Proverbs 30

Jinghpaw Common Language Bible © Bible Society of Myanmar, 2009

← Chapter 29 Jump to: Chapter 31 →

1Da ndai gaw Yake a kasha Agura a sung ai ga matsun ni rai nga ai; “Karai Kasang ngai hte rau n rai nga ai, Karai Kasang ngai hte rau n rai nga ai majaw, ngai garen gari hkrum nga nngai.

2Ngai gaw shinggyim masha hta dusat hte mahtang grau bung nga nngai; masha hta nga ang ai machye machyang ngai hta n nga nga ai.

3Ngai gaw kaning re ai hpaji byeng-ya hpe galoi mung n sharin la yu ai hte; Karai Kasang hte seng ai lam hpa hpe mung, ngai n chye nga nngai.

4Sumsing lamu hte seng ai machye machyang hpaji hpe, kadai wa hkrak dang chye lu nga a ta? Shi a lata hta nbung hpe rim latup da yu sai gaw, kadai wa nga nga yu sata? Sumpan hkyep hte hka hpe makai hkayawp yu sai gaw, kadai wa nga nga yu sata? Ginding aga a jarit ni hpe, kadai wa shangang shagrin da yu sata? Shi gaw kadai wa rai nga a ni? Shi a kasha gaw kadai wa rai nga a ni? Nang chye ai rai yang, tsun u.

5“Karai Kasang gaw shi tawn da ai ga shaka sha-u hta sadi dung nga ai. Shi gaw shi a makawp maga ai hta shingbyi shara hpe hkan tam ai masha ni yawng a matu ninggang zawn rai nga ai.

6Shi galoi mung n tsun yu ai lam lama mi hpe, shi tsun nu ai ngu nna hkrak tsun ai rai yang chyawm gaw nang masu ai wa rai nga ai hpe, shi madun nna nang hpe daru sharin na ra ai,”

7Karai Kasang e, ngai garai n si yang, ngai nang kaw lam lahkawng hpyi nngai;

8Masu magaw ga tsun ai kaw na, ngai hpe shatsan shagang kau ya e; sut su ai hte matsan ai mung, ngai hta n rai u ga. Dai majaw ngai hta ra kadawn nga ai shat lusha hpe sha, ngai hpe jaw ya e.

9Dai hta jan nna ngai grau lu wa ai rai yang, ngai nang hpe n ra dum nngai ngu nna, tsun kau hkrup na ra ai. Rai ti mung, ngai matsan mayan hkrum nga yang chyawm gaw, ngai lagu nna, nye a Karai Kasang hpe kaya kahpa awu asin di kau na ring nngai.

10Madu man e, shangun ma wa hpe galoi mung mara tam ai ga hkum shatan et. Shing rai yang, dagam dala ai gaw nang hkrum nna, de a nni nkri hpe hkam sha ra na rin dai.

11Kawa ni hpe dagam dala ga tsun nna, kanu ni hpe hkungga shareng ai lam n madun ai masha ni nga nga ma ai.

12Shanhte gaw dik hkra matsat shabat re nga ai shaloi, san seng nga ga ai nga nna, myit la ai masha ni mung nga nga ma ai.

13Shanhte gaw gade wa mai kaja nga ma hka! shanhte gaw grai kaja nga ma ai nga nna myit la ai masha ni mung nga nga ma ai.

14Matsan mayan masha ni hte n lu n lawm, ra kadawn nga ai ni hpe zai hku nna dip da ai ni hte jahten sharun ai masha ni nga nga ma ai; dai zawn galaw ai gaw shanhte a kan bau magam bungli rai nga ai.

15Wawtbyin hta shayi sha lahkawng lu ai; shan lahkawng yan a mying shingteng gaw, “Ngai hpe jaw rit,” ngu ai mying ni rai nga malu ai. Myit n dik hkraw ai lam mali nga nga ai:

16Katsan ga, maudung num, Marang n htu ai hkun hkraw ai lamu ga, n sat shangap lu ai sharaw wan ni rai nga ai.

17Kawa hpe asaw ale nga nna, asak kaba sai kanu a hkang da ai ga hpe asawng asang di kau ai wa kadai hpe rai ti mung, zai ai u hka ni gaw shi a myi hpe achye malawk kau ya nna langda ni mung, shi a mang hpe sha kau ya na ging nga ai.

18Nye a matu n dang chye lu ai mauhpa lam mali mung nga nga ai.

19Lamu ntsa e pyen ai galang, lunghkrung ntsa e hkawm nga ai lapu, panglai ntsa e shi a lam hta hkawm ai sanghpaw li, tsaw ra hkat ai shinggyim num hte shinggyim la

20Ndai gaw sadi n dung ai dinghku num a sat lawat ni rai nga ai; shi gaw la shaw ai amu hpe shut nna, hka shin ngut ai hpang, “Ngai hpa mung n shut nngai,” nga nna shi tsun nga ai.

21Lamu ga shi nan n hkam sharang lu ai lam mali nga nga ai: dai ni gaw,

22Hkawhkam tai wa ai mayam, hkru hkru kat kat sha lu ai angawk ai wa,

23Tsaw ra myit n hkam la ai hkungran num, madu num a shara hta shang madu la ai shangun ma numsha, ni rai nga ai.

24Ga ningtsa e, kaji ti mung, hpaji grai rawng ai dusat amyu mali nga nga ai;

25Kagyin: shanhte gaw n-gun n ja ti mung, ginhtawng ta shanhte a lusha a matu shahpa mahkawng da nga ma ai.

26Lungpu gwi tingsung: dai ni gaw n-gun grai wa n ja ti mung, lungpu lapran hkan shanhte a nga shara ni hpe gap da lu nga ma ai.

27Dinggam-yaw: shanhte hta hkawhkam tai ai wa n nga ti mung, shanhte mahkra rau pyen kanawng hkawm lu ma ai.

28Dingsing: na a lata hte jum da lu tim, dai gaw hkawhkam htingnu hkan shanu nga ai hpe mu lu ai.

29Shanhte hkawm sa wa yang, myit hta chyung shangun hkra yu azi mai ai amyu mali mung nga nga ai.

30Dai ni gaw, hkanghkyi: dusat yawng hta n-gun ja htum rai nna kadai hpe mung n hkrit nga ai,

31bainam, akam asham rai hkawm ai nta u la hte, mung masha ni a man e tsap nga ai hkawhkam ni rai ma ai.

32Myit tsaw myit dap rawng nna angawk ai hte n hkru n shawp ai amu hpe nang galaw maw mawn ai rai yang, dai ni hpe jahkring kau nna myit yu u!

33Nang ngachyu hpe garu ai rai yang, htawbat hpe lu la nga ndai. Marai Langai mi a ladi hpe nang htwi yang, dai kaw na sai pru nga ai. Nang gaw sindawng kahtet ai hpe shalut kabrawng ya ai rai yang, ru yak tsin-yam tsindam hkrum nga ndai.

← Chapter 29 Jump to: Chapter 31 →