Proverbs 24

Mien Bible (Thai Script) © Thailand Bible Society, 2007

← Chapter 23 Jump to: Chapter 25 →

1ไม้ ตู๋ง เหมว่ย เจี๊ยะ เอ๊าะ เมี่ยน, หย่า ไม้ ตู๋ง ม่าย เฮญี้ยว อ๋อย เหธา นิ่น บัว เยียม,

2เหว่ย หฒุ นิ่น บัว เญย เฮญี้ยว ต๊า โตะ เญย หฒะเอ๋ย. นิ่น บัว เญย ฑุ่ย ก๊อง เอ๊าะ ไห่ เญย หว่า.

3โหฒว เปย๊า อ๋อย หฒุ หล่ง ธง-เม่ง, หย่า หล่ง เม่ง แปะ เญย หฒะเอ๋ย เหลียบ ต้าย.

4ม่าย ว่วน ฒาง, เปย๊า ฯฒฯ ม่าย หลง ไห่, จ๋าย ไห่ เญย กะน้าย ปวั๊ง.

5ธง-เม่ง เมี่ยน ม่าย ชะ โฮล. ม่าย ว่วน ฒาง เญย เมี่ยน จา เฮ้น เจี๊ยน ฝาว,

6เหว่ย หฒุ เม่ย มี่ง เบ๊าะ จ๋า อ๋อย หฒุ ปั่ง ธง-เม่ง เญย หฒะเอ๋ย, ม่าย ธ่าง ล่าง เญย เมี่ยน ธั้ม ฯฒฯ ตุ๊ ฮี่ง เจี๋ย.

7ธง-เม่ง เญย เจ๊า เหว่ย เมี่ยน หฮงง เมี่ยน ปะหละ ฮลัง ไห่. เยียม ฒี่ง แก้ง นิ่น ไม้ ก๊อง หาย หญู่ง อ๊ะ.

8ต๊า หฒะเอ๋ย โหฒว เอ๊าะ สี่ วั้ว เต้า ฯฒฯ ตุ๊ เมี่ยน เห่ว ธัวะ สี่ เมี่ยน.

9ฮนั้ม ธ้วด โหฒว หฮงง เญย สี่ เป๋น ฒุ์ย. เมี่ยน หย่า โหยว ฮว้วด เมี่ยน เญย เมี่ยน.

10สี ก๊อง เม่ย หฒุ สี่ เญย ฮนอย เม่ย เฮญี้ยว เมา, เม่ย เญย ชะ ไฝ ไห่.

11อ๋อย หฒุ เหฌียว ต้อ มี่ง ไต๋ ไต่ เญย เมี่ยน, หย่า ตั๊ง เจี๊ยน หลอบๆ ดอบๆ เญย มี่ง หฒุ ไต๋ ไต่ วั้ว เต๋ย.

12สี ก๊อง เม่ย ก๊อง, “น้าย เต๋ย สี่ เยีย บัว ไม้ ฮิ้ว,” ทิน-ฮู่ง, ต้ง เฑียง เมี่ยน เญย เฮญี้ยว วั้ว เต้า, หมั่ง ตุ๊ ปวัด ไม้ เฒ์ย? โก๋ว เม่ย วั้ว เต้า ฮิ้ว ตุ๊ เม่ย เญย เฮญี้ยว ไม้ เฒ์ย? นิ่น หย่า ไม้ เฒ์ย อ๋อย หฒิว เมี่ยน โหฒว เญย วิ่น ปุน นิ่น บัว ไฟ?

13เยีย เญย ตอน อ้า! กุ๊น หญั่น เมว์ย-ต้อง เหว่ย หฒุ เมว์ย-ต้อง เซ หลง ไห่. หญั่น เมว์ย-เผง เดี๊ยบ เหฌี่ย เญย เมว์ย-ต้อง ไฮ์ เหมวย โต่ กาม.

14อ๋อย หฒุ ฮิ้ว ตุ๊ เม่ย เญย เฮญี้ยว ตุ๊ ธง-เม่ง เซ ฮนั้ง วั้ว นอ. สี ก๊อง เม่ย ล์อ ปวัด ธง-เม่ง, เม่ย ฆะฮ้า ฮี้ง เญย เจ๊า ฯฒฯ ม่าย ลั่ม ฮนั้ม เญย, หย่า ไม้ หฒุ จั๊ม กวั่ง.

15ไม้ ตู๋ง บ๊าบ เจี๊ยน ฒั้ว ฮนั้ง เอ๊าะ เมี่ยน ฒั้ว เจี๊ยน ห่อย คู้ เมี่ยน เญย เปย๊า. ไม้ ตู๋ง โหฒว โตะ, โหฒว หว่าย นิ่น เยียม เญย ต๋อง,

16เหว่ย หฒุ คู้ เมี่ยน ดอบ เสี่ย หฑุ่น หธ่อ ไฮ่ เจี์ย ซิน ต้าย, มป่า เอ๊าะ เมี่ยน ฒู้ง หฒุ เหฒะ หน่าน เบี๊ยน เหฌี่ย.

