Proverbs 16

Mien Bible (Thai Script) © Thailand Bible Society, 2007

← Chapter 15 Jump to: Chapter 17 →

1เมี่ยน เยียม เฮญี้ยว ต๊า หฒะเอ๋ย, มป่า ฑุ่ย เตา เญย หว่า เซ เยียม เฒี้ยว ต้าย.

2เมี่ยน โหฒว เญย เหยียด ฒู้ง หฒิว กั้น เญย มฒีง หมั่ง เซ ธีง-เหฑ่ง เญย, มป่า เฒี้ยว ฒ่า หมั่ง เฮญี้ยว.

3อ๋อย หฒุ เฒาะ เม่ย โหฒว เญย หญู่งๆ จิว ปุน เฒี้ยว, เม่ย ต๊า เญย หฒะเอ๋ย ฯฒฯ เหลียบ ตุ๊ เจี์ย.

4เฒี้ยว เหฒย หญู่งๆ เหว่ย วั้ว หญู่ง เญย เอ๋ย เล์ย, เลี่ยม เอ๊าะ เมี่ยน เซ เหว่ย เหฒะ หน่าน เญย ฮนอย.

5ตะฟ่าน เฮญี้ยว เหมา เญย เมี่ยน เฒี้ยว โหยว ไห่, อ๋อย หฒุ ฮิ้ว ตี่ง, นิ่น ฒู้ง เปย๋า ไม้ ดุ๊ด, อ๋อย หฒุ ตี่ง ฒุ์ย.

6เมี่ยน เหฒียบ ฒัวะ กัน หลง ทิน-ฮู่ง ฯฒฯ ตุ๊ ฒุ์ย กวั่ง ลิ์ว, เมี่ยน ท่าย เฒี้ยว ฯฒฯ ตุ๊ ซิ้ม ฆอย เอ๊าะ สี่.

7สี ก๊อง เมี่ยน โหฒว เญย เจ๊า ปุน เฒี้ยว อะเฮน้ย, เฒี้ยว หย่า ปุน วั้ว เต้า เญย วิน-วั้ง เหธา นิ่น หอบ.

8ม่าย กะน้าย โหฒะ มป่า โหฒว ตุ๊ หฒีง, เซ เก้า หลง ม่าย กะน้าย ธั้ม มป่า โหฒว ไม้ แป้ง ฟิม.

9เมี่ยน เญย เฮญี้ยว ต๊า หฒะเอ๋ย ล์อ กั้น เญย เจ๊า, มป่า เฒี้ยว เยี์ยน นิ่น ยั่ง เญย เหฒา-เบี่ย.

10ฮู่ง เตี๋ย ก๊อง หว่า ม่าย ทิน-ฮู่ง เญย หัด ม์า. เซี้ยม ตี่ง เญย เฒี่ยง โห่ นิ่น เญย ฑุ่ย หย่า ไม้ ก๊อง ต่อง.

11หอบ เญย ทิน-แป้ง ตั๊ง เหธา เหฑียง เป๋น เฒี้ยว เญย, เยียม บัวะ เญย เหยียด ฒู้ง ตั๊ง-ต้อ, เหฑียง-ต้อ เซ นิ่น โหฒว เญย.

12ฮู่ง เตี๋ย โหฒว เอ๊าะ เซ กั้ม เฑี้ย ไห่ เญย สี่, เหว่ย หฒุ ฮู่ง เหว่ย ปั่ง แป้ง ฟิม เญย เล์ย เหลียบ ต้าย.

13เมี่ยน เญย ฑุ่ย ก๊อง เฒียน เญย หว่า ฮู่ง เตี๋ย อะเฮน้ย, นิ่น หย่า ฮนั้ม ก๊อง หฒีง เญย หว่า เญย เมี่ยน.

14ฮู่ง เตี๋ย เฉีย เจี์ย ปุน ธีง เมี่ยน อ๋อย หฒุ ไต่, มป่า ธง-เม่ง เมี่ยน ไฮ่ ต๊น ฮู่ง เตี๋ย เญย กะเฉีย.

15ฮู่ง เตี๋ย เญย เฮมียน ฌัง ฯฒฯ ปุน เมี่ยน ไฮ่ ตุ๊ แหม่ง เฒี่ยง, ฮู่ง เตี๋ย หอบ เฮญี้ยว เซ ฮนั้ง บ๋วน ต้อ เจี๊ยน ธุน-เกน เญย บยู่ง ต้าย นอ.

16ตุ๊ ธง-เม่ง เซ เก้า หลง เจี๋ย ตุ๊ เจียม, กิ๊น ตุ๊ ว่วน ฒาง เซ เก้า หลง กิ๊น ตุ๊ ญ่าน.

