Nehemiah 9

Kamba (Mbivilia) 1956

← Chapter 8 Jump to: Chapter 10 →

1Na ĩndĩ mũthenya wa mĩongo ĩlĩ na ĩna wa mwei ũsu ana ma Isilaeli moombana na kũtĩĩa ũya, mevw’ĩkĩte makunia, na kwĩyũmba mũthanga.

2Na ũsyao wa Isilaeli wataanĩsya na andũ onthe ma nthĩ ingĩ, na maũngama na kumbũla naĩ syoo, na mothũku ma aaĩthe moo.

3Na maũngama vala maĩ na masoma ĩvukunĩ ya mĩao ya Yeova Ngai woo masaa atatũ ma mũthenya; na masaa angĩ atatũ maumbũla, na mathaitha Yeova Ngai woo.

4Nĩvo ĩndĩ kwaũngamie ĩũlũ wa mbasya sya Alivai andũ aa: Yesua, na Mbani, na Katimieli, na Sevania, na Mbuni, na Selevia, na Mbani, na Kienani, na mamwĩkaĩla Yeova Ngai woo na wasya mũnene.

5Nĩvo ĩndĩ Alivai, Yesua, na Katimieli, na Mbani, na Asavineia, na Selevia, na Otia, na Sevania, na Vethaia, maisye, Ũngamai mũtaĩe Yeova Ngai wenyu kuma tene kũvika tene; na syĩtwa yaku ĩtheu nĩyĩtaĩwe, yĩla ĩnene kwĩ ũathimo w’onthe na ndaĩa.

6Nue Yeova, o we wĩ weka; nue woombie ĩtu, ĩtu yĩla yĩ ĩũlũ wa matu, vamwe na nguthu yonthe yamo, na nthĩ na syĩndũ syonthe syĩ ĩũlũ wayo, na maũkanga na syonthe syĩ nthĩnĩ wamo, na nue wisũvĩaa syonthe; na nguthu ya ĩtunĩ nĩkũthaithaa.

7Nue Yeova Ngai, ũla wamũnyuvie Avalamu, na wamumya Ulu wa Akalitei, na wamũnenga syĩtwa ya Avalaamu,

8na woonie ngoo yake yĩ kĩthito vala ũĩ, na watianĩa ũtianĩo nake ũnengane nthĩ ya Mũkanaani, na Mũititi, na Mũamoli, na Mũvelisi, na Mũyevusi, na Mũngilikasi, ũmĩnenge ũsyao wake yo, na nĩwĩanĩsye ndeto syaku; nũndũ wĩ mũlũngalu.

9Naku woona thĩna wa aaĩthe maitũ Misili, na weew’a kĩĩo kyoo ũtee wa Ũkanga Mũtune,

10na woonan’ya syama na moseng’yo kwa Valao, na athũkũmi make onthe, na andũnĩ onthe ma nthĩ yake; nĩkwĩthĩwa nĩweesĩ nĩmamekie na ngathĩĩo, naku weeseũvĩsya syĩtwa, o tondũ kũilyĩ ũmũnthĩ.

11Na waaan’ya ũkanga mbee woo, na ĩndĩ mavĩtĩla ũkanganĩ katĩ makinyĩle nthĩ nyũmũ; na ala mamaatĩĩe wamekya syũngũnĩ, o ta ĩvia manzĩnĩ maingĩ.

12Na ĩngĩ wamatongoesya mũthenya wĩ nthĩnĩ wa kĩtuĩ kya mũumbĩ; na ũtuku wĩ nthĩnĩ wa kĩtuĩ kya mwaki, ũmanenge kyeni nzĩanĩ ĩla maĩle kũthi nayo.

