Proverbs 20

Mien Bible (Thai Script) © Thailand Bible Society, 2007

← Chapter 19 Jump to: Chapter 21 →

1อะหงุ่น ติ๊ว โหฒว ปุน ล่าน ฮว้วด ล่าน, ติ๊ว-คู้ ปุน เมี่ยน แฑง จ๋า. ตะฟ่าน ฮบ ติ๊ว ฆวิน เญย เมี่ยน ไม้ ม่าย ธง-เม่ง.

2ฮู่ง เตี๋ย เญย กะเฉีย แป๊ด ธ้วด แฮะ เมี่ยน กั้ม เหฑีย เซ ฮนั้ง เซี่ยน ฌุ่น นอ. หาย เต้า ธัวะ นิ่น เฉีย เจี์ย ฒู้ง หฒุ กวั่ง แหม่ง.

3ซิ้ม ฆอย แฑง จ๋า เญย เจ๊า เซ ผุย ตุ๊ ท่าย เญย, มป่า เต้าๆ เมี่ยน หฮงง เมี่ยน อ๋อย แฑง จ๋า เซี้ยบ.

4เมี่ยน เหลว่ย เมี่ยน เถา ไล่ ลี่ง เญย เฒี่ยง โห่ ไม้ อ๋อย ไล่. เถา เซียว เญย เฒี่ยง โห่ นิ่น ล์อ มป่า ไม้ ปวัด ม่าย หาย หญู่ง.

5เยียม เมี่ยน เญย เฮญี้ยว ฮนั้ม เญย หฒะเอ๋ย ฮนั้ง ววม-โด นอ, มป่า ไฮ่ เม่ง แปะ เญย เมี่ยน ไฮ่ แปง ตุ๊ ธ้วด.

6เมี่ยน ธั้ม เญย ฒุ่น ก๊อง กั้น เหฒียบ ฒัวะ เญย, มป่า หาย เต้า หฒะเก้ง ไฮ่ ล์อ ปวัด เหฒียบ ฒัวะ เญย เมี่ยน?

7โหฒว ตุ๊ หฒีง เญย คู้ เมี่ยน, นิ่น เญย ตอน-เจว๊ย ตุ๊ ฟุ.

8ฮู่ง เฒว์ย เจี๊ยน เหว่ย เซี้ยม ฒุ์ย, นิ่น หล่ง มฒีง สัม ตุ๊ ธ้วด เอ๊าะ สี่.

9หาย เต้า ไฮ่ ก๊อง, “เยีย ปุน เยีย เญย เฮญี้ยว ธีง-เหฑ่ง เญย. เยีย ธีง-เหฑ่ง, เปย๋า ดุ๊ด เยีย เญย ฒุ์ย”?

10แหว่ง เมี่ยน เญย เหฑียง-ต้อ เหธา เผียน เญย กะน้าย-ฮลาว, อี หญู่ง ฒู้ง ฟี่ ฮนั้ง เญย, เฒี้ยว โหยว ไห่.

11เลี่ยม ฝุเจว๊ย หฒิว นิ่น โหฒว เญย สี่ ปุน ธีง นิ่น ฮนั้ง หาย นอ, เซ นิ่น โหฒว ธีง-เหฑ่ง, หอบ เญย เฒ์ย ไฟ ไม้ เฒ์ย.

12เซ เฒี้ยว ปุน เยีย บัว ม่าย มฒีง หมั่ง ตุ๊ ปวัด, ม่าย มน่อม หมวัง ตุ๊ ไฮ์.

13ไม้ ตู๋ง ขูง ฮนั้ม มฌ่อม, เหฑีย เม่ย อ๋อย หฒุ จ่ม อ๊ะ. อ๋อย หฒุ หนูง ฆอย มฒีง เม่ย ฯฒฯ ตุ๊ หญั่น เป๊ว.

14ม์าย กะน้าย เญย เมี่ยน ก๊อง, “ไม้ เป๋น, ไม้ เป๋น,” มป่า ม์าย มี่ง นิ่น ปู๋ง หว่า-เหมา อ๊ะ.

15ม่าย เจียม เหธา หละเปย๊ย-จ๋าย ธั้ม เญย, มป่า ม่าย ฑุ่ย ก๊อง ว่วน ฒาง เญย หว่า ฒู้ง เก้า จ๋าย.

