Nehemiah 12

Kamba (Mbivilia) 1956

← Chapter 11 Jump to: Chapter 13 →

1Na ĩndĩ aa nĩo athembi na Alivai ala mambatie vamwe na Nzeluvaveli mwana wa Sealitieli, na Yesua: Selaia, na Yelemia, na Esala,

2na Amalia, na Maluku, na Atusi,

3na Sekania, na Leumu, na Melemothi,

4na Ito, na Nginethoi, na Aviya,

5na Miyamini, na Maatia, na Mbilika,

6na Semaia, na Yoialivu, na Yetaia,

7na Salu, na Amoki, na Ilikia, na Yetaia. Asu nĩo anene ma athembi na ma ana‐a‐ĩthe moo mĩthenyanĩ ya Yesua.

8Na ĩngĩ Alivai: Yesua, na Mbinui, na Katimieli, na Selevia, na Yuta, na Matania, ũla waĩ mũtongoesya wa ala matũngaa mũvea, we na ana‐a‐ĩthe make.

9O na Mbakivukia na Uni, ana‐a‐ĩthe moo, mamathengeea kũatĩĩa mosyaĩĩsyo moo.

10Na Yesua asyaa Yoiakimu, na Yoiakimu asyaa Eliasivu, na Eliasivu asyaa Yoiata,

11na Yoaita asyaa Yonathani, na Yonathani asyaa Yatua.

12Na mĩthenyanĩ ya Yoiakimu kwaĩ athembi, atongoi ma nyũmba sya aaĩthe: wa Selaia, nĩ Melaia; wa Yelemia, nĩ Aanania;

13wa Esala, nĩ Mesulamu; wa Amalia, nĩ Yeoanani;

14wa Maluki, nĩ Yonathani; wa Sevania, nĩ Yosevu;

15wa Alimu, nĩ Atena, wa Melaiothi, nĩ Elikai;

16wa Ito, nĩ Nzekalia; wa Nginethoni, nĩ Mesulamu;

17wa Aviya, nĩ Nzikili; wa Miniamini, wa Moatia, nĩ Vilitai;

18wa Mbilika, nĩ Samua; wa Semaia, nĩ Yonathani;

19na wa Yoialivu, nĩ Matenai; wa Yetaia, nĩ Usisi;

20wa Salai, nĩ Kalai; wa Amoki, nĩ Eveli;

21wa Ilikia, nĩ Asavia; wa Yetaia, nĩ Nethaneli.

22Ũndũ wa Alivai, mĩthenyanĩ ya Eliasivu, na Yoiata, na Yoanani, na Yatua, nĩkwaandĩkiwe atongoi ma nyũmba sya aaĩthe; o na athembi, ũsumbĩkonĩ wa Ndalio Mũvelisia.

23Ana ma Livai, atongoi ma nyũmba sya aaĩthe, nĩmaandĩkiwe ĩvukunĩ ya maũndũ ma mavinda o kũvika mĩthenya ya Yoanani mwana wa Eliasivu.

24Na anene ma Alivai: Asavia, na Selevia, na Yesua mwana wa Katimieli, vamwe na ana‐a‐ĩthe moo ala mamathengeee, mataĩae na kũtũngaa mũvea, kwĩanana na mwĩao wa Ndaviti mũndũ wa Ngai, ũsyaĩĩsyo na ũsyaĩĩsyo.

25Matania, na Mbakivukia, na Ovatia, na Mesulamu, na Talimoni, na Akuvu, maĩ asũvĩi ma mĩomonĩ makĩsyaĩĩsya nyũmba sya kwia mĩio syĩ mbingĩlonĩ.

26Asu nĩo maĩ mĩthenyanĩ ya Yoiakimu mwana wa Yesua, mwana wa Yosataki, na mĩthenyanĩ ya ngavana Neemia, na ya mũthembi Esala mũandĩki.

27Na ĩvinda ya kũvatha ũvai wa Yelusaleme wĩthĩwe mũtheu nĩmamanthie Alivai mamuamya kũndũ kwoo kw’onthe, mamaete Yelusaleme, malilikane na ũtanu kũvatha kwa ũvai wĩthĩwe mũtheu, makĩtũnga mũvea, o na makina, me na tũmasaya, na inanda, na mbeve.

28Na ana ma aini moombana, kuma ũiĩnĩ ũla ũthyũlũlũkĩte Yelusaleme, o na kuma mĩsyĩ ya Anetovathi;

29na Mbethingilikali, na kuma mĩũndanĩ ya Ngeva na Asimuvethi: nũndũ aini nĩmeeyakĩe mĩsyĩ kũthyũlũlũka Yelusaleme.

30Na athembi na Alivai meethesya; na mathesya andũ, na i mbingĩlo, na ũvai.

