Nehemiah 8

Kamba (Mbivilia) 1956

← Chapter 7 Jump to: Chapter 9 →

1Na andũ onthe moombanĩa vamwe ta mũndũ ũmwe vala vandũ vathanthau vaĩ mbee wa mbingĩlo ya manzĩ; na matavya mũandĩki Esala aete ĩvuku ya mĩao ya Mose, ĩla Yeova weaĩe Isilaeli.

2Na mũthembi Esala aete mĩao ĩsu mbee wa ũmbano, aũme o na aka, na onthe ala maĩ matonya kwĩw’a na kũmanya, mũthenya wa mbee wa mwei wa mũonza.

3Nake ayĩsoma elekele vala vandũ vathanthau vaĩ mbee wa mbingĩlo ya manzĩ kuma kĩoko tene kũvika mũthenya katĩ, e mbee wa aũme na aka, na ala maĩ matonya kũmanya; na matũ ma andũ onthe meethukĩĩsye ĩvuku ya mĩao.

4Na mũandĩki Esala aũngama vandũ vatũlu vakĩtwe na mĩtĩ, vala maseũvisye kwondũ wa ũndũ ũsu; na ũtee wake kwaũngama Matithia, na Sema, na Anaia, na Uliya, na Ilikia, na Maaseia, kw’okonĩ kwake kwa aũme; na kw’okonĩ kwake kwa aka kwaũngama Vetaia, na Misaeli, na Malikiya, na Asumu, na Asivatana, na Nzekalia, na Mesