Proverbs 12

Mien Bible (Thai Script) © Thailand Bible Society, 2007

← Chapter 11 Jump to: Chapter 13 →

1หาย เต้า อะเฮน้ย หมวัง ก๊อง-หฌาว เญย หว่า, วั้ว เต้า ฮนั้ม ว่วน ฒาง, มป่า หาย เต้า ฑอง ก๊อง-เหม เญย หว่า เซ หฮงง เญย.

2คู้ เมี่ยน ปุน เฒี้ยว อะเฮน้ย, มป่า ต๊า เอ๊าะ หฒะเอ๋ย เญย เมี่ยน, เฒี้ยว อ๋อย ตี่ง ฒุ์ย.

3โหฒว เอ๊าะ สี่ ไม้ เถง เมี่ยน เหลียบ ตุ๊ ว้วน, มป่า คู้ เมี่ยน เหลียบ ตุ๊ ว้วน ฮนั้ง เหฌี่ย ฑู่ง โด นอ.

4เฒี่ยง ฮ่อง เญย เอ๊า เซ ฮนั้ง โหฆ เญย นี้ง, มป่า ไม้ ฮิ้ว ตุ๊ ไญ้ เญย เอ๊า, เซ ฮนั้ง โหฒว ปุน นิ่น เญย โหฆ เญย บู๊ง ลัด.

5คู้ เมี่ยน ฮนั้ม ธ้วด เญย เจ๊า เซ แป้ง ฟิม เญย, มป่า เอ๊าะ เมี่ยน ธ่าง ล่าง เญย หว่า เซ กู๊ ไกว๋ เญย สี่.

6เอ๊าะ เมี่ยน เญย หว่า ฒั้ว เจี๊ยน ไต๋ เมี่ยน, มป่า เฮญี้ยว หฒีง เมี่ยน เญย ฑุ่ย ก๊อง เญย หว่า เหฌียว ตุ๊ เมี่ยน.

7เอ๊าะ เมี่ยน หฒุ เหมียด ฯฒฯ ป่า หมี่ อ๊ะ, มป่า คู้ เมี่ยน เญย เฒ้ย-ฟุน เยียม ตุ๊ ว้วน.

8เมี่ยน หฒิว นิ่น เญย ธง-เม่ง ตุ๊ เมี่ยน เธง, มป่า เฮญี้ยว เงา เฮญี้ยว ฌ้วด เญย เมี่ยน หฒุ เมี่ยน หมั่ง เผีย.

9เป๋น โพว-ทง เมี่ยน เหว่ย กั้น โหฒว กง ยู์ง แหม่ง, เซ เก้า หลง เธง กั้น โฮล มป่า ไม้ ม่าย หฮนาง หญั่น.

10คู้ เมี่ยน ค้อ-เลี่ยน นิ่น บัว เญย แซง-คู้ เญย แหม่ง, มป่า เอ๊าะ เมี่ยน ค้อ-เลี่ยน เญย เจ๊า เซ โตะ เญย.

11หาย เต้า ไล่ กั้น เญย ลี่ง เต่ย ตุ๊ ล่าง หฒิ หญั่น เป๊ว, มป่า หาย เต้า กัน ไม้ ลั่ม หล่ง เญย เจ๊า ฮนั้ม ไม้ ทง หาย หญู่ง.

12เอ๊าะ เมี่ยน อ๋อย หล่ง เมี่ยน หว่าย เมี่ยน ธ้าง ต้าย เญย กะน้าย, มป่า คู้ เมี่ยน เญย กอน เยียม ตุ๊ ว้วน.

13เอ๊าะ เมี่ยน เญย ฑุ่ย ก๊อง ต่อง เญย หว่า โหฒว โขว ฮลบ หฒุ นิ่น กั้น, มป่า คู้ เมี่ยน เปย๋า ดุ๊ด หฒุ โค้ว เญย เจ๊า.

14เมี่ยน เญย ฑุ่ย ก๊อง เญย หว่า ปุน กั้น ตุ๊ หลง ปวั๊ง เฮญี้ยว, เมี่ยน เญย ปั์ว โหฒว เญย กง หย่า วิ่น ปุน กั้น.

