Proverbs 6

Jinghpaw Common Language Bible © Bible Society of Myanmar, 2009

← Chapter 5 Jump to: Chapter 7 →

1Sha e, nang gaw marai langai ngai a hka gumhpraw a matu, lit la pahkam hkam ya na ga sadi tawn da ya wu ni?

2Nang tsun ai na a n-gup aga hta ahkang hkrum nga n ni?

3Rai sa, sha e, nang dai masha wa a daru magam npu e nga ai rai tim, da ndai gaw shi a kata kaw nna gara hku lawt pru wa na lam rai nga ai; shi hpang de tin tin sa nna nang hpe raw dat na matu, shi hpe hpyi nem u.

4Nang hkum nan n dum nmi hkum rai nga et, hkring pyi hkum hkring sa nga et.

5Jaugawng wa hkam da ai mahkam kaw na lawt mat wa ai shannga shing n rai u zawn lawt pru mat wa u.

6Lagawn ai masha ni gaw kagyin ni a sat lawat hpe sharin la na mai ang nga ai.

7Shanhte hta ningbaw wa, woi awn ai wa hte up hkang ai wa, ngu ai ni n nga ti mung;

8ginhtawng a matu lusha hpe shanhte mahkawng da nna, nshung ta a matu jin jin lajang da nga ma ai.

9Lagawn ai wa gaw galoi aten du hkra, galeng gum kan nga na ngu nga n ta? Shi gaw galoi aten hta rawt wa na rai nga a ta?

10Shi gaw, “Ngai hkring mi naw yup la na nngai, lata hkintum kau nna, hkring mi naw gan hkring la na nngai,” nga nna tsun nga ai.

11Rai ti mung, shi yup pyaw nga ai aten hta damya hkrum na ra ai.

12Lachyum n pru ai n hkru n shawp ai masha ni kayin hkawm nna, masu magaw ga ni hpe tsun nga ma ai.

13Shanhte nang hpe masu hkalem na matu, myi grip nna, lagaw lata ni hte kumla madun dan nga ma ai.

14Shanhte a n gring ai myit masin ni hta n hkru ai lam hkrai maw mawn nna ru yak tsin-yam hpe shara shagu hkan e, shalut kabrawng ya nga ma ai.

15Ndai lam a majaw, tsin-yam tsindam gaw shanhte hpe sadi n jaw ai sha, agrawp kau na ra ai hte, si ging ai nma shanhte hkrum sha na mara ai.

16Dai Madu n dawng n yawt ai hte n hkam sharang lu ai lam, amyu sanit nga nga ai; dai ni gaw gumrawng gumtawng ai myi man nsam, masu magaw ga tsun ai shinglet, mara n kap ai wa hpe sat kau ai lata, n hkru n kaja ai hpe maw mawn hpaji daw ai myit masin, kajam kalam galaw na, lawan ai lagaw, masu ga langai hpang langai tsun nna sakse hkam ai wa, manaw manang shada da a lapran e, ru yak tsin-yam hpe shalut kabrawng ya ai wa rai nga ai.

20Sha e, nwa a tsun matsun ai ga hpe hkan galaw nga u; nnu a sharin shaga ai ga hpe mung, galoi mung hkum malap kau et.

21Shanhte a matsun maroi ga ni hpe tut nawng e, nang hte rau na a myit masin hta kyem mazing bang da u.

22Nang bu hkawm sa wa yang shanhte a sharin shaga ai ga ni gaw nang hpe lam madun na ra ai; shana na aten mung, nang hpe makawp maga na ra ai hte shani na aten ni hta mung nang hpe hpaji jaw na ra ai.

23Shanhte a sharin shaga ai ga ni gaw htoi tu ai nhtoi rai nga ai, shanhte a shading sharai ya ai lam mung nang gara hku asak hkrung na lam hpe sharin ya lu nga ai.

24Dai gaw nang n kaja ai numsha ni hte, masha jan ni a lau la lu ai n-gup aga ni kaw na, nang hpe makawp maga la lu nga ai.

25Shanhte a tsawm htap ai lam hta gunglau hkum hkrum nga et; shanhte a hkalem asoi la lu ai myi a mahkam hta hkum lu mat shangun et.

26Lasha wa gaw muk tawng langai mi a manu hte shawa num langai mi hpe saw la lu tim, numshaw ai amu gaw shi lu ai rai yawng hte shi hpe manu jahpu daw na ra ai.

27Nang gaw na a hpun palawng hpe n hkru hkra, na a sinda hta wan hpe majaw hpai lu n ni?

28Na a lagaw n hkru mat hkra, kahtet kang ai wan n-ga ntsa hta e nang kabye hkawm lu n ni?

29Dai amu hpe galaw ai wa gaw masha jan shaw ai wa zawn hkrithpa rai nga ai hte; dai hpe galaw ai wa kadai mung nni nkri hkrum sha na ra ai.

30Lagut gaw kawsi hkrum nna lusha lagu sha yang, masha ni shi hpe yu matsat kau na n rai.

31Rai tim shi rim hkrum ai rai yang chyawm gaw, htam sanit sha n-ga, shi nhtang ya ra nga ai, shi lu ai sut gan yawng mung wa kau ra na ra ai.

32Rai ti mung, masha jan shaw ai wa chyawm gaw myit yu ai lam n nga nga ai; dai gaw shi hkum hpe jahten sharun kau na matu chyu sha rai nga ai.

33Shi gaw arawng jahpoi hkrum ai hte anu kayat ai hkrum na ra ai; shi gaw shaprai kau n lu mat hkra, kaya kahpa hkrum na ra ai.

34Nta madu wa shi yu manawn ai a jaw e, masin pawt ai hta grau nna pawt ai gaw n nga sai. Shi a matai htang ai gaw shadaw shadang hpa mung n nga ai hpe chye nga ai.

35Htingrai htingrat ja hpe mung, shi hkap la na wu ai n rai; shi a masin kahtet ai hpe shakawp ya lu ai kumhpaw kumhpa gade wa rai tim, n law nga ai.

← Chapter 5 Jump to: Chapter 7 →