Proverbs 13

Jinghpaw Common Language Bible © Bible Society of Myanmar, 2009

← Chapter 12 Jump to: Chapter 14 →

1Hpaji rawng ai kasha gaw shi a kawa shi hpe shading sharai ai shaloi, myit maju jung nna madat mara nga ti mung, myit tsaw myit dap rawng ai wa gaw shi shut ai lam hpe galoi mung n chye yin la nga ai.

2Mai kaja ai masha ni gaw shanhte tsun shaga ai n-gup aga a majaw, shagrau hkam la nga ma ai; masu hkalem sha ai ni chyawm gaw kashun kashe du daw sai hkaw amu galaw na matu shat kawsi ai zawn kawsi nga ma ai.

3Nang tsun shaga ai ga hpe sadi maja nna, na a asak hpe makawp maga nga u; abrawp abrap nga nna tsun shaga ai wa gaw, shi a hkum hpe jahten sharun nga ai.

4Lagawn ai masha wa gaw lama mi hpe gade wa marit nga ti mung, dai hpe galoi mung lu la na wu ai n rai; shakut shaja ai wa chyawm gaw shi ra ai lam hpa hpe rai ti mung, lu la na ra ai.

5Myit malang ai masha ni gaw masu magaw ga ni hpe n dawng nga ma ai; tara n lang ai masha ni a n-gup aga ni gaw kaya kahpa hte sari jahpoi ai hkrum nga ma ai.

6Ding hpring ai lam gaw mara n kap ai ni hpe makawp maga ya nga ai; tara n lang ai lam chyawm gaw yubak kap ai ni a sum kadawng lam rai nga ai.

7Masha nkau mi gaw sut su ai wa zawn zawn rai nga ma ti mung, shanhte hpa n lu nga ma ai; masha nkau mi matsan ai wa zawn zawn rai nga ma ti mung, sali wunli law law hpe madu tawn lu ma ai.

8Sut su ai masha gaw shi a gumhpraw hte shi a asak hpe hkye hkrang la nga ai; matsan mayan re ai masha wa hpe chyawm gaw kadai mung jahkrit shama ai lam n galaw nga ai.

9Ding hpring ai ni htoi tu kabrim ai nhtoi zawn rai nga nna; tara n lang ai ni gaw nbung ahpawt nna, si wa hkyen ai pyengdin wan hte bung nga ai.

10Myit tsaw myit dap ai lam gaw ru yak tsin-yam hta lai nna, hpa hpe mung shabyin ya lu ai n rai; hpaji jaw ya na matu hpyi lajin ai lam gaw hpaji grau rawng nga ai.

11Na a sut gan hpe grau loi ai hku nang lu la magang, grau lawan ai hku dai hpe nang jasum kau na ra ai; grau shakut sharang let tam mahkawng ai sut gan chyawm gaw grau nna nang hta law htam wa na ra ai.

12Myit mada ai lam htum mat yang, myit masin shadaw kau ai hkrum nga ai; myit mada ai hte maren, byin wa ai shaloi, nang hpe kabu gara ai myit hte jahpring ya nga ai.

13Nang lama, mai kaja ai hpaji jaw ga hpe, ningdang kau ai rai yang, ru yak tsin-yam hkrum na ndai; nang dai hta hkan sa ai rai yang chyawm, gaw nang shim nga na ndai.

14Hpaji rawng ai wa a sharin shaga ai ga gaw asak hka hpawk rai nga ai; nang asak sum lu ai ru yak kyindut hpe hkrum wa ai shaloi, dai kaw nna lawt lu na matu, dai ni gaw nang hpe karum ya na ra ai.

15Zai byeng-ya hpaji gaw hkungga lara ai hpe lu la shangun ti mung; kam hpa n lu ai ni chyawm gaw hten byak na lam de sa wa nga ma ai.

16Htauli htaula myit rawng ai masha ni gaw shanhte amu garai n galaw hpang yang, tut nawng e, myit sawn yu nga ma ai; angawk ai masha ni chyawm gaw shanhte a n chye n chyang ai lam hpe tsun shana nga ma ai.

17Kam hpa n lu ai kasa ni gaw ru yak tsin-yam hpe shabyin nga ma ai; kam hpa lu ai masha ni gaw ngwi pyaw sim sa lam hpe shabyin shatai ya nga ma ai.

18Sharin achyin n hkam ai wa gaw matsan mayan hte kaya kahpa hkrum na ra ai; shading sharai ai ga hpe madat mara ai wa chyawm gaw hkungga lara ai hpe hkam la na ra ai.

19Nang ra marit ai lam hpe hkam la lu ai gaw gade wa mai kaja nga a hka! Angawk ai masha ni gaw n hkru ai amu kaw nna kayin mat wa na matu, ningdang nga ma ai.

20Hpaji rawng ai wa hte kanawn nga u, shaloi, nang hpaji rawng wa na ra ai; angawk ai masha ni hte nang jinghku galaw ai rai yang, hten byak ai nang hkrum na ra ai.

21Ruyak tsin-yam gaw yubak kap ai masha ni kaw, shara shagu hta hkan nang nga ai; ding hpring ai masha ni chyawm gaw mai kaja ai arai hpe hkam la lu na mara ai.

22Mai kaja ai masha wa gaw shi a kashu ni a matu sut gan sali wunli ngam da ya na ra ai; rai ti mung, yubak kap ai wa a sut gan chyawm gaw ding hpring ai masha ni hpang de du mat na ra ai.

23Hkauna na hkam ni gaw matsan mayan masha ni a matu, malu masha nhpaw n-ya shapraw ya lu nga ai; n tara ai masha ni chyawm gaw dai yi hpe n galaw lu hkra, shingdang tawn nga ai.

24Na a kasha hpe nang ari n jaw ai rai yang, nang shi hpe tsaw ra nga ai n rai; nang shi hpe tsaw ra ai rai yang, shi hpe nang shading sharai nga ai.

25Ding hpring ai masha ni hkru hkru kat kat sha lu nga ma ai; tara n lang ai ni gaw tut nawng e, kawsi nga ma ai.

← Chapter 12 Jump to: Chapter 14 →