Proverbs 27

Jinghpaw Common Language Bible © Bible Society of Myanmar, 2009

← Chapter 26 Jump to: Chapter 28 →

1Ya jahkring mi hta pyi, hpa byin wa na nang n chye nga ai majaw, hpawt ni na lam hpe galoi mung hkum grang dakat nga et.

2Na a n-gup hte nang nan hpe hkum shakawn, masha ni shakawn mu ga, na a nten hte nang nan hpe hkum shagrau tsasam ni shagrau mu ga.

3Nlung gaw li nga ai, zaibru gaw nak nga ai; rai tim angawk ai wa e shabyin ai ru tsang gaw dai yan hta grau li nga ai.

4Pawt sindawng ai gaw matse ai hte jahten shabya nga ai, rai tim manawn masham ai a jahten sharun ai gaw shadawn n mai hkra grau sawng nga ai.

5Masha langai mi hpe dan dan leng leng sharai shading ya ai gaw, ndai wa nye a ntsa e myit kaja hpa mung n rawng ai ngu myit kau shangun na hta grau kaja nga ai.

6Jinghku ni gaw nang hpe machyi shangun tim pyi, na a ntsa e kaja ai myit rawng nga ai, rai ti mung; gumlau hpyen wa na a lahpa sa ahpum ai shaloi dai hpe maja u!

7Nang hkru nga yang, lagat ntsin hpe pyi, nang n kam yu ti mung; nang kawsi kyet wa ai shaloi, hka ai lusha pyi gaw dwi nga ai.

8Dum nta kaw nna sumtsan de hkawm mat wa ai wa gaw shi a tsip kaw nna pyen hkawm mat wa ai u zawn rai nga ai.

9Manam pyaw ai sau hte manam hawm bat gaw nang hpe myit shapyaw lu ti mung, ru yak tsin-yam tsindam gaw na a myit a sim sa lam hpe jahten kau ya nga ai.

10Na a jinghku ni hte na nwa a jinghku ni hpe hkum malap kau et, nang ru yak hkrum nga ai rai yang, nang hpe karum la na matu na a hpu nau wa kaw karum, hkum sa hpyi et; Makau e sha nga nga ai htingbu wa gaw tsan tsan e nga ai kahpu kanau hta, nang hpe grau lu karum nga ai.

11Sha e, hpaji rawng nga u; shaloi ngai kabu gara lu na ring ngai; ngai hpe mara tam ai kadai hpe rai tim, mahtai ngai jaw lu na nngai.

12Htauli htaula myit rawng ai masha ni gaw du wa na ruyak jam jau lam hpe tau chye nna, dai hpe koi kau lu ti mung; nyan tang ai wa chyawm gaw dai de lup rai shang mat wa nna hpang e she shut dum nga ai.

13Tsasam wa a hka hpe pahkam hkam ai wa kadai rai tim, myit n su nga ai rai nna, bai nhtang jaw lu na matu, shi lu ai arai ni hpe pahkam hkam tawn shangun na ging nga ai.

14Jahpawt jau jau na a jinghku wa hpe marawn shakram let jasu sharawt ai gaw shi hpe matsa ai hte maren rai nga ai.

15Aput angun nga nna azep ai nta madu jan gaw marang htu ai shani e, hte, hte, hte, nga nna kahte hkrat ai marang si hte bung nga ai.

16Nang shi hpe kaning rai shazim lu na rai ta? Nang gaw nbung hpe jahkring yu nni? Shing n rai, sau latup mi hpe magra da yu a ni?

17Hpri hpe hpri hte shadai la lu ai zawn, masha a nyan hpe masha shada shalet la lu nga ai.

18Lakum hpun hpe yu lajang u, shaloi nang lakum si sha lu na ra ai; shi a madu hpe bau sin ai mu gun kaja wa gaw, shagrau sha-a ai hkam la na ra ai.

19Hka hta nang mu lu ai shingna gaw, na a myi man rai nga ai; na a myit kraw lawang hta nang mu lu ai shingna gaw nang hkum nan rai nga ai.

20Masha a ra marit ai gaw Katsan ga zawn rai nga nna, dai hta nga shara tut nawng e, law law nga nga ai.

21Gumhpraw hte ja hpe wan hte chyam dinglik ai zawn, masha ni hpe shakawn ga hte chyam dinglik nga ai.

22Angawk ai wa hpe si na daram nang gayat tim shi a angawk ai myit hpe nang gayat shapraw kau ya lu nga ai n rai.

23Na a sagu hte yam nga hpung ni hpe nang bau maka lu ai daram bau rem nga u.

24Hpa majaw nga yang, sut gan gaw tut e grin nga lu ai n rai, amyu baw ni pyi, htani htana grin nga lu ai n rai.

25Wushat hpe dan la ngut ai hpang, wushat ningnan naw tu wa nga yang, bum nhkrem na tsing ni hpe dan lu ndai.

26Na a sagu ni kaw na sagu mun hte hpun palawng nang galaw la lu nga ai hte na a bainam nkau mi hpe dut la ai gumhpraw hte lamu ga lu mari la nga ndai.

27Ngam ai bainam ni kaw na, nang hte na a dinghku masha ni hte na a shangun ma numsha ni a matu mung, bainam chyu jaw ya na ra ai.

← Chapter 26 Jump to: Chapter 28 →