Nehemiah 2

Kamba (Mbivilia) 1956

← Chapter 1 Jump to: Chapter 3 →

1Na kweethĩwa mwei wa Nisani, mwaka wa mĩongo ĩlĩ wa kũsumbĩka kwa mũsumbĩ Alitasasita, yĩla mbinyu yaĩ mbee wake, noosa mbinyu na namũnenga mũsumbĩ. Nakwa ndyaatukya ũthyũ wakwa nĩ mbee wake ĩvinda o na yĩva.

2Na mũsumbĩ angũlya, Ũtukĩtye ũthyũ waku nĩkĩ, na ndwĩ mũwau? Ũũ ti ũndũ ũngĩ ate o woo wa ngoo. Nĩvo ĩndĩ nakwatiwe nĩ w’ĩa mũnene.

3Na namwĩa mũsumbĩ, Mũsumbĩ nĩekale thayũ tene na tene: ũthyũ wakwa ũlea kũtuka nĩkĩ, yĩla ndũa, vandũ va ngunga sya aaĩthe makwa vala vathikawa akw’ũ, nĩ ĩanzo, na mbingĩlo syayo nĩvĩvĩtw’e na mwaki?

4Nĩvo ĩndĩ mũsumbĩ wangũlilye, Wĩenda ata? Na ĩndĩ navoya Ngai wa itunĩ.

5Na namwĩa mũsumbĩ, Ethĩwa mũsumbĩ nũkwendeew’a, na ethĩwa mũthũkũmi waku nĩwonete ũseo vala ũĩ, nĩenda ũndũme ku Yuta, ndũanĩ yĩ ngunga sya aaĩthe makwa vala vathikawa akw’ũ, nĩmĩtũngĩĩe.

6Na mũsumbĩ angũlya (kĩveti kyake nakyo kyekalĩte vamwe nake), Kyalo kyaku kĩkeethĩwa kya ĩvinda yĩana ata? Na ũkasyoka ĩndĩĩ? Na ĩndĩ mũsumbĩ nĩwendeew’e nĩ kũndũma; nakwa namũtavya ĩvinda.

7Na ĩngĩ namwĩa mũsumbĩ, Ethĩwa nĩkũmwendeesya mũsumbĩ, nĩnengwe mavalũa, nĩmatwaĩe makavana ala me mũingo wa ũla Ũsĩ, nĩ kana manenge ũthei nĩvĩte mũvaka nĩvike Yuta;

8na valũa wa kũmũtwaĩa Asavu, mũsũvĩi wa mũtitũ wa mũsumbĩ, nĩ kana anenge mĩtĩ nĩseũvye mĩamba ya mbingĩlo sya nyũmba nene yĩ kĩemo ĩla ĩkwatanĩte na ĩ nyũmba, na ya ũvai wa ndũa, na ya nyũmba ĩla nĩmĩlika. Na mũsumbĩ nĩwanengie, kwĩanana na kw’oko kũseo kwa Ngai wakwa ĩũlũ wakwa.

9Na ĩndĩ navika kwa makavana mũingo wa ũla Ũsĩ, na namanenga mavalũa ma mũsumbĩ. Na mũsumbĩ atũmĩte vamwe nakwa makavuteni ma ita na andũ matũlĩte mbalasi.

10Na yĩla Sanavalati Mũoloni, na mũthũkũmi Tovia, Mũamimoni, meewie ũu, nĩmeewie woo nũndũ nĩkũkĩte mũndũ ũla ũkwenda kũmamanthĩa ana ma Isilaeli ũseo.

11Na ĩndĩ navika Yelusaleme, na naĩ vo mĩthenya ĩtatũ.

12Na nookĩla ũtukũ, nyie na andũ amwe avũthũ; o na ndyaatavya mũndũ o na wĩva ũla Ngai wakwa wĩkĩĩte ngoonĩ yakwa nĩwĩke kwondũ wa Yelusaleme; o na ndyaĩ na nyamũ, ate o ĩla nyamũ natũlĩte.

13Na naumaala ũtukũ na mbingĩlo ya kyandanĩ, nelekele kĩthima kya nzoka, na kũvika mbingĩlo ya kumĩlya vũũ, na nasisya maũvai ma Yelusaleme, ala maomboetwe, na mbingĩlo syamo syaĩ mbĩvye na mwaki.

14Nĩvo ĩndĩ naendeeie kũvika mbingĩlo ya nthongo ya manzĩ o na ndianĩ ya mũsumbĩ: ĩndĩ vatyaĩ vandũ nyamũ ĩla yanguĩte ĩvĩtĩla.

15Nĩvo ĩndĩ nambatie ũtukũ vakuvĩ na kalũsĩ, na nasisya ũvai; na neetulũla, na navota na mbingĩlo ya kyandanĩ, na ũu nasyoka.

16Na asumbĩki matyaamanya vala naendie, kana ũndũ neekie; o na ndyamatavĩtye Ayuti, kana athembi, kana anene me ndaĩa, kana asumbĩki, o na angĩ ala matethasya wĩa.

17Nĩvo ĩndĩ nameie, Nĩmũkwona ũndũ ũũ ũthũku ũla twĩ naw’o, ũndũ Yelusaleme nĩ ĩanzo, na mbingĩlo syayo nĩ mbĩvye na mwaki: ũkai, tũtũngĩĩe ũvai wa Yelusaleme, nĩ kana tũtikethĩwe ma kũvũthw’a ĩngĩ.

18Na namatavya ũndũ wa kw’oko kwa Ngai wakwa kũla kũseo ĩũlũ wakwa, o na ũndũ wa ndeto sya mũsumbĩ ila waneenete nakwa. Nao masya, Tũkĩlei twake. Na ĩndĩ nĩmeekĩie moko moo vinya kwondũ wa wĩa ũsu mũseo.

19Ĩndĩ yĩla Sanavalati Mũoloni, na mũthũkũmi Tovia, Mũamimoni, na Ngesemu Mwalavu, meewie ũu, matũthekeea mũno, na matũvũthĩĩsya, na makũlya, Ũndũ ũũ mũkwĩka nĩ mwaũ? Mũkamũng’endeea mũsumbĩ?

20Nĩvo ĩndĩ namasũngĩie, na namea, Ngai wa ĩtunĩ akatũathima; kwondũ wa ũu ithyĩ athũkũmi make tũkookĩla na kwaka: ĩndĩ inyw’ĩ mũti na kĩanda, kana kĩlungu, kana ũlilikan’yo, Yelusaleme.

← Chapter 1 Jump to: Chapter 3 →