13Na ĩngĩ watheea kĩĩmanĩ kya Sinai, na waneena nao wĩ ĩtunĩ, na wamanenga motw’ĩo malũngalu na mĩao ya w’o, na myamũlo na mĩao mĩseo,

14na wamamanyĩthya savato waku mũtheu, na wameaĩa mawĩaĩo, na myamũlo, na mĩao, na kanyw’a wa Mose, mũthũkũmi waku,

15na wamanenga kĩmũtũ kuma ĩtunĩ nũndũ wa nzaa yoo, na wamaumĩsya manzĩ ĩvianĩ nũndũ wa waũni woo, na wameaĩa malike mamĩmesye nthĩ ĩla weevĩtie kũmanenga.

16Ĩndĩ mo na aaĩthe maitũ meekaa na ngathĩĩo, na moomya ngingo syoo, na matyaaĩthukĩĩsya mĩao yaku,

17na malea kwĩw’a, o na matyaalilikana moseng’yo maku ala weekie katĩ woo, ĩndĩ moomya ngingo syoo, na ũng’endunĩ woo maia kavuteni masyoke ũkombonĩ woo. Ĩndĩ we wĩ Ngai wĩyũmbanĩtye kũekea, wĩ mũseo na wĩ wa tei, mũmĩĩsya wa kũthata, na wusũĩte ũseo wĩ wendo, na ndwaamatia.

18Ĩĩ, yĩla maĩ maneeseũvĩsya mũvw’anano wa kasaũ ka ng’ombe na syĩndũ matwekethetye, na masya, Ũũ nĩ Ngai waku ũla wakumisye Misili, na maĩ maneeka mothatyo manene;

19ĩndĩ we kwondũ wa matei maku maingĩ ndwaamatia weũnĩ: kĩtuĩ kya mũumbĩ kĩtyaauma ĩũlũ woo mũthenya, kĩmatongoesye nzĩanĩ; kana kĩtuĩ kya mwaki ũtukũ, kĩmanenge kyeni na kũmon’ya nzĩa ĩla maĩle kũthi nayo.

20O na wanengane Veva waku mũseo amamanyĩsye, na ndwaamavata lĩu waku wĩtawa mana makanyw’anĩ moo, na wamanenga manzĩ ũndũ wa waũni woo.

21Ĩĩ, wameanĩsya mavata myaka mĩongo ĩna weũnĩ, na matyaĩ vata na kĩndũ; ngũa syoo ityaakũa, na maũũ moo matyaaimba.

22Na ĩngĩ wamanenga mosumbĩ na ngo sya andũ, ila wamaaanĩsye kwĩanana na ianda syoo: kwondũ wa ũu mamesya nthĩ ya Sioni, o nthĩ ya mũsumbĩ wa Evisoni, na nthĩ ya Oku mũsumbĩ wa Mbasani.

23O na waingĩvya syana syoo ta ndata sya ĩtunĩ, na wamaete malike nthĩ ĩla watavisye aaĩthe moo ũndũ wayo, kana makamĩlika mamĩmesye.

24Na ĩndĩ ana malika mamĩmesya ĩ nthĩ, naku wamakĩlĩlya ala matwĩe ĩ nthĩ vinya mbee woo, o Akanaani, na wamanengane mokonĩ moo, vamwe na asumbĩ moo, na ngo sya andũ sya ĩ nthĩ, nĩ kana mameke o ũndũ mekwenda.

25Na makwata ndũa mbiie, na nthĩ nou, na makwata nyũmba syusũĩte syĩndũ syonthe nzeo syĩthĩwe syoo, na ithima ila syakĩtwe, na mĩũnda ya mĩsavivũ, na mĩũnda ya mĩthata, na mĩtĩ mingĩ mũno ĩsyaaa matunda: na ĩndĩ maya na mavũna, na manoa, na meetanĩthya ũseonĩ waku mũnene.

26O na ũu w’onthe, malea kwĩw’a, na makũng’endea, na mekya mĩao yaku ĩtina woo, na mooaa athani maku ala mamakũsĩĩa mamatũnge ĩngĩ kwaku, na meeka mothatyo manene.

27Kwondũ wa ũu wamanengane kw’okonĩ kwa amaitha moo, ala mamathĩnisye: na ĩvinda ya thĩna woo, yĩla makwĩkaĩlile, weew’a wĩ ĩtunĩ; na kwĩanana na matei maku maingĩ wamanenga atangĩĩi ala mamatangĩĩie kũmaumya kw’okonĩ kwa amaitha moo.

