น จั๋น-ไต่ เญย เซย เหฑ่ง หมี่ อ๊ะ.

36อัดซีเลีย เญย ฮู่ง, เซนนาเคลิบ, ฯฒฯ ถุย ฆอย หฑวน เปย๊า เยียม นินะเว.

37ม่าย ฮนอย นิ่น เยียม หมิ่ว-เปย๊า กะญั์ว ป๋าย นิ่น เญย เฒี่ยน, นิดโล้ก, วั้ว หฒั่น, อี เต้า นิ่น เญย ตอน, อัดลัมเมเล้ก เหธา ซาเลเซ, หล่ง หฑุ ด๊าว ไต๋ นิ่น. ฆะฮ้า นิ่น บัว เปย๋า มี่ง เยียม อาลาลัด เต่ย-ปูง. เซนนาเคลิบ เญย ตอน, เอสานฮัดโดน, หฑิบ เจี๊ยน นิ่น โหฒว ฮู่ง.

← Chapter 18 Jump to: Chapter 20 →