15เมี่ยน หฮงง เมี่ยน โหฒว เญย สี่ หฒิว กั้น เญย มฒีง หมั่ง โหฒว ตุ๊ หอบ, มป่า ธง-เม่ง เมี่ยน อะเฮน้ย หมวัง เมี่ยน หฌาว.

16เมี่ยน หฮงง เมี่ยน เยี้ยด เฉีย เจี์ย เลี่ยม เฒ่ย เฒียะ ตุ๊ อ๊ะ, มป่า ไกว เญย เมี่ยน หฒุ เมี่ยน ก๊อง โตะ หธ่อ ฮนั้ง ไม้ ไฮ์ นอ.

17หาย เต้า ก๊อง เหฒียบ ฒัวะ เญย หว่า ขูง ก๊อง ตุ๊ หฒีง เญย ฮนั้ง, มป่า โหฒว จ๊า ฒอง-เหฒง เญย เมี่ยน ก๊อง ก๊อง-แปะ ดั๊ว เญย หว่า.

18เมี่ยน ฑุ่ย เซี้ยบ ก๊อง หว่า ฮนั้ง หฑุ ด๊าว ป๊ะ เมี่ยน, มป่า ธง-เม่ง เมี่ยน เญย หว่า ไฮ่ ฮนั้ง เดีย หฒ่อ เมี่ยน.

19เมี่ยน ก๊อง เฒียน เญย หว่า, หว่า เหยียด ลิ์ว เยียม, มป่า เมี่ยน ก๊อง ก๊อง-แปะ เญย หว่า เซ เยียม ดุ ตั้ง ฮนั้ง.

20ต๊า เอ๊าะ หฒะเอ๋ย เญย เมี่ยน ม่าย ก๊อง-แปะ ดั๊ว เมี่ยน เญย เฮญี้ยว, มป่า ต๊า หลง เญย หฒะเอ๋ย วั้ว เต๋ย ตุ๊ เฌียน-โย่ว.

21คู้ เมี่ยน ไม้ หฒุ หาย หญู่ง เหฒะ หน่าน ห่อย, เอ๊าะ เมี่ยน ฒู้ง หฒุ เหฒะ หน่าน ธั้ม อ๊ะ.

22เมี่ยน เญย ฑุ่ย ก๊อง-แปะ, เฒี้ยว กั้ม เฑี้ย ไห่, มป่า เหฒียบ ฒัวะ เญย โหฒว วั้ว เต๋ย, นิ่น อะเฮน้ย ไห่.

23เมี่ยน ไกว เมี่ยน เกม เจี๊ยน นิ่น ม่าย เญย ว่วน ฒาง, มป่า เมี่ยน หฮงง เมี่ยน ฒุ่น ธ้วด หฮงง เญย สี่.

24เมี่ยน เจี้ยน เมี่ยน เญย ปั์ว ตุ๊ กุ๊น, มป่า เมี่ยน เหลว่ย เมี่ยน หฒุ อ๊าบ โหฒว กง.

25เมี่ยน เฮญี้ยว เฑ่า ฟ่าน ไฮ์ ฮนั้ง กะน้าย งัด เจี๊ยน เฮนี้ย เญย, มป่า เหยียด โจ๋ว หลง เญย หว่า ปุน นิ่น ไฮ์ เฮญี้ยว หลง.

26คู้ เมี่ยน ต้อ นิ่น เญย จวั่ง ล์าง เมี่ยน, มป่า เอ๊าะ เมี่ยน เญย เจ๊า ปุน เมี่ยน มี่ง ต่อง.

27เมี่ยน เหลว่ย เมี่ยน ไม้ มี่ง ป๊วน อ๊อ, เมี่ยน เจี้ยน เมี่ยน ตุ๊ จ๋าย เญย ฒิ่น ฒ่อย.

28เยียม โหฒว หอบ เญย เจ๊า ปุน เมี่ยน ม่าย แหม่ง เฒี่ยง, มป่า เอ๊าะ เญย เจ๊า ปุน เมี่ยน มี่ง หฒุ ไต่.

← Chapter 11 Jump to: Chapter 13 →