Proverbs 7

Mien Bible (Thai Script) © Thailand Bible Society, 2007

← Chapter 6 Jump to: Chapter 8 →

1เยีย เญย ตอน อ่า, เม่ย อ๋อย หฒุ เอย เจี๊ยน เยีย เญย หว่า, อ๋อย หฒุ เฒาะ เยีย หัด เญย หว่า เซียว เจี๊ยน เม่ย เญย เฮญี้ยว.

2อ๋อย หฒุ เอย เจี๊ยน เยีย หัด เญย หว่า ฯฒฯ ตุ๊ แหม่ง เฒี่ยง, โก๋ว หลง เยีย หฌาว เญย หว่า ฮนั้ง โก๋ว หลง กั้น เญย มฒีง นอ,

3เฒาะ ต้าย โด้ เจี๊ยน เม่ย เญย ปั์ว-โด๊ะ, แอ๋ง เฟี้ย เจี๊ยน เม่ย เญย เฮญี้ยว กะญั์ว.

4อ๋อย หฒุ ก๊อง บั๋ว ธง-เม่ง, “เม่ย โหฒว เยีย เญย ต่อ,” หย่า เห่ว เม่ง แปะ เญย เจ๊า โหฒว เม่ย เญย โล์-แกง ต่อย.

5น้าย เต๋ย อี หญู่ง ฯฒฯ เถง เม่ย ซิ้ม ดุ๊ด เหฮยียน โหฆ เญย เอ๊า, หย่า เปย๋า ดุ๊ด ฑุ่ย บย่าง, ปวั้ง เลี่ยว เญย มเซียะ ตอน.

6เยีย เยียม เยีย เญย เปย๊า เญย ฟง ม่วน, หมั่ง ธ้วด ลาน เจี๊ยน เญย แพยง เญย ค้วด.

7เยีย ปวัด เยียม ไม้ ฮิ้ว หาย หญู่ง เญย หฒวัง เมี่ยน กะญั์ว, เยียม เมี่ยน หลุน เมี่ยน บุด๋ง, ม่าย เต้า เมี่ยน หลุน เมี่ยน ฮนั้ม ตุ๊ หฮงง ไห่.

8นิ่น กัน เจ๊า มี่ง เถา เปียะ วั้ว เต้า มเซียะ ตอน เญย เปย๊า เญย เจ๊า-หธา, แอ๋ง ยั่ง วั้ว ติ้ว เจ๊า มี่ง วั้ว เต้า เญย เปย๊า

9ต๋อย ลู่ง ม์าน-หฮมวัง, เหฑียม-ย่าง, เถา ลู่ง ม์วน หฒั่น หฮมวัง เญย เฒี่ยง โห่.

10หมั่ง ม่าะ! ม่าย เต้า มเซียะ ตอน ต้าย ปวั้ง นิ่น, นิ่น ฒอง ซิน ฮนั้ง หม่าย ซิน เญย มเซียะ ตอน หย่า ม่าย กู๊ ไกว๋ เญย เฮญี้ยว.

11นิ่น ลยา ไห่, ไม้ ฮิ้ว ตุ๊ ไญ้, นิ่น เญย เหฒา ขูง อ๋อย มี่ง, ไม้ เยียม ตี่ง เปย๊า.

12อ๊า ตั้ง เยียม จาย-ห่อง, อ๊า ตั้ง เยียม ต้ม หฒวัง หฒ่าม, เยียม นอมๆ เจ๊า-หธา นิ่น ปี๋ง เจี๊ยน ฒั้ว.

13นิ่น เฒาะ เจี๊ยน วั้ว เต้า เมี่ยน หลุน เมี่ยน ฒม นิ่น, เหธา นิ่น ก๊อง หย่า ไม้ ฮิ้ว ตุ๊ ไญ้. นิ่น ก๊อง,

14“เยีย ฝ่ง ห่อ เหฒี่ย เหว่ย จิว ทง เญย กะน้าย, อี้ ฮนอย เยีย หย่า จ๊าว ซูง เยีย แล์ง เจี๋ย เญย แหง่ง หว่า,

15เยีย ฯฒฯ ธ้วด ต้าย ล์อ เม่ย, ชะ ล์อ เม่ย, ฯฒฯ ล์อ ปวัด อ๊ะ.

16เยีย หล่ง เยียม อียิบ ต้าย เญย เหฒีย เซ้ด ล่าม่า เดีย-หม่วน, ติ่ม เหฒียง เยีย เญย โหธว.

17เยีย หล่ง มูหย่อ, อาโล เดีย-ดาง, เหธา เจี้ย โล่ว ด๊บ ปุน เยีย เญย โหธว ดาง.

18ต้าย ม่าะ! เยีย บัว เฒี่ยง ม์วน ฮนั้ม เถา เป๊ว, หย่า ฮนั้ม เถา ลู่ง ดอม. เยีย บัว ไฮ่ เฌียน-โย่ว เญย ล่าน ฮนั้ม ล่าน,

19เหว่ย หฒุ เยีย เญย โหฆ ไม้ เยียม เปย๊า. นิ่น ธ้วด เจ๊า มี่ง โก.

20นิ่น ต้อ เหยียด บัวะ ญ่าน มี่ง. เถา หฮลา-จุ้น นิ่น หธีง หฑวน.”

21น้าย เต้า เหฮยียน โหฆ เญย เอ๊า หล่ง หว่า-กาม หยัวะ นิ่น, หล่ง ฑุ่ย บย่าง แปง นิ่น มี่ง.

22วั้ว เต้า เมี่ยน หลุน เมี่ยน เลี่ยม เฒ่ย กัน เจี๊ยน นิ่น มี่ง อ๊ะ, ฮนั้ง ง่ง โก๊ว มี่ง หฒุ ไต๋ ไต่, ฮนั้ง ไฌ่ หฒุ ฮลาง ฮลบ เจี๊ยน เหฒียด เญย,

23ฒั้ว เถา ฟอง-ธัง ป๊วน เปียะ นิ่น เญย ฮลัน, ไฟ ฮนั้ง นอม เหนาะ เซี้ยบๆ เญย ได๋ เปียะ มู์ง กะญั์ว. นิ่น เลี่ยม ไม้ ฮิ้ว ตุ๊ กั้น อ๋อย หฒุ ห่อย แหม่ง.

24ตอน อ้า! อี้ หฒั่น อ๋อย หฒุ หมวัง เยีย ม่าะ! อ๋อย หฒุ หล่ง เฮญี้ยว หมวัง เยีย เญย ฑุ่ย ก๊อง เญย หว่า.

25ไม้ ตู๋ง ปุน เม่ย เญย เฮญี้ยว ฮวิน มี่ง วั้ว เต้า มเซียะ ตอน เญย เจ๊า, ไม้ ตู๋ง เปียะ นิ่น ดั๊ว เญย เจ๊า-โหล่ว.

26หฒุ วั้ว เต้า มเซียะ ตอน ห่อย เญย เมี่ยน ไม้ เฒ์ย โหฒะ, หฒุ นิ่น ไต๋ ไต่ เญย เมี่ยน หฒะเก้ง ธั้ม! ไห่.

27นิ่น เญย เปย๊า เยียม มี่ง เยี่ยม เกน เญย เจ๊า, เซ ต้อ เมี่ยน เหฌี่ย หฒุ ไต่ เญย เมี่ยน เยียม เญย ต๋อง.

← Chapter 6 Jump to: Chapter 8 →