Proverbs 9

Jinghpaw Common Language Bible © Bible Society of Myanmar, 2009

← Chapter 8 Jump to: Chapter 10 →

1Hpaji byeng-ya gaw shi a nta hpe shadaw kaba sanit bang nna, jung da nu ai.

2Shi gaw yam nga ni hpe sat nna, sabyi ntsin hta mu hawm ai ntsin kayau nhtawm, lusha poi sha ku hpe hkyen lajang tawn nu ai.

3Shi gaw shi a mayam num ni hpe shangun dat let, mare a tsaw htum ai shara kaw nna,

4“Hpaji n chye ai masha ni e, shang wa marit! Angawk Angak re ai wa e, sa rit!

5Nye a lusha hpe sha mu, ngai kayau ai sabyi ntsin hpe lu mu.

6Myit n su ai masha u hpung ni hpe kau da nna, asak hkrung nga mu; hpaji machye machyang lam hta hkan hkawm nga mu,” nga nna jahtau tsun wu ai.

7Gumrawng gumtawng re ai masha wa hpe nang shading sharai ai rai yang, jahpoi asawng ai sha bai hkrum sha na rin dai; n hkru n kaja ai masha wa hpe nang daru sharin ai rai yang, machyi ai nang hkrum sha na rin dai.

8Gumrawng gumtawng ai masha wa hpe galoi mung hkum shading sharai nga et; dai lam a majaw, shi nang hpe n ju n dawng wa na ra ai. Rai ti mung, hpaji rawng ai masha wa hpe nang shading sharai ai rai yang, shi nang hpe hkungga lara rai na ra ai.

9Hpaji rawng ai masha wa hpe nang tsun dan ai hpa lam rai tim, shi hpe grau hpaji chye shangun nga ai; ding hpring ai masha langai mi hpe nang tsun shaga ai hpa rai tim, shi a machye machyang hpe hpung jat shangun nga ai.

10Dai Madu hpe hkrit hkungga ai myit gaw hpaji byeng-ya a npawt rai nga ai; Chyoi Pra Ai Wa hpe chye chyap ai rai yang, chye na hkawn hkrang ai hpaji nang lu la nga ai.

11Hpaji byeng-ya gaw nang hpe asak galu shangun na ra ai.

12Nang hpaji byeng-ya hkam la lu ai rai yang, nang nan akyu hkam sha lu na ndai. Dai hpe nang ndang kau ai rai yang chyawm gaw nang nan nni nkri hkam sha na rin dai.

13Angawk ai lam gaw, sheng mareng re ai, nyan tang ai hte myi man htat ai num hte bung nga ai.

14Dai num gaw nta ndaw e dung nna mare a tsaw htum ai shara ntsa hta e,

15dung nga ai hte, shanhte a bungli yi ngam de, lai sa wa ai masha ni hpe,

16“Nyan tang ai masha ni e, shang wa marit,” nga nna saw shaga nga ai.

17Bai nna angawk angak re ai masha ni hpe, “Lagu la ai ntsin gaw grau dwi nga ai, mayun sha ai muk gaw grau mu nga ai,” nga nna shi tsun nga ai.

18Dai num a nta de shang sai masha ni gaw, Katsan ga a krung sin wa de, rai nga masai hte shi a nta de shang sa wa ai masha ni gaw si hkrum nga ai hpe, shi e lau la lu ai ni dai lam hpe n chye nga ma ai.

← Chapter 8 Jump to: Chapter 10 →