2 Kings 9

Mien Bible (Thai Script) © Thailand Bible Society, 2007

← Chapter 8 Jump to: Chapter 10 →

1โต่ว หว่า เมี่ยน, เอลีซา, เห่ว เต้า วั้ว กวั้น โต่ว หว่า เมี่ยน ต้าย ก๊อง บั๋ว นิ่น, “หลิ่ว เล์ย เหฒียง ธ้วด เจ๊า หย่า ต้อ เจี๊ยน น้าย แป้ง โย่ว มี่ง ลาโม้ดกิเลอาด.

2เถา วั้ว อ๋อย หฒุ ล์อ นิมซี เญย ฟุน, เยโฮซาฟัด เญย ตอน, เยฮู. ปวัด นิ่น ฯฒฯ ต้อ นิ่น เล่ย ฆอย นิ่น เญย ต่อย เปียะ กะญั์ว วั้ว ฉง เปย๊า.

3เฒาะ น้าย ออน เมี่ยน เญย โย่ว โต๋ นิ่น เญย มฆ้อง ก๊อง, ‘ เฒี้ยว ฮนั้ง น้าย นอ ก๊อง, “เยีย ออน เม่ย โหฒว อิสะลาเอน เญย ฮู่ง.”’ ก๊อง ลิ์ว ฯฒฯ คอย แก้ง ถิว เปย๋า อ๊ะ. ไม้ ตู๋ง ฒั้ว.”

4วั้ว เต้า โต่ว หว่า เญย เมี่ยน หลุน เมี่ยน ฯฒฯ มี่ง ลาโม้ดกิเลอาด.

5มี่ง เถา นิ่น ปวัด หฒวัง แปง-เปย๊ย กั๊บ ฒุ้น เฒว์ย เจี๊ยน วั้ว. นิ่น ก๊อง, “ต้ม แปง-เปย๊ย อ่า, เยีย ม่าย หว่า อ๋อย ก๊อง บั๋ว เม่ย.” เยฮู หน่าย, “เม่ย อ๋อย เหธา เยีย บัว หาย เต้า ก๊อง?” นิ่น เตา, “ต้ม แปง-เปย๊ย อ่า, เยีย อ๋อย เหธา เม่ย ก๊อง.”

6เยฮู ฯฒฯ เจี์ย ซิน เปียะ เปย๊า. วั้ว เต้า โต่ว หว่า เญย เมี่ยน หลุน เมี่ยน ฯฒฯ เฒาะ โย่ว โต๋ เยฮู เญย มฆ้อง, ก๊อง บั๋ว นิ่น, “ เฒี้ยว, อิสะลาเอน เมี่ยน เญย ทิน-ฮู่ง, ฮนั้ง น้าย นอ ก๊อง, ‘เยีย ออน เม่ย โหฒว ฮู่ง กุ๊น เฒี้ยว เญย แปะ ฝีง, อิสะลาเอน เมี่ยน.

7เม่ย อ๋อย หฒุ เหมียด เหฑ่ง เม่ย เญย เฒี้ยว, อาหับ, เญย เฒ้ย-ฟุน. เยีย ฯฒฯ จ๊าว วิน ปุน เยเซเบน เหว่ย นิ่น ไต๋ เยีย เญย โปว, หฒวัง โต่ว หว่า เมี่ยน, เหธา เฒี้ยว เญย เหยียด ฒู้ง โปว เหลี่ยว ธ้วด เญย ฑย้าม.

8อาหับ เญย หฒวัง โต้ว ฒง อ๋อย หฒุ เหมียด. ตะฟ่าน เยียม อิสะลาเอน เต่ย-ปูง เป๋น อาหับ เญย มจั่ง ตอน, ไม้ กุ๊น โหฒว โน่ว ไฟ ไม้ โหฒว โน่ว เญย, เยีย อ๋อย ไพ กวั่ง.

9เยีย อ๋อย ปุน อาหับ เญย โต้ว ฒง ฮนั้ง เนบัด เญย ตอน, เยโลโบอัม, เญย โต้ว ฒง, หย่า ฮนั้ง อาหิยา เญย ตอน, บาอาชา, เญย โต้ว ฒง.

10เยเซเบน แอ๊ะ, เยียม ยิดเลเอน เต่ย อ๋อย หฒุ จู๊ หญั่น, ไม้ ม่าย หาย เต้า ปย๊บ.’” ก๊อง ลิ์ว, โต่ว หว่า วั้ว เต้า เมี่ยน หลุน เมี่ยน ฯฒฯ คอย แก้ง ถิว เปย๋า หมี่ อ๊ะ.

