Proverbs 3

Jinghpaw Common Language Bible © Bible Society of Myanmar, 2009

← Chapter 2 Jump to: Chapter 4 →

1Ngai nang hpe sharin shaga ai ga hpe hkum malap kau et; nang hkan galaw na matu, ngai matsun ai ga hpe mung, tut nawng adum nga u.

2Nye a sharin shaga ai ga gaw nang hpe aprat galu shangun nna, ngamu ngamai ai asak hpe jaw ya na ra ai.

3Sadi dung ai hte kangka ai myit hpe galoi mung hkum kau da nga et; dai hpe na a du hta gali da nna, na a myit masin lungpa hta ka da u.

4Ndai lam hpe nang hkan galaw ai rai yang, Karai Kasang mung, shinggyim masha mung, nang hpe ra sharawng na mara ai.

5Dai Madu hpe na a myit masin mahkra hte kam hpa nga u. Nang chye dum ai hta, galoi mung hkum shamyet shanat nga et.

6Nang galaw ai lam shagu hte hta, dai Madu hpe dum nga u; shing rai yang, shi gaw ding man ai lam, nang hpe madun dan na ra ai.

7Nang chye ai madang hta jan nna, hpaji hkum rawng dum et; dai Madu hpe temsi rai nna madat mara nga let, shut hpyit ai amu galaw na matu, ningdang kau u.

8Nang dai hku galaw ai rai yang, dai na a machyi ka-ut nga ai ana ni hpe shazim kau ya nna, nma ni hpe shamai ya ai tsi hkrung tsi nan kaja zawn rai na ra ai.

9Na a lamu ga hta na pru ai sut gan yawng mayawng hta na kaja htum ai ni hpe hkungga shatai nna, dai Madu hpe shagrau sha-a u.

10Nang dai hku hkan galaw shatup ai rai yang, na a mam dum ni hta mam nsi ni hte hpring chyat wa nna na a dum hta n dang bang mat hkra law la ai sabyi ni hpe lu la na ra ai.

11Sha e, Nang hpe dai Madu shading sharai ai shaloi, dai hpe atsawm sha madat la nna sadi jaw ai zawn, dai hpe hkap la u.

12Kanu yan kawa gaw shan sharawng awng ai kasha hpe sharin shaga ai zawn, dai Madu gaw shi hpe tsaw ra ai ni hpe sharin shaga nga ai.

13Hpaji chye wa nna, chye na hkawn hkrang ai nyan lu la ai masha wa gaw a nga ai.

14Hpaji hta rawng ai amyat gaw gumhpraw amyat hta grau nga ai hte, dai gaw na a matu, ja hta grau nna manu hpu la nga ai.

15Hpaji byeng-ya gaw lung seng hta grau hpu reng nga ai hte dai hpe nang ra ai hpa hte mung, shadawn lu ai n rai.

16Hpaji byeng-ya gaw nang hpe asak galu shangun ai zawn, sut gan hte arawng sadang hpe mung hkam la shangun nga ai.

17Hpaji byeng-ya gaw na a asak hpe shangwi shapyaw ya nna, dai lam hku, nang hpe shim lum ai hte woi sa wa lu nga ai.

18Hpaji byeng-ya chye chyang ai ni gaw a lu ma ai; hpaji byeng-ya gaw shanhte hpe asak jaw ya na ra ai.

19Dai Madu gaw shi a hpaji byeng-ya hte ginding aga hpe hpan da nna; shi a chye chyang ai nyan hte sumsing lamu hpe hpajang da nu ai.

20Shi a hpaji byeng-ya hte hka nu ni hpe shalwi dat nna; ginding aga ntsa e, sumwi kaw nna marang hpe jahtu shangun nga ai.

21Sha e, na a hpaji byeng-ya hte myit kraw hpaji hpe mahkyu ai myit arawng nga u; dai ni hpe nang kaw na galoi mung hkum dat kau et.

22Dai ni gaw nang hpe ngwi pyaw ai hte kabu gara ai asak hkrung lam jaw ya na ra ai.

23Na a lam hta shim lum ai hte nang hkawm sa wa lu nna, na a lagaw pyi galoi mung, ahtu na ra ai n rai.

24Nang yup ra shang wa yang, hkrit tsang ra na n rai; shana tup, ngwi ngwi pyaw pyaw hte nang yup lu na rin dai.

25Tara n lang ai masha ni a ntsa e, laru zawn, akajawng sha du pru wa ai tsin-yam tsindam ni hpe nang n myit ru ra nga ndai.

26Dai Madu gaw nang hpe shim hkra bau sin na ra ai, shi gaw nang hpe mahkam de jahkrat kau na ra ai n rai.

27Mai kaja ai amu galaw na matu, ra kadawn nga ai ni hpe mai byin ai aten, galoi rai tim, nang galaw nga u.

28Na a htingbu wa hpe ya jang nang lu karum nga ninglen, hpawt de du hkra la shangun ai lam, galoi mung hkum tsun et.

29Na a htingbu wa hpe machyi shangun ai amu hpa mung hkum maw et; shi gaw na a makau e nga nga nna, nang hpe kam hpa nga ai.

30Nang hpe hpa mung n machyi shangun yu ai wa hpe, mara kata e, ndang kalang hkum rai et.

31Kashun kashe du daw sai hkaw galaw ai masha ni hpe hkum yu manawn nga et; shanhte galaw ai zawn hkan galaw na hkum daw dan et.

32Kaning rai nme law, dai Madu gaw n hkru n shawp ai amu galaw ai ni hpe n dawng nga ai; rai ti mung, ding man ai masha ni hpe chyawm gaw shi kam nga ai.

33Dai Madu gaw tara n lang ai masha ni a dum nta ni hpe dagam kau ti mung, ding hpring ai masha ni a dum nta ni hpe chyawm gaw shaman ya nga ai.

34Shi gaw myit tsaw myit dap ai masha ni hpe n ra sharawng ti mung, shagrit shanem ai masha ni hpe chyawm gaw myi man pa shangun nga ai.

35Hpaji rawng ai masha ni gaw mying gumhkawng ai arawng sadang hpe hkam la lu nga ma ti mung, angawk ai masha ni chyawm gaw kaya kahpa amu hpe grau shalaw la nga ma ai.

← Chapter 2 Jump to: Chapter 4 →