Proverbs 28

Jinghpaw Common Language Bible © Bible Society of Myanmar, 2009

← Chapter 27 Jump to: Chapter 29 →

1Tara n lang ai ni gaw shanhte hpe shachyut ai ni kadai n nga ti mung, hprawng nga ma ai; rai ti mung ding hpring ai wa chyawm gaw hkanghkyi zawn nden ja nga ai.

2Amyu masha ni yubak hkrum sha ai shaloi, dai hta mung du ni langai hpang langai up hkang na mara ai. Rai ti mung, nyan sam ai hte htauli htaula myit rawng ai ningbaw ningla ni woi hkang ai shaloi, mungdan gaw n-gun rawng wa nna grin ngang nga ai.

3Ahkaw ahkang lu nna, matsan mayan masha ni hpe dip gamyet sha ai wa gaw hkai nmai ni hpe agre jahten kau ya ai marang hte bung nga ai.

4Tara hpe nang n hkungga ai rai yang, nang gaw tara nlang ai masha ni a hpang maga de nga nga ndai; rai ti mung, dai tara hpe nang hkan nang ai wa rai yang chyawm gaw shanhte hte nang nhtan shai nga ai.

5N hkru n shawp ai masha ni gaw teng man ai tara hpe n chye nga ma ti mung, Madu hpe nawku daw jau ai ni gaw dai hpe atsawm sha chye na nga ma ai.

6Ding hpring ai hte matsan mayan hkrum na gaw masu magaw ai hte sut su na hta grau kaja nga ai.

7Tara hpe hkan ai shabrang wa gaw nyan sam nga ai; asung n shang ai ni hpe manang shatai ai ni chyawm gaw kanu yan kawa hpe kaya jahkrum nga ma ai.

8Amyat sha nna masha kaga wa hpe zai hku nna dip sha let na a sut gan hpe shalaw la ai wa rai yang, matsan mayan ni hpe matsan dum ai wa a lata de, na a sut gan shang mat wa na ra ai.

9Tara hpe nang n hkan ai rai yang na a akyu hpyi ga ni gaw Karai Kasang a na hta n dawng n yawt ai ga hte hpring na ra ai.

10Myit malang ai wa hpe n hkru ai amu galaw na matu nang masu hkalem ai rai yang, nang gaw na a mahkam hta di hkrat na rin dai. Mara kata ai wa chyawm gaw kumhpa kaja lu la na ra ai.

11Sut su ai ni gaw shanhte hta hpaji rawng nga ga ai nga nna tut e myit la nga ma ti mung, masha a akyang hpe chye ai matsan mayan masha wa gaw dai hpe grau chye na nga ai.

12Mai kaja ai masha ni hkawhkam tingnyang hta dung ai shaloi, masha shagu wa awng padang ninglaw poi hta shang lu ma ai; n hkru n shawp ai ni up hkang ai shaloi, masha ni makoi mat nga ma ai.

13Na a yubak mara ni hpe ip da na, nang shakut ai rai yang, asak hkrun lam hta, nang galoi mung awng dang na n rai; mara hpe yin la nna tawn kau jang, Karai Kasang nang hpe matsan dum ai myit madun dan na ra ai.

14Dai Madu a ga hpe tut nawng e, madat mara nga u, shaloi, nang a lu na ra ai; nang lama baw ja nga ai rai yang chyawm gaw hten run mat ai nang hkrum na rin dai.

15N hkru ai mung du wa a man e, matsan mayan masha ni gaw karum la masha n lu nga ma ai; Dai wa gaw, shabam ai hkanghkyi hte lagyim hkawm ai tsap hte maren, hkrit tsang ra ai wa rai nga ai.

16Htauli htaula nyan n rawng ai mung du wa gaw gumshem nga nna; n ding n man ai hpe matsat ai du wa chyawm gaw aten na na up hkang lu na ra ai.

17Masha sat mara lu ai wa gaw shi a nsung hku hpe lawan lu ai daram lawan nna htu nga ai; shi hpe hkum jahkring nga et;

18Myit malang nga u, shaloi nang shim nga na ra ai; nang lama n ding n man nga ai rai yang, akajawng sha kataw mat na rin dai.

19Yi hkauna galaw shakut ai wa gaw sha na matu ntaw ntsang lu nga ai; Aten hpe majoi mi shama kau ai ni chyawm gaw tut nawng e, matsan mayan hkrum na mara ai.

20Myit malang ai masha ni gaw ngwi pyaw kabu gara ai hte asak hkrung na ra ai. Rai ti mung, nang mahtang, sut su mayu ai hpe tin tin galaw ai rai yang, nang ari hkrum na rin dai.

21Masha hpe myi man lata ai lam gaw shut nga ai. Rai ti mung, tara agyi nkau mi gaw kachyi sha re ai mayun kumhpa lu la na matu pyi, shut ai hku tara dara ya na mara ai.

22Myit htingkup ai ni gaw sut su wa na matu, tin tin hkan shachyut nga ma ai majaw, matsan mayan ai lam du wa ai hpe, shanhte n chye nga ma ai.

23Marai langai ngai hpe shadum jahprang u; hpang daw de, shi gaw abawk tsun ai ga hta dai hpe grau nna manu shadan nga na ra ai.

24Tinang a kanu kawa arung arai hpe lagu la ai gaw yubak mara n rai nga ai, nga nna myit la ai wa kadai mung shawa lagut ndu hta grau kaja nga ai n rai.

25Myit htingkup ai gaw tsin-yam tsindam hpe sha, shabyin ya nga ai; nang gaw dai Madu hpe kam hpa nga na, grau nna mai kaja nga ai.

26Tinang a myit machyu ai wa gaw angawk ai wa rai nga ai; Hpaji grau rawng ai wa a sharin shaga ai ga hpe hkan ai wa chyawm gaw shim lum na ra ai.

27Matsan mayan wa hpe gam jaw u, shaloi nang galoi mung ra kadawn na rin dai n rai; matsan mayan wa hpe yu shalai kau ai rai yang chyawm gaw, masha law law wa, nang hpe dagam dala ga tsun na mara ai.

28N hkru ai masha ni hkaw tingnyang hta dung yang, masha ni makoi mat nga ma ai. Rai ti mung, shanhte hkaw tingnyang hta na hkrat mat ai shaloi, ding man ai masha ni bai up wa na mara ai.

← Chapter 27 Jump to: Chapter 29 →