11เยฮู ธ้วด ต้าย หฑวน เถา นิ่น เญย เฒี้ยว เญย แปง-กวั้น วั้ว หฒั่น, นิ่น บัว หน่าย นิ่น, “หญู่งๆ หอบ เญย ไฟ? โหฒว หาย หญู่ง หน่าย เต้า กะน้าย-ปุ๊ด-ดิน ต้าย ล์อ เม่ย?” เยฮู เตา, “เม่ย บัว เฒียะ ตุ๊ น้าย ล่าน เมี่ยน หย่า ฮิ้ว ตุ๊ นิ่น ก๊อง หาย หญู่ง.”

12นิ่น บัว ก๊อง, “เยีย บัว ไม้ ฮิ้ว เหลาะ. บั๋ว เยีย บัว ม่าะ!” เยฮู ก๊อง, “นิ่น ฮนั้ง น้าย บั๋ว เยีย, ‘ เฒี้ยว ฮนั้ง น้าย นอ ก๊อง, “เยีย ออน เม่ย โหฒว ฮู่ง กุ๊น อิสะลาเอน เมี่ยน.”’”

13นิ่น บัว เซี้ยบๆ เญย ไจ๊ ต้ม ลุย ติ่ม เจี๊ยน เทย ปุน เยฮู โซ้ว กู้ หงว่าย. นิ่น บัว ฯฒฯ ปย๊ม จอง หย่า เห่ว เจี๊ยน ก๊อง, “เยฮู โหฒว ฮู่ง.”

14นิมซี เญย ฟุน, เยโฮซาฟัด เญย ตอน, เยฮู, ต๊า หฒะเอ๋ย แหง่ง โยลัม. (โยลัม เหธา อิสะลาเอน เญย หฒวัง เมี่ยน เหว่ย ซีเลีย เญย ฮาซาเอน ฮู่ง เบ๊าะ จ๋า เญย เจ๊า เยียม ลาโม้ดกิเลอาด ฒั้ว.

15มป่า โยลัม เหธา ซีเลีย เญย ฮาซาเอน ฮู่ง เบ๊าะ จ๋า วั้ว หฒั่น นิ่น หฒุ มุน ฯฒฯ มี่ง ยิดเลเอน ฒั้ว หฒ่อ หลง.) เยฮู ก๊อง, “สี ก๊อง เม่ย บัว ไฮ์ หอบ เญย นอ, ไม้ ตู๋ง ปุน หาย เต้า ปี๋ง เจี๊ยน ธ้วด ฒี่ง มี่ง ยิดเลเอน บั๋ว น้าย เต๋ย เฝียน.”

16เยฮู ฯฒฯ เปียะ นิ่น เญย ม์า-เธีย มี่ง ยิดเลเอน, เหว่ย หฒุ โยลัม เยียม หน่าย ไม้ หลง. ยูดา เญย ฮู่ง, อาหัดยา, หย่า มี่ง วั้ว หมั่ง โยลัม.

17ม่าย เต้า เยียม ยิดเลเอน ฒี่ง เญย ฒี่ง หลาด เญย ล่าว ฒั้ว ฒี่ง ปวัด เยฮู วั้ว กวั้น เมี่ยน ต้าย ฯฒฯ ก๊อง, “เยีย ปวัด ม่าย กวั้น เมี่ยน ต้าย อ๊ะ.” โยลัม ก๊อง, “พ้าย เต้า เก้ ม์า เญย เมี่ยน ธ้วด มี่ง ปวั้ง นิ่น บัว, หน่าย ก๋า, ‘เม่ย บัว เหว่ย แป้ง ออน เญย เจ๊า ต้าย ไฟ’”

18เก้ ม์า เญย เมี่ยน ฯฒฯ มี่ง ปวั้ง เยฮู ก๊อง, “ฮู่ง เตี๋ย ฮนั้ง น้าย นอ ก๊อง, ‘เม่ย บัว เหว่ย แป้ง ออน เญย เจ๊า ต้าย ไฟ?’” เยฮู เตา, “แป้ง ออน ไฟ ไม้ แป้ง ออน ม่าย หาย หญู่ง เกวน หฒุ เม่ย? เม่ย ต๋าว ซิน กัน เจี๊ยน เยีย ฆะฮ้า ฆาง ต้าย ม่าะ!” ฒั้ว ฒี่ง เญย เมี่ยน แอ๋ง ก๊อง, “โต่ว เฝียน เมี่ยน มี่ง เถา นิ่น บัว วั้ว มป่า ไม้ หฑวน.”

