Nehemiah 1

Kamba (Mbivilia) 1956

Jump to: Chapter 2 →

1Ndeto sya Neemia mwana wa Akalia. Na kweethĩwa mwei wa Kiselevu, mwaka wa mĩongo ĩlĩ, yĩla naĩ nyũmbanĩ nene ya ũsumbĩ ku Susani,

2Aanani ooka, ũmwe wa ana‐a‐asa makwa, we na andũ amwe ala maumĩte Yuta; na namakũlya ũvoo wa Ayuti ala mavonokie ala matialile ma ala matavĩtwe, na ũvoo wa Yelusaleme.

3Na mambĩa, Ũtialo ũla ũtialĩte wa ala matavĩtwe ku kĩlungunĩ kyu kĩnene kya nthĩ wĩ na thĩna mũnene na kũvũthw’a: o na ũvai wa Yelusaleme naw’o nĩ mũomboku, na mbingĩlo syayo nivĩvĩtw’e na mwaki.

4Na kweethĩwa, yĩla neewie ndeto isu, nekala nthĩ na naĩa, na nameta mĩthenya ĩmwe; na natĩĩa ũya na navoya mbee wa Ngai wa ĩtunĩ,

5na nasya, Nĩngũkwĩsũva, ame Yeova, Ngai wa ĩtunĩ, Ngai mũnene na wa kũtĩsya, ũla wĩanĩasya ũtianĩo na ũseo wĩ wendo kwa ala mamwendaa na kũkwataa mĩao yake:

6yu kũtũ kwaku nĩkwĩthukĩĩsye, na metho maku methĩwe masalukĩtye, nĩ kana wĩthukĩĩsye kũvoya kwa mũthũkũmi waku, kũla ngũvoya nĩ mbee waku ĩvinda yĩĩ, mũthenya na ũtukũ, ũndũ wa ana ma Isilaeli athũkũmi maku, yĩla ngumbũla naĩ sya ana ma Isilaeli, ila twakũvĩtanĩĩsye. Ĩĩ, nyie na nyũmba ya asa wakwa nĩtũvĩtĩtye:

7nĩtũkwĩkĩte naĩ mũno, na tũtyasũvĩaa mĩao, kana myamũlo, kana motw’ĩo, ala wamwĩaĩe Mose mũthũkũmi waku.

8Nĩngũkwĩsũva, lilikana ndeto ĩla wamwĩaĩe mũthũkũmi waku Mose, ũkĩmwĩa, Ethĩwa mũkavĩtya, ngamũnyaĩĩkya katĩ wa ngo sya andũ:

9ĩndĩ ethĩwa mũkanzyokea, na kũkwataa mĩao yakwa na kũmĩkaa, o na ethĩwa alũngw’a menyu me ngalĩko ya mũminũkĩlyo ya matu, kuma vau ngamomban’ya, na ngamaete vandũ vala nĩnyuvĩte, nĩkalye syĩtwa yakwa vo.

10Na ĩndĩ aa nĩo athũkũmi maku na andũ maku, ala ũmovoetye na vinya waku mũnene, na kw’oko kwaku kwĩ vinya.

11Ame Mwĩaĩi, nĩngũkwĩsũva, kũtũ kwaku yu nĩkwĩthukĩĩsye kũvoya kwa mũthũkũmi waku, na kũvoya kwa athũkũmi maku, ala matanĩaa kũkĩa syĩtwa yaku; na nĩngũkwĩsũva, ũmũathime mũthũkũmi waku ũmũnthĩ, na ũimwĩw’ĩa tei methonĩ ma mũndũ ũũ. (Na ĩndĩ naĩ mũnengi wa mũsumbĩ mbinyu.)

Jump to: Chapter 2 →