17เม่ย เญย วิน-วั้ง ดอบ, เม่ย ไม้ ตู๋ง อะเฮน้ย. นิ่น ดิ๊ หฒุ ดอบ, ไม้ ตู๋ง ออน-เหลาะ.

18เหฑีย เฒี้ยว ปวัด ฯฒฯ ไม้ อะเฮน้ย, หย่า ฮวิน มี่ง กั้น ปูง, ไม้ เฉีย เจี์ย วิน-วั้ง.

19ไม้ ตู๋ง เหว่ย เอ๊าะ เมี่ยน กว๋า เฮญี้ยว, หย่า ไม้ ตู๋ง เหมว่ย เจี๊ยะ เมี่ยน หว่าย เมี่ยน,

20เหว่ย หฒุ เอ๊าะ เมี่ยน ไม้ ม่าย โฮ์ ฆาง. เมี่ยน หว่าย เมี่ยน เญย ตัง หย่า อ๋อย หฒุ ปย๊ม ไต่.

21เยีย เญย ตอน อ่า, อ๋อย หฒุ ท่าย เฒี้ยว หย่า ท่าย ฮู่ง เตี๋ย, ไม้ ตู๋ง แหง่ง ไม้ หมวัง นิ่น บัว อี เต้า เญย หว่า,

22เหว่ย หฒุ ม่าย เหฒะ หน่าน อ๋อย เลี่ยม เฒ่ย เยียม นิ่น บัว อี เต้า ต้าย. หาย เต้า ฮิ้ว ตุ๊ นิ่น บัว อี เต้า อ๋อย ฮนั้ง หาย นอ ปุน เมี่ยน หฒุ ป่าย?

23แอ๋ง เจี๋ย มี่ง ม่าย ธง-เม่ง เมี่ยน ก๊อง เญย หว่า. ตุ๋น สี่ เญย เฒี่ยง โห่ หมั่ง เมี่ยน เญย เฮมียน เซ ไม้ หอบ.

24หาย เต้า ก๊อง บั๋ว เอ๊าะ เมี่ยน, “เม่ย ไม้ ม่าย ต่อง เญย ต๋อง,” วั้ว เต้า ฯฒฯ หฒุ หม่าน ฝีง เหฒียว, หฒุ หม่าน กั๊วะ เมี่ยน โหยว.

25มป่า หาย เต้า ปุน นิ่น หฒุ ตี่ง ฒุ์ย, วั้ว เต้า ฯฒฯ อะเฮน้ย, หย่า อ๋อย ตุ๊ หลง ไห่ เญย ฟุ.

26หาย เต้า หล่ง เฒียน เญย หว่า เตา, ปุน ธีง เป๋น เฒียน โล์-แกง ต่อย.

27อ๋อย หฒุ โหฒว เหฒียง กะเหญี่ย เญย กง ด่าง, หลิ่ว เล์ย เหฒียง เม่ย เญย ลี่ง เต่ย, ฆะฮ้า หธีง ต้าย ก๊ม เปย๊า.

28ไม้ ตู๋ง โหฒว ไม้ ม่าย กอน-แป๋ง เญย ฒอง-เหฒง ห่อย จวั่ง ล์าง เมี่ยน, หย่า ไม้ ตู๋ง หล่ง เม่ย เญย ฑุ่ย ดั๊ว เมี่ยน.

29ไม้ ตู๋ง ก๊อง, “เยีย อ๋อย โหฒว ปุน นิ่น ฮนั้ง นิ่น โหฒว ปุน เยีย. หฒิว นิ่น โหฒว เญย เยีย อ๋อย วิ่น ปุน นิ่น.”

30เยีย เจี๋ย เมี่ยน เหลว่ย เมี่ยน เญย เหลียง-เด่ย, เจี๋ย เมี่ยน หฮงง เมี่ยน เญย อะหงุ่น หฮวีง,

31หมั่ง ม่าะ! ม่าย ฌิ้ม ธ้วด ต้าย ปวั๊ง เดา-เป้ย, ม่าย ฌิ้ม เญย เมี้ย บย์อง ปวั๊ง, เว่ย เจี๊ยน เญย หละเปย๊ย-หลาด หย่า บาง.

32เยีย เหยียด ปิ่น หมั่ง, เหยียด ปิ่น ฮนั้ม, เยีย หมั่ง ลิ์ว ฯฒฯ ตุ๊ โหะ ฮิ้ว เหยียด หญู่ง อ๊ะ,

33แอ๋ง เปว๋ย ตั้ง, มฌ่อม ตั้ง, ชบ เจี๊ยน ปั์ว มฌ่อม ตะฮงัด ตั้ง,

34จ่ม เญย เจ๊า ฯฒฯ เลี่ยม เฒ่ย เถา ฮนั้ง จั๋น-หฒะ. ตั๋ง-ต๋น เญย เจ๊า อ๋อย ต้าย ฮนั้ง เมี่ยน ต้อ เจี๊ยน หวัวะ กิ่น ต้าย เถา.

← Chapter 23 Jump to: Chapter 25 →