19ฮู่ง เตี๋ย แอ๋ง พ้าย ตะเหญ่ย เต้า เก้ ม์า เญย เมี่ยน ธ้วด มี่ง. เถา เยฮู วั้ว นิ่น ก๊อง, “ฮู่ง เตี๋ย ฮนั้ง น้าย นอ ก๊อง, ‘เม่ย เหว่ย แป้ง ออน เญย เจ๊า ต้าย ไฟ?’” เยฮู เตา, “แป้ง ออน ไฟ ไม้ แป้ง ออน ม่าย หาย หญู่ง เกวน หฒุ เม่ย? เม่ย ต๋าว ซิน กัน เจี๊ยน เยีย ฆะฮ้า ฆาง ต้าย ม่าะ!”

20ฒั้ว ฒี่ง เญย เมี่ยน ก๊อง, “วั้ว เต้า เมี่ยน มี่ง ตุ๊ เถา นิ่น บัว วั้ว, มป่า นิ่น หย่า ไม้ หฑวน. ฒ้าง เธีย เญย เมี่ยน ฒ้าง เธีย ฮนั้ง นิมซี เญย ตอน, เยฮู, เหว่ย หฒุ นิ่น ฒ้าง เธีย ฮนั้ง ไม้ ฑัง เญย เมี่ยน นอ.”

21โยลัม ก๊อง, “อ๋อย หฒุ หลิ่ว เล์ย มี่ง อ๊ะ. นิ่น บัว ฯฒฯ หลิ่ว เล์ย เหฒียง นิ่น เญย ม์า-เธีย. อิสะลาเอน เญย ฮู่ง, โยลัม เหธา ยูดา เญย ฮู่ง, อาหัดยา, เก๊าะ-เมี่ยน เปียะ เก๊าะ-เมี่ยน เญย เธีย ธ้วด มี่ง ปวั้ง เยฮู. นิ่น บัว ฯฒฯ เยียม ยิดเลเอน เมี่ยน, นาโบด, เญย เดา, ปวั้ง จ๋า.

22โยลัม ปวัด เยฮู นิ่น หน่าย ก๋า, “เยฮู อ่า, เม่ย เหว่ย แป้ง ออน เญย เจ๊า ต้าย ไฟ?” เยฮู เตา, “หธ่อ ม่าย เม่ย เญย มา, เยเซเบน, โหฒว ฟ้าด เญย เจ๊า เหธา หฒั่ง หมิ่ว-ฝัง เญย สี่ ด่ง หน่าย ธั้ม, ฝู่ง ไฮ่ ม่าย แป้ง ออน?”

23โยลัม ฯฒฯ ต๋าว เธีย เปย๋า หย่า เห่ว เจี๊ยน อาหัดยา, “อาหัดยา อ้า! เป่ย ซี่ อ๊า โล่ะ!”

24เยฮู หล่ง เหฑ่ง ชะ แปง จวัง-หฒิน ปู๋ง มี่ง ป๊วน หฒุ โยลัม เญย จ๊าบ-เฒ่ย. ฟอง หธุน นิ่น เญย บะฑิว ทง, นิ่น ฯฒฯ คีง เหฌี่ย นิ่น เญย เบ๊าะ จ๋า เธีย กะญั์ว.

25เยฮู ก๊อง บั๋ว นิ่น เญย ปอง-ปั์ว เมี่ยน, บิดคา, “เฒาะ นิ่น เญย เซย ฒอย กวั่ง ยิดเลเอน เมี่ยน, นาโบด, เญย เดา. จั๋ง เจี๊ยน เม่ย เหธา เยีย จวั่ง เธีย กัน นิ่น เญย เตีย, อาหับ, เญย ฆะฮ้า ฆาง มี่ง วั้ว หฒั่น, เฒี้ยว ฮนั้ง น้าย นอ ก๊อง อาหับ.

26เฒี้ยว ก๊อง, ‘อะฮนอย เยีย ปวัด นาโบด เญย ฑย้าม เหธา นิ่น เญย ตอน บัว เญย ฑย้าม. เยีย ด่ง หาย ฒู้ง อ๋อย เยียม น้าย ฑง เดา วิ่น ปุน เม่ย.’ น้าย เซ เฒี้ยว ก๊อง เญย หว่า. อี้ หฒั่น เม่ย อ๋อย หฒุ หฒิว เฒี้ยว เญย หว่า เฒาะ นิ่น เญย เซย ฒอย เหฌี่ย น้าย ฑง เดา.”