16สี ก๊อง เมี่ยน เปว กะเหญี่ย เญย เมี่ยน, อ๋อย หฒุ เฒาะ แล์ง เปว เญย เมี่ยน เญย ลุย ต้าย ต๋อง. สี ก๊อง นิ่น เปว กั้น ฝีง เมี่ยน, ฒู้ง อ๋อย หฒุ เฒาะ นิ่น เญย ลุย ต๋อง เจี๊ยน.

17ดั๊ว ตุ๊ ต้าย เญย หญั่น ฮบ, เมี่ยน ไฮ์ กาม เญย, มป่า ฆะฮ้า นิ่น เญย ฑุ่ย ฮนั้ง ม่าย ซา-เฒียว ปวั๊ง เหฑ่ง.

18อ๋อย หฒุ ธ่าง ล่าง เหว่ย ต๊า ธ้วด หฒะเอ๋ย, อ๋อย เบ๊าะ ต้ม จ๋า อ๋อย หฒุ หล่ง ธง-เม่ง ต้อ.

19ก๊อง หว่า-ฮู้ เญย เมี่ยน ซีง เกม เจี๊ยน เญย สี่. ฮนั้ง หน่าย ไม้ ตู๋ง เหธา ฑุ่ย พยัด เญย เมี่ยน โหฒว ต่อย.

20สี ก๊อง เมี่ยน เหฒียว นิ่น เญย เตี๋ย หม่า, นิ่น ฯฒฯ ไต่ ฮนั้ง ตัง เยียม หฮมวัง เญย ต๋อง ไต่ นอ.

21เซี้ยบๆ ตุ๊ หฑิบ เญย กะน้าย ต้าย, เซ้ด เมว์ย ไม้ เถง หฑิบ เญย เมี่ยน ตุ๊ ฟุ-โหละ.

22ไม้ ตู๋ง ก๊อง, “เยีย อ๋อย หล่ง เอ๊าะ วิ่น เอ๊าะ.” อ๋อย หฒุ ฒั้ว เฒี้ยว, นิ่น ฯฒฯ เถง เม่ย.

23แหว่ง เมี่ยน เญย เหฑียง-ต้อ, เฒี้ยว โหยว ไห่. เผียน เญย เหฑียง ฟี่ ฮนั้ง เญย ไม้ เป๋น.

24ป้าม เมี่ยน เญย เหฒา-เบี่ย เซ เฒี้ยว ตี่ง ต้าย, เมี่ยน ฝู่ง ไฮ่ เม่ง แปะ กั้น เญย เจ๊า?

25เมี่ยน หละไกว้ ก๊อง, “น้าย เซ ธีง-เหฑ่ง เญย กะน้าย.” แล์ง ลิ์ว แหง่ง หว่า หธีง ฮนั้ม-หฑวน เป๋น โขว ฮลบ หฒุ กั้น.

26ธง-เม่ง เญย ฮู่ง เตี๋ย สัม ธ้วด หาย เต้า โหฒว เอ๊าะ, ฯฒฯ ตี่ง นิ่น บัว เญย ฒุ์ย หย่า ไม้ ค้อ-เลี่ยน.

27เมี่ยน เญย เฮญี้ยว เซ เฒี้ยว เญย ตัง, ฒ่า หมั่ง กะญั์ว โด เจี๋ย เญย ต๋อง.

28ฮู่ง เตี๋ย ค้อ-เลี่ยน เมี่ยน, เหฒียบ ฒัวะ เญย กุ๊น ฯฒฯ เปว เจี๊ยน นิ่น กั้น. โหฒว แป้ง ฟิม เญย เจ๊า หย่า เหลียบ ว้วน นิ่น เญย เหว่ย.

29เมี่ยน หลุน เมี่ยน เญย ชะ เป๋น นิ่น บัว เญย ฌัง-หล่าง, มป่า เมี่ยน โก๋ เมี่ยน เหฑว่ย เซ เหว่ย นิ่น บัว เญย บะเปยย แปะ.

30เบ๊าะ มุน หฒ่อ โหฒว เอ๊าะ เญย เมี่ยน, ฟิด มุน ปุน กะญั์ว โด เจี๋ย เญย ต๋อง ธีง-เหฑ่ง.

← Chapter 19 Jump to: Chapter 21 →