Proverbs 28

Mien Bible (Thai Script) © Thailand Bible Society, 2007

← Chapter 27 Jump to: Chapter 29 →

1เอ๊าะ เมี่ยน เปย๋า หย่า ไม้ ม่าย หาย เต้า หฒุ่น, มป่า คู้ เมี่ยน ต๊าม โฮล ฮนั้ง เซี่ยน.

2กั๊วะ หฒั่ง เมี่ยน ป์าม ฒุ์ย, กั๊วะ ม่าย โหฒว โฮล กุ๊น เญย เมี่ยน ธั้ม. มป่า ม่าย ไฮ่ เม่ง แปะ เญย เมี่ยน เหธา ม่าย ว่วน ฒาง เญย เมี่ยน นอ, กั๊วะ หฒั่ง ฯฒฯ เหลียบ ตุ๊ ว้วน เล่า.

3โหฒว โฮล เญย เมี่ยน เหฒย เมี่ยน จ่ม เมี่ยน, ฮนั้ง ต้ม บยู่ง เบ๊าะ แกง-หฒวัง หว่าย.

4กวั่ง เล์ย-หลัด เญย เมี่ยน เธง เอ๊าะ เมี่ยน, มป่า กัน เล์ย-หลัด เญย เมี่ยน เหธา เอ๊าะ เมี่ยน ต๋อย-เตก.

5เอ๊าะ เมี่ยน ไม้ เม่ง แปะ แป้ง ฟิม เญย เจ๊า, มป่า ท่าย เฒี้ยว วั้ว เต๋ย เม่ง แปะ เหฑ่ง.

6เมี่ยน จ่ม เมี่ยน เฮญี้ยว หฒีง เญย เยียม เซ เก้า หลง ปู๊ ล่ง ปู๊ ตั๊ง เญย ปุ๊ด-ฒ่อย เมี่ยน.

7กัน เล์ย-หลัด เญย เมี่ยน เป๋น ธง-เม่ง เญย ตอน, มป่า เมี่ยน เขา เม้า หญั่น เม้า ฮบ เญย เมี่ยน โหฒว ต่อย, ฯฒฯ ปุน นิ่น เญย เตีย หฒุ ไญ้.

8เมี่ยน หล่ง เหล่ย ฒิ่น ฮลัง เหว่ย ตุ๊ ฒิ่น ฒ่อย ธั้ม เจี๊ยน ฝาว, นิ่น เซียว ต้าย เหว่ย ปุน ไฮ่ ค้อ-เลี่ยน เมี่ยน จ่ม เมี่ยน วั้ว หญู่ง เมี่ยน.

9หาย เต้า ไม้ หมวัง เล์ย-หลัด, เลี่ยม นิ่น เต๋า เก๋า เญย หว่า เป๋น ทิน-ฮู่ง ฝุน โหยว ไห่, กั้ม เฑี้ย ไห่ เญย สี่.

10หาย เต้า ดั๊ว เฮญี้ยว หฒีง เญย เมี่ยน ยั่ง เอ๊าะ เญย เจ๊า, วั้ว เต้า ฯฒฯ ด๊อด เหฌี่ย นิ่น กั้น เญย ค้วด, มป่า ไม้ ม่าย ต๋อง เฆ่ม เญย เมี่ยน ตุ๊ หฑิบ หลง เญย ป่วน.

11ปุ๊ด-ฒ่อย เมี่ยน หฒิว นิ่น กั้น หมั่ง ม่าย ธง-เม่ง, มป่า ไฮ่ สัม ตุ๊ ธ้วด เญย เมี่ยน จ่ม เมี่ยน ไฮ่ หมั่ง ตุ๊ โถว.

12คู้ เมี่ยน ตุ๊ ฮี่ง, เมี่ยน โหฒว จอม, เหน่า หญิด, มป่า เอ๊าะ เมี่ยน เฮ้น ฝาว, เมี่ยน ฯฒฯ ปี๋ง.

13หาย เต้า ปวัง เจี๊ยน นิ่น กั้น เญย ฒุ์ย ไม้ ไฮ่ ตุ๊ หลง, มป่า หาย เต้า เหญี่ยม กั้น โหฒว ต่อง เญย ฒุ์ย แอ๋ง กวั่ง ฆอย, ฯฒฯ ตุ๊ ทิน-ฮู่ง ค้อ-เลี่ยน.

14เมี่ยน หฒั่นๆ ท่าย เฒี้ยว ฯฒฯ ตุ๊ ออน-เหลาะ, มป่า โหฒว เฮญี้ยว แหง่ง เญย เมี่ยน หฒุ เหฒะ หน่าน ห่อย.

