Proverbs 20

Jinghpaw Common Language Bible © Bible Society of Myanmar, 2009

← Chapter 19 Jump to: Chapter 21 →

1Ladu lai chyaru lu ai gaw nang hpe marawn shabam nna angawk shangun nga ai. Chyaru nang apa hkawm ai gaw angawk ai lam rai nga ai.

2Shabam nga ai hkanghkyi hpe zawn masin pawt ai hkawhkam wa hpe hkrit nga u; shi hpe shapawt ai gaw tinang hkum sat si ai lam rai nga ai.

3Angawk ai wa kadai mung dangrang ai lam hpe hpang dat lu nga ma ai; dai zawn rai n galaw ai ni gaw myit su ai lam rai nga ai.

4Shi a hkauna pa hta, na htai lang na aten e, ladu lai lagawn ai hkau na madu gaw mam dan ai aten hta hpa mung dan la lu na ra ai n rai.

5Masha a myit mang ai lam gaw sung ai hka htung kata na hka zawn rai nga nna; myit kraw hpaji rawng ai wa gaw dai hpe gang shapraw la lu nga ai.

6Masha hkum shagu hte gaw, shi gade sadi dung ai hte kangka nga ai hpe tsun shana nga ma ai; teng teng dai zawn re ai wa hpe kadai mu tam lu nga a hka!

7Myit malang nna jaw ai amu hpe galaw ai kawa hpe lu la ai kasha ni gaw a nga ai.

8Tara tingnyang hta dung nga ai hkawhkam wa gaw n hkru ai lam hpe shi mu ai shaloi, dai lam yawng mayawng hpe shi chye nga ai.

9Marai langai ngai, shi gaw shi a yubak mara hta na lawt lu sai nga nna myit masin hta asan sha hte, kadai wa teng teng tsun lu nga a ni?

10N teng n man ai joi jang lang ai ni hpe dai Madu n dawng nga ai.

11Ma kaji langai pyi gaw, shi galaw ai amu hte shi kaning re ai wa re ai lam hpe chye shangun nga ai; shi myit malang ai hte mai kaja ai wa rai nga ai hpe nang yu shapraw lu nga ndai.

12Dai Madu gaw anhte hpe mu lu na myi hpe mung, na lu na na hpe mung jaw ya mani ai.

13Na a aten hpe yup ai hte aten shama kau ai rai yang, nang matsan mayan hkrum na rin dai. Bungli galaw shaja u, shaloi, nang hkru hkru kat kat sha lu na rin dai.

14Gat mari ai ni gaw gat rai manu nau tsaw ai nga nna tut nawng e, aput angun rai nga ma ai; shi pru wa nna, lu dara ai gat rai hta, grang dakat nga ai.

15Nang hpa tsun shaga nga ai lam hpe nang chye ai rai yang, aja hte lung seng hta grau manu dan ai lam lama ma hpe nang lu tawn nga ndai.

16Tsasam wa a hka hpe hkam la gwi ai angawk ai wa kadai hpe rai ti mung, shi a sutgan hpe pahkam hku zing tawn kau ra nga ai.

17N teng n man ai hku lu la ai arai hta nang kabu gara nga ai gaw dwi sau ai lusha zawn rai nga ai; hkring mi rai jang, dai gaw zaibru n-gup mi hpe ma-um da ai zawn rai mat na ra ai.

18Kaja ai hpaji jaw ga hpe hkam la u, shaloi nang awng dang wa na ra ai; hkyen lajang ai lam n nga ai sha majan de hkum htim kapa shang wa, majan hkum baw hkawm et.

19Kadum kahte ga tsun ai gaw makoi magap ai amu bungli hpe galoi mung n ip da lu nga ai; ladu lai ga shaga ai ni hte hkum kanawn et.

20Na a nnu yan nwa hpe dagam dala ga tsun ai rai yang, na a asak gaw htat ai nsin hta si mat ai pyengdin wan zawn htum mat na ra ai.

21Na a sut gan hpe loi ai hku lu la magang, sutgan dai gaw na matu akyu yawm magang rai na ra ai.

22Shut hpyit ai hka hpe nang nan matai hkum htang! dai Madu hpe kam hpa nga u, shaloi shi dai amu hpe teng man ai hku hpajang ya na ra ai.

23Dai Madu gaw n man ai joi jang lang ai masha ni hpe n dawng nga ai.

24Dai Madu gaw anhte a lam hpe ladaw da ya sai, dai rai yang, kadai wa mi, shi a asak hkrun lam gade yawng nga ai hpe gara hku chye na lu na rai nga a ta?

25Karai Kasang hpang de, shagu hkungga nawng jau na ga sadi garai n hkam la yang, sadi maja let myit sawn yu u; shing n rai yang, hpang e nang shut dum wa na ndai.

26Hpaji rawng ai hkawhkam wa gaw n shawp ai amu galaw nga ai wa hpe hkan sawk shapraw nhtawm matsan dum myit n rawng ai sha, shi hpe ari jaw na ra ai.

27Dai Madu gaw nanhte hpe machye machyang myit hte htauli htaula myit bang da ya sai; anhte gaw tinang nan kaw nna makoi magap lu nga ga ai n rai.

28Hkawhkam wa gaw shi a up hkang ai lam hta, ding man ai, teng man ai hte rap ra ai tara ni hte up hkang nga dingsa gaw shi a hkawhkam aya hta agrin nga na ra ai.

29Ramma ni a n-gun atsam hpe anhte yu kabu ai hte baw hpraw ugut gu ai ni hpe hkungga lara ga ai.

30Kalang lang, nchyi nmu re ai mahkrum madup hkrum hkra yang sha, anhte galaw man ai arawn alai ni hpe galai jashai la lu nga ai.

← Chapter 19 Jump to: Chapter 21 →