Nehemiah 10

Kamba (Mbivilia) 1956

← Chapter 9 Jump to: Chapter 11 →

1Na ĩndĩ ala meekĩie ũsiĩlo nĩo aa: ngavana Neemia, mwana wa Akalia, na Nzetekia,

2na Selaia, na Asalia, na Yelemia,

3na Vasuli, na Amalia, na Malikaya,

4na Atusi, na Sevania, na Maluku,

5na Alimu, na Melemothi, na Ovatia,

6na Ndanieli, na Nginethoni, na Mbaluku,

7na Mesulamu, na Aviya, na Miyamini,

8na Maasia, na Mbilikai, na Semaia; asu maĩ athembi.

9Na Alivai nĩmo aa: Yesua mwana wa Asania, na Mbinui, wa ana ma Enatati, na Katimieli:

10na ana‐a‐ĩthe moo, Sevania, na Otia, na Kelita, na Velaia, na Aananu,

11na Mika, na Leovu, na Asavia,

12na Nzakuli, na Selevia, na Sevania,

13na Otia, na Mbani, na Mbeninu.

14Anene ma andũ: Valosi, na Vaathi‐moavi, na Elamu, na Nzatu, na Mbani,

15na Mbuni, na Asikati, na Mbevai,

16na Atoniya, na Mbikivai, na Atini,

17na Ateli, na Esekia, na Asulu,

18na Otia, na Asumu, na Mbenzai,

19na Alivu, na Anathothi, na Novai,

20na Makiviasi, na Mesulamu, na Eesili,

21na Mesesaveli, na Nzatoki, na Yatua,

22na Velatia, na Aananu, na Anaia,

23na Osea, na Aanania, na Asuvu,

24na Aloesi, na Vilia, na Soveki,

25na Leumu, na Asavina, na Maaseia,

26na Aiya, na Aananu, na Ananu,

27na Maluku, na Alimu, na Mbaana.

28Na andũ ala angĩ, athembi, na Alivai, na asũvĩi ma mĩomonĩ, na aini, na Anethini, na onthe ala meevathĩte kuma ngonĩ sya andũ sya i nthĩ makwate mĩao ya Ngai, na iveti syoo, na ana moo, na eĩtu moo, kĩla ũmwe ũla waĩ na ũĩ na ũmanyi;

29malũman’ya na ana‐a‐ĩthe moo, anene moo me ndaĩa, na meelikya kĩumonĩ, na wĩvĩtonĩ, maendae mĩaonĩ ya Ngai, ĩla yanenganiwe nĩ Mose mũthũkũmi wa Ngai, na kũsũvĩa kwĩkaa mĩao yonthe ya Yeova Mwĩaĩi waitũ, na motw’ĩo make na mĩao yake;

30na kana tũtikanengane eĩtu maitũ kwa ngo sya andũ sya nthĩ ĩsu, kana kũmatwaĩa ana maitũ eĩtu moo;

31na ethĩwa ngo sya andũ sya ĩ nthĩ ikaete syĩndũ kana lĩu o na wĩva mathoosye mũthenya wa savato, tũtikamathooee mũthenya wa savato, kana mũthenya mũtheu; o na tũkaeka mwaka wa mũonza, na kũandũa kwa kĩla thiĩ.

32Na ĩngĩ nĩtweetw’ĩĩe motw’ĩo, twĩyumĩthye kĩla mwaka kĩlungu kya katatũ kya sekeli ũndũ wa ũthũkũmi wa nyũmba ya Ngai waitũ;

33ũndũ wa imũtũ ila siĩawa Yeova, na ũndũ wa nthembo ya mũtu ĩtatw’ĩkanaa, na ũndũ wa nthembo ya kũvĩvw’a ĩla ĩtatw’ĩkanaa, na ũndũ wa masavato, na mĩtiso ya myei, na mboka itw’ĩtwe, na syĩndũ ntheu, na nthembo kwondũ wa naĩ syĩthĩwe wĩw’anĩthyo wa Isilaeli, na ũndũ wa wĩa w’onthe wa nyũmba ya Ngai waitũ.

34Na twalimana, athembi, na Alivai, na andũ, ũndũ wa nthembo ya ngũ, ietawe nyũmbanĩ ya Ngai waitũ, kwĩanana na nyũmba sya aaĩthe maitũ, mavinda matw’ĩtwe, mwaka na mwaka, ivĩvaw’e kĩthembeonĩ kya Yeova Ngai waitũ, o tondũ kũandĩkĩtwe mĩaonĩ;

35na tũetae nyũmbanĩ ya Yeova ũsyao wa mbee wa nthĩ yaitũ, na ũsyao wa mbee wa ũsyao w’onthe wa mĩtĩ ya mĩthemba yonthe, mwaka na mwaka;

36o na kĩla kĩsyaĩtwe mbee kya ana maitũ, na kya indo sitũ, o tondũ kũandĩkĩtwe mĩaonĩ, na kĩla kĩsyaĩtwe mbee kya ndĩthya sitũ sya ng’ombe na ndĩthya sitũ sya mbũi na malondu, kĩetawe nyũmbanĩ ya Ngai waitũ, kĩthĩwe kya athembi ala mathũkũmaa nyũmbanĩ ya Ngai waitũ;

37na tũmaetee athembi tũsũmbanĩ twa nyũmba ya Ngai waitũ ũsyao wa mbee wa mũtu witũ, na nthembo sitũ sya kũkĩlw’a, na ũsyao wa mĩthemba yonthe ya mĩtĩ, na mbinyu mbĩthĩ na mauta; na ilungu sya ĩkũmi sya nthĩ yaitũ tũmaetee Alivai; nĩkwĩthĩwa nao Alivai, nĩmosaa ilungu sya ĩkũmi ndũanĩ syonthe kũla tũĩmaa.

38Na mũthembi mwana wa Aluni akethĩwaa vo na Alivai yĩla Alivai meosaa ilungu sya ĩkũmi: na Alivai makaetae kĩlungu kya ĩkũmi kya ilungu isu sya ĩkũmi nyũmbanĩ ya Ngai waitũ, tũsũmbanĩ, nyũmbanĩ ya kwia mothwii.

39Nũndũ ana ma Isilaeli na ana ma Livai makaete nthembo ya kũkĩlw’a ya lĩu wa mbaa ngetha, na ya mbinyu mbĩthĩ, na ya mauta, tũsũmbanĩ, vala ve mĩio ya vala vandũ vatheu, na athembi ala mathũkũmaa, na asũvĩi ma mĩomonĩ, na aini: na tũtikaeka nyũmba ya Ngai waitũ.

← Chapter 9 Jump to: Chapter 11 →