15โหฒว โฮล เญย เอ๊าะ เมี่ยน กุ๊น เมี่ยน จ่ม เมี่ยน เซ ฮนั้ง เซี่ยน ฌุ่น นอ, ไฟ ฮนั้ง เจี๊ยบ เปียะ ต้าย ป์อง.

16โหฒว โฮล กุ๊น เมี่ยน เญย เมี่ยน ไม้ เปียะ เฮญี้ยว, นิ่น ฯฒฯ โหฒว โตะ, เหฒย เมี่ยน. มป่า หาย เต้า โหยว ไม้ แป้ง ฟิม เญย เหล่ย ฒิ่น ฯฒฯ ปุน นิ่น เฒี่ยง เญย ฮนอย-เหญียะ ด๊าว.

17หาย เต้า ไต๋ เมี่ยน ปุน ฑย้าม เหลี่ยว ธ้วด ฯฒฯ ต่อง ฒุ์ย, นิ่น อ๋อย หฒุ ปี๋ง เจี๊ยน เปย๋า เถา ไต่, ไม้ ตู๋ง ปุน หาย เต้า เถง นิ่น.

18โหฒว ตุ๊ หฒีง เญย เมี่ยน ตุ๊ เยียม หลง, มป่า หาย เต้า โหฒว สี่ เงา ฌ้วด ฯฒฯ เลี่ยม เฒ่ย ด๊อด เหฌี่ย ค้วด.

19หาย เต้า ไล่ กั้น เญย ลี่ง เต่ย ตุ๊ ล่าง หฒิ หญั่น เป๊ว, มป่า หาย เต้า กัน ไม้ ลั่ม หล่ง เญย เจ๊า ฯฒฯ หฒะเก้ง จ่ม อ๊ะ.

20เหฒียบ ฒัวะ เญย เมี่ยน ตุ๊ ฟุ ธั้ม, มป่า อ๋อย เซี้ยบๆ เญย ปุ๊ด ฒ่อย วั้ว หญู่ง เมี่ยน, ด่ง หาย ฒู้ง อ๋อย หฒุ ตี่ง ฒุ์ย.

21หมั่ง เมี่ยน เญย เฮมียน เบ่น สี่ เซ ไม้ เป๋น, มป่า เหว่ย ตุ๊ อ๋า หฮนาง เหฑีย เมี่ยน ไฮ่ โหฒว ต่อง.

22เมี่ยน ฌับ เมี่ยน อ๋อย เซี้ยบๆ เญย ปุ๊ด ฒ่อย, หย่า ไม้ ฮิ้ว ตุ๊ นิ่น กั้น อ๋อย หฒุ จ่ม.

23หาย เต้า ก๊อง-เหม เมี่ยน, ฆะฮ้า ตุ๊ เมี่ยน อะเฮน้ย เก้า ธั้ม ฑุ่ย หละไกว้ เธง เญย เมี่ยน.

24หาย เต้า หนิ่ม นิ่น เญย เตี๋ย หม่า เญย กะน้าย หย่า ก๊อง, “ฮนั้ง หน่าย เซ ไม้ ต่อง,” นิ่น เซ เหธา โหฒว เหมียด เญย เมี่ยน โหฒว ต่อย.

25เธย เญย เมี่ยน โธะ ธ้วด แฑง จ๋า เญย สี่, มป่า หาย เต้า เขา เฒี้ยว ฯฒฯ ตุ๊ หลง.

26หาย เต้า เขา นิ่น กั้น เญย เฮญี้ยว เซ หฮงง, มป่า หาย เต้า กัน ธง-เม่ง เญย เจ๊า ฯฒฯ ตุ๊ เหฌียว.

27หาย เต้า เฑีย เมี่ยน จ่ม เมี่ยน, วั้ว เต้า ฯฒฯ ไม้ ธา หาย หญู่ง, มป่า หาย เต้า ปวัง เจี๊ยน มฒีง ฮนั้ง ไม้ ปวัด นอ, ฯฒฯ หฒุ เมี่ยน ธั้ม เญย เหฒียว.

28เอ๊าะ เมี่ยน เฮ้น ฝาว, เมี่ยน ฯฒฯ ปี๋ง, มป่า เอ๊าะ เมี่ยน หฒุ เหมียด, คู้ เมี่ยน หฮยาง ธั้ม ฝาว.

← Chapter 27 Jump to: Chapter 29 →