17เฮญี้ยว หฒีง เมี่ยน กัน เญย เจ๊า-โหล่ว ซิ้ม ฆอย เอ๊าะ สี่. หาย เต้า โก๋ว หลง กั้น เญย เจ๊า ฯฒฯ โก๋ว กั้น เญย แหม่ง.

18โหฒว เหมา เญย เจ๊า ต้อ เมี่ยน มี่ง หฒุ เหมียด, เฮญี้ยว เธง-โฮล ปุน เมี่ยน หฒุ ดอบ.

19เหญี่ยม กั้น โหฒว ไฝ เหธา เมี่ยน จ่ม เมี่ยน เยียม, เก้า หลง เฒาะ กว๊าด ต้าย เญย กะน้าย เหธา โหฒว เหมา เญย เมี่ยน ปุน ฆอย.

20หาย เต้า กัน หลง หฌาว เญย หว่า ฯฒฯ ตุ๊ หลง, หาย เต้า เขา เฒี้ยว หย่า ตุ๊ ออน-เหลาะ.

21ม่าย ธง-เม่ง เญย เฮญี้ยว, เมี่ยน เห่ว เป๋น เปียะ เฮญี้ยว เญย เมี่ยน. ก๊อง หว่า หลง, จา แปง ตุ๊ เมี่ยน.

22เหว่ย ม่าย ธง-เม่ง เญย เมี่ยน, ธง-เม่ง เป๋น เฒี่ยง แหม่ง เญย ววม-ฒี้ง, มป่า เมี่ยน หฮงง เมี่ยน หฒุ นิ่น บัว หฮงง เญย เจ๊า ตี่ง นิ่น บัว เญย ฒุ์ย.

23ธง-เม่ง เมี่ยน เญย เฮญี้ยว หฌาว นิ่น ก๊อง หว่า หอบ, นิ่น เญย ฑุ่ย ก๊อง เญย หว่า หย่า เก้า ไฮ่ แปง ตุ๊ เมี่ยน.

24ก๊อง หว่า หลง เซ ฮนั้ง เมว์ย-ต้อง กาม เญย, ปุน เฮญี้ยว คู่ เยียม, ซิน หย่า หวั่ง เสียง.

25ม่าย ติ้ว เจ๊า เมี่ยน ฝุน เซ หอบ เญย, มป่า น้าย ติ้ว เจ๊า เซ้ด เมว์ย ต้อ เมี่ยน มี่ง หฒุ ไต่.

26เมี่ยน โค้ว หลาย ซูง ฑุ่ย, นิ่น เญย ฑุ่ย หฒุ่น นิ่น มี่ง.

27ไม้ ลั่ม หล่ง เญย เมี่ยน ต๊า หฒะเอ๋ย โหฒว เอ๊าะ สี่, นิ่น ก๊อง เญย หว่า ฮนั้ง โต์ว ฒิ เมี่ยน.

28ปู๊ ล่ง ปู๊ ตั๊ง เญย เมี่ยน โธะ เมี่ยน แฑง จ๋า. ก๊อง หว่า-ฮู้ เญย เมี่ยน ห่อย โล์-แกง ต่อย ปุน ฆอย.

29เมี่ยน โตะ เมี่ยน หยัวะ นิ่น เญย จวั่ง ล์าง เมี่ยน, หย่า ต้อ นิ่น ยั่ง ไม้ เป๋น เญย เจ๊า.

30เมี่ยน หญับ มฒีง นิ่น ต๊า ดั๊ว เมี่ยน เญย หฒะเอ๋ย, หฆับ ฑุ่ย เหมย วั้ว เต้า ปุน เอ๊าะ สี่ ธ้วด ต้าย.

31บะเปยย แปะ เซ ฌัง-หล่าง เญย นี้ง, เซ เหว่ย เมี่ยน เยียม เสย หฒั่ง กัน โหฒว หอบ เญย เจ๊า ตุ๊ ต้าย.

32ไม้ เฉีย เจี์ย เซี้ยบ เญย เมี่ยน เซ เก้า หลง เฮ้น เญย เมี่ยน, ไฮ่ กุ๊น ตุ๊ กั้น เญย เฮญี้ยว เซ เก้า หลง เบ๊าะ ตุ๊ เหยียด นอม ฒี่ง.

33เมี่ยน ตี่ง แหม่ง หมั่ง, มป่า ตี่ง เญย เซ เยียม เฒี้ยว ต้าย.

← Chapter 15 Jump to: Chapter 17 →