27ยูดา เญย ฮู่ง, อาหัดยา, ปวัด น้าย เต๋ย สี่ ธ้วด, นิ่น เปย๋า หูง เจี๊ยน เบดฮักกาน มี่ง. เยฮู หฒุ่น เจี๊ยน มี่ง, เห่ว เจี๊ยน ก๊อง, “เลี่ยม น้าย เต้า ป๊วน ไต่ ม่าะ!” เถา กูอา เญย เจ๊า ฝาว เจี๋ย เญย ต๋อง, นิด อิบเลอัม, นิ่น บัว ฯฒฯ ป๊วน นิ่น เยียม วั้ว เธีย, มป่า นิ่น เปย๋า เถา เมกิดโด, เยียม วั้ว ไต่ หมี่ อ๊ะ.

28นิ่น เญย เจียน หล่ง เบ๊าะ จ๋า เญย ม์า-เธีย ทอ มี่ง เยลูซาเลม, หย่า หฒัง เจี๊ยน นิ่น กั้น เญย โฒ้ว, เหธา นิ่น เญย อง-ถาย หฒัง เจี๊ยน ดาวิด เญย ฒี่ง.

29(อาหับ เญย ตอน, โยลัม, โหฒว อิสะลาเอน เญย ฮู่ง เหฒียบ เยี้ยด หฮญัง วั้ว หฮญัง, อาหัดยา ฝาว เหว่ย โหฒว ยูดา เญย ฮู่ง.)

30เยฮู มี่ง เถา ยิดเลเอน, เยเซเบน ไฮ์ ลิ์ว น้าย เต๋ย สี่, นิ่น ฯฒฯ หล่ง เซ้ด ฑ้าด มฒีง, ฒอง นิ่น เญย มฆ้อง หย่า เยียม ฟง ม่วน หมั่ง ธ้วด.

31เยฮู เยี้ยด เปียะ ฒี่ง แก้ง วั้ว หฒั่น, เยเซเบน ก๊อง, “เม่ย ไต๋ เฒี้ยว เญย เมี่ยน หน่าย เต้า สิมลี อ้า! เม่ย เหว่ย แป้ง ออน เญย เจ๊า ต้าย ไฟ?”

32เยฮู เธา มฆ้อง หมั่ง วั้ว ฟง ม่วน ก๊อง, “หาย เต้า เยียม เยีย น้าย ปูง? ม่าย หาย เต้า?” ม่าย อี ปัว เต้า เจียน เยียม วั้ว ฟง ม่วน หมั่ง เจี๊ยน นิ่น.

33เยฮู ก๊อง, “เฒาะ นิ่น ฒอย เหฌี่ย ต้าย ม่าะ!” นิ่น บัว ฯฒฯ เฒาะ เยเซเบน ฒอย เหฌี่ย ต้าย. นิ่น เญย ฑย้าม ม่าย เต๋ย บย๊าบ มี่ง กั๊วะ เจี๊ยน หฌ่ง, กั๊วะ เจี๊ยน ม์า. ม์า หย่า ธ้าย เจี๊ยน นิ่น กู้ หงว่าย เจี๋ย.

34เยฮู เปียะ มี่ง หญั่น หย่า ฮบ. นิ่น ก๊อง, “ต้อ หน่าย เต้า หฒุ เหฒียว เญย มเซียะ ตอน มี่ง ปย๊บ, เหว่ย หฒุ นิ่น โหฒว ฮู่ง เญย เซียะ.”

35นิ่น บัว ธ้วด มี่ง ปย๊บ มป่า ขูง ล์อ ปวัด นิ่น เญย มฆ้อง-เคาะ เหธา เหฒา เหธา ปั์ว-ฒ้าง ฮนั้ง.

36นิ่น บัว หฑวน มี่ง บั๋ว เยฮู. เยฮู ก๊อง, “น้าย เซ เอย เฒี้ยว หล่ง นิ่น เญย โปว วั้ว เต้า ทิดบี เมี่ยน, เอลียา, ก๊อง เญย หว่า. นิ่น ก๊อง, ‘เยียม ยิดเลเอน เต่ย จู๊ ฒู้ง อ๋อย หญั่น เยเซเบน เญย อ๊อ.

37เยเซเบน เญย เซย อ๋อย หฒุ เยียม ยิดเลเอน เต่ย เญย เดา ฮนั้ง ไฆ้ นอ, เหว่ย ปุน เมี่ยน ไม้ ไฮ่ ก๊อง, “น้าย เซ เยเซเบน.”’”

← Chapter 8 Jump to: Chapter 10 →