28Ĩndĩ mamina kũthũmũa, meeka ũthũku ĩngĩ wene; kwondũ wa ũu wamaeka kw’okonĩ kwa amaitha moo, nao mamasumbĩka: ĩndĩ yĩla masyokie, na makwĩkaĩla, weew’a wĩ ĩtunĩ; na wamavonokya mavinda maingĩ kwĩanana na matei maku,

29na wamakũsĩĩa, nĩ kana ũmaete ĩngĩ mĩaonĩ yaku. Ĩndĩ nao meeka na ngathĩĩo, na matyaaĩthukĩĩsya mĩao yaku, ĩndĩ mavĩtya motw’ĩo maku (ala ethĩwa mũndũ nũmekaa, akekala thayũ nthĩnĩ wamo), na makwambatĩsya kĩtuo, na moomya ngingo syoo, na malea kwĩthukĩĩsya.

30Ĩndĩ woomĩĩsye nao myaka mingĩ, na wamakũsĩĩa na Veva waku na makanyw’a ma athani maku: ĩndĩ matyaatea matũ: kwondũ wa ũu wamanengane kw’okonĩ kwa ngo sya andũ sya i nthĩ.

31O na ũu w’onthe, ũndũ wa matei maku maingĩ ndwaamamina vyũ, o na ndwaamatia; nũndũ wĩ Ngai mũseo na wĩ wa tei.

32Na ĩndĩ kwondũ wa ũu, Ngai waitũ, Ngai mũnene, na wĩ vinya, na wa ũtĩsya, ũla wĩanĩasya ũtianĩo na ũseo wĩ wendo, thĩna w’onthe ũla watũkwatie ithyĩ, na asumbĩ maitũ, na anene maitũ me mbee ũsumbĩnĩ, na athembi maitũ, na athani maitũ, na aaithe maitũ, na andũ maku onthe, kuma ĩvinda ya asumbĩ ma Asuli kũvika mũnthĩ ũũ, ndũkoneke ta mũnini vala ũĩ.

33Ĩndĩ wĩ mũlũngalu ũndũnĩ w’onthe ũla watũkwatie; nũndũ naku nĩwĩkĩte na w’o, ĩndĩ ithyĩ nĩtwĩkĩte ũthũku;

34o na asumbĩ maitũ, o na anene maitũ me mbee ũsumbĩnĩ, o na athembi maitũ, o na aaĩthe maitũ, matyaasũvĩa mĩao yaku, kana kwĩthukĩĩsya myamũlo yaku na mokũsĩ maku, ala wamakũsĩĩe namo.

35Nũndũ matyaakũthũkũma ũsumbĩnĩ woo, o na ũseonĩ waku mũnene ũla wamonisye, o na nthĩnĩ wa nthĩ nene na nou ĩla wamanengie mene, o na matyaaĩthyũũa matie mawĩa moo mathũku.

36Sisya, twĩ athũkũmi ũmũnthĩ, na ũndũ wa nthĩ ĩla wanengie aaĩthe maitũ maye ũsyao wayo na ũseo wayo, sisya, twĩ athũkũmi nthĩnĩ wayo.

37Nayo nĩnĩũmasyaĩa wingĩvo mwingĩ asumbĩ ala wamaiie ĩũlũ waitũ nũndũ wa naĩ sitũ: o na me na vinya ĩũlũ wa mĩĩ yaitũ, na indo sitũ, o ũndũ mekwenda, na ithyĩ twĩ na thĩna mwingĩ.

38Ĩndĩ o na ũu w’onthe nĩtũũtianĩa ũtianĩo mũlũmu, na kũandĩka; na anene maitũ me mbee ũsumbĩnĩ, na Alivai maitũ, na athembi maitũ, nĩmekũwĩkĩa ũsiĩlo.

← Chapter 8 Jump to: Chapter 10 →