Proverbs 19

Jinghpaw Common Language Bible © Bible Society of Myanmar, 2009

← Chapter 18 Jump to: Chapter 20 →

1Hkalem hkalau ga tsun nna angawk ai wa hta, myit malang nna matsan mayan rai nga na gaw, grau nna kaja nga ai.

2Myit katu sharawng ai lam hta hpaji byeng-ya n lawm yang, n kaja nga ai; n hkam sharang lu ai gaw ru yak tsin-yam de woi bang wa na ra ai.

3Masha nkau mi shanhte hkum nan a angawk angak ai amu ni a majaw, jahten sharun la nga ma ai; shaloi, dai Madu hpe mara shagun nga ai.

4Sut su ai masha ni gaw tut nawng e jinghku jingyu ningnan mu nga ma ai; matsan ai wa chyawm gaw shi a n law la ai jinghku ni pyi, shi hpe kau da nga ma ai.

5Tara rung hta e, nang n teng n man ai sakse ga tsun yang, nang ari jaw ai hkrum na rin dai; dai hta na nang lawt lu na n rai.

6Kadai mung ahkyak ai masha hta myi man pa lu hkra, shakut nga ai; kadai mung myi man tau ya ai wa hpe jinghku re ngu tsun nga ai.

7Matsan mayan re ai masha wa a kahpu kanau ni pyi, shi hpe n ra sharawng ma ai; shi hta manaw manang n lu ai gaw mauhpa n rai. Shi gade wa shakut shaja nna hkan tam tim, kadai hpe mung n lu hku la nga ai.

8Nang dang lu ai lam yawng hte hpe sharin la nna na hkum hpe nang karum la u; shaloi, nang sharin hkam la ai lam hpe dum wa nna, ngamu ngamai wa na rin dai.

9Kadai mung, tara rung hta masu sakse hkam ai wa gaw mara ari jaw ai kaw nna lawt lu ai n rai; shi ari hkrum na sha rai sai.

10Angawk ai ni gaw hkik hkam ai sut gan hta n mai ningngai nga ai; mayam ni mung du ni a ntsa e, n mai up hkang nga ai.

11Nang hta htauli htaula myit rawng ai rai yang na a sindawng ai masin hpe hkang lu na ra ai; marai langai ngai nang hpe shut ai shaloi, dai hpe nang yu shalai kau ya yang, dai gaw na a arawng rai nga ai.

12Hkawhkam wa a masin kahtet ai gaw hkanghkyi shabam ai zawn rai nga ai; shi a chyeju myit gaw marang nhpaw hte bung nga ai.

13Angawk ai ma gaw shi a kawa hpe hten za shangun lu nga ai; aput angun ai madu jan gaw hte-hte- nga nna kahte hkrat ai hka hte bung nga ai.

14Masha gaw shi a kanu kawa ni kaw na, nta hte sut gan sali wunli hpe hkam la lu nga ai; dai Madu chyu sha shi hpe htauli htaula myit rawng ai madu jan jaw ya lu nga ai.

15Lagawn nga u, yup pyaw nga u; rai ti mung, nang kawsi hpang gara hkrum na ra ai.

16Karai Kasang a hkang da ai tara ni hpe hkan nga u; shaloi, nang asak galu na rin dai; dai lam ni hpe, nang n sawn n sang di hprai kau ai rai yang, nang si wa na rin dai.

17Matsan mayan wa hpe nang jaw ai gaw dai Madu hpe hkoi ya ai hte bung nga ai rai nna; dai Madu gaw nang hpe bai htang jaw na ra ai.

18Shanhte gaw sharin la na prat naw ram nga ai aten hta, na a nsha ni hpe hkang sharin u; nang dai lam hpe n hkan galaw ai rai yang shanhte hpe hten byak shangun na ndai.

19Marai langai ngai myit kahtet ai rai yang, de a akyu hpe shi hkam la na ra ai; Nang shi hpe ru yak shoihpa kata kaw nna kalang mi shapraw la ai rai yang, nang dai hpe kalang mi bai kahtap galaw ra na ndai.

20Hpaji jaw ai ga hpe madat nna sharin hkam la na matu nang sharawng awng nga n yang gaw, lani mi na aten hta, nang hpaji rawng ai masha tai wa na rin dai.

21Masha gaw lam magup hpe maw mawn mai nga ai; Madu a myit ra ai hte maren sha byin wa na ra ai.

22Lawhpa marin marit ai gaw kaya kahpa amu rai nga ai; masu magaw ga tsun ai ni hta, matsan mayam masha ni gaw grau nna kaja nga ma ai.

23Dai Madu a ga madat mara nga u, shaloi, nang asak aprat ugut gu hkra nga lu na ra ai; myit pyaw myit hkut ai hte hkrithpa aru ara kaw na shim lu na ra ai.

24Ladu lai lagawn ai masha nkau mi gaw shanhte a n-gup kata de, lusha hta bang na pyi n kam nga ma ai.

25Myit tsaw myit dap ai gaw ari jaw ai hkrum sha ra nga ai, shaloi n chye n chyang ai masha ni gaw dai lam hpe sharin la lu na ra ai; nang hpaji rawng ai wa rai yang chyawm gaw shading sharai hkam ai shaloi, nang sharin la na rin dai.

26Kaya kahpa hte sari jahpoi ya ai wa chyu sha, shi a kawa hpe n kaw n law di nna shi a kanu hpe mung nta kaw nna shaden kau nga ai.

27Sha e, sharin hkam la ai lam hpe jahkring kau ai shaloi, nang chye da sai lam ni hpe pyi, hkring mi rai jang, dai hpe n hkan mat na ndai.

28Sakse hkam ai wa gaw marai langai ngai hpe machyi shangun na ngu, myit daw dan ai rai yang, teng man ai tara daw dan lam n byin lu nga ai. Tara n lang ai masha ni gaw n hkru ai namchyim hpe tsaw ra nga ma ai.

29Rai dum nna angawk ai wa gaw anu gayat ai hpe teng teng hkam la na rai nga ai.

← Chapter 18 Jump to: Chapter 20 →