31Nĩvo ĩndĩ nambatisye anene me mbee ũsumbĩnĩ ma Yuta ũvainĩ ĩũlũ, na naia nguthu ilĩ nene ila syatũngaa mũvea na syaenda iatĩanĩe; nguthu ĩmwe yaenda ngalĩ ya kw’oko kwa aũme ĩũlũ wa ũvai kwelekela mbingĩlo ya kumĩlya vũũ:

32na ĩtina wa ĩsu kwaendie Osaia, na nyunzu ya anene me mbee ũsumbĩnĩ ma Yuta,

33na Asalia, na Esala, na Mesulamu,

34na Yuta, na Mbenyamini, na Semaia, na Yelemia,

35na amwe ma ana ma athembi me na masoo: Nzekalia mwana wa Yonathani, mwana wa Semaia, mwana wa Matania, mwana wa Mikaia, mwana wa Nzakuli, mwana wa Asavu;

36vamwe na ana‐a‐ĩthe make, Semaia, na Asaleeli, na Milalai, na Ngilalai, na Maai, na Nethaneli, na Yuta, na Aanani, me na syĩndũ sya kũinga sya Ndaviti mũndũ wa Ngai; na mũandĩki Esala amatongoesya.

37Na vakuvĩ na mbingĩlo ya nthongo ya manzĩ, na kũenda maeleele, mambata mbasyanĩ sya ndũa ya Ndaviti, kyambatonĩ kya ũvai ĩũlũ wa nyũmba ya Ndaviti, o kũvika mbingĩlo ya manzĩ kwelekela ngalĩ ya wumĩlonĩ wa syũa.

38Na nguthu ĩla ĩngĩ yamo ĩla yatũngaa mũvea yamathaũa, nakwa namaatĩĩa, vamwe na nyũnzu ya andũ, ĩũlũ wa ũvai, mbee wa mwako mũtũlu wa mũnyoolo wĩ maiko manene, o kũvika ũvainĩ mũthanthau,

39na mbee wa mbingĩlo ya Evalaimu, na vakuvĩ na mbingĩlo ya tene, na vakuvĩ na mbingĩlo ya makũyũ, na mwako mũtũlu wa mũnyoolo wa Ananeli, na mwako mũtũlu wa mũnyoolo wa Amea, o kũvika mbingĩlo ya malondu: na maũngama mbingĩlonĩ ya nguthu ya asũvĩi.

40Ũu nĩw’o nguthu isu ilĩ sya ala matũngĩaa mũvea nyũmbanĩ ya Ngai syaũngamie, o nakwa na nyunzu ya asumbĩki vamwe nakwa;

41na athembi, Eliakimu, na Maaseia, na Miniamini, na Mikaia, na Elioenai, na Nzekalia, na Aanania, me na masoo;

42na Maaseia, na Semaia, na Eleasali, na Usisi, na Yeoanani, na Malikiya, na Elamu, na Eseli. Na aini maina na wasya mũnene, vamwe na Yesilalia mwinĩthya woo.

43Na mathemba nthembo nyingĩ mũthenya ũsu, na matana; nũndũ Ngai nĩwamatanĩthisye na ũtanu mũnene; o na aka na syana matana: na ĩndĩ ũtanu wa Yelusaleme weew’ĩkie kũasa.

44Na mũthenya ũsu andũ nĩmaiiwe masũvĩe tũsũmba tũla twa mothwii maie, na twa nthembo sya kũkĩlw’a, na twa mosyao ma mbee, na twa ilungu sya ĩkũmi, momban’ye nthĩnĩ watw’o, kwĩanana na mĩũnda ya i ndũa, ilungu ila itw’ĩtwe nĩ mĩao kwondũ wa athembi na Alivai: nũndũ Yuta nĩwatanĩe athembi na Alivai ala mathũkũmaa.

45Na masũvĩaa wĩaĩo wa Ngai woo, na wĩaĩo wa ũthesyo, na aini na asũvĩi ma mĩomonĩ meeka o ũu, kwĩanana na mwĩao wa Ndaviti, na wa Solomoni mwana wake.

46Nũndũ mĩthenyanĩ ya Ndaviti na Asavu ya tene kwaĩ mũtongoesya wa aini, na mbathi sya ndaĩa na mũvea kwa Ngai.

47Na mĩthenyanĩ ya Nzeluvaveli, na mĩthenyanĩ ya Neemia Isilaeli onthe nĩmanenganie ilungu sya aini na asũvĩi ma mĩomonĩ, o ũndũ vata wa kĩla mũthenya weanaa: na maia kĩla kya Alivai; na Alivai maia kĩla kyaĩ kya ana ma Aluni.

← Chapter 11 Jump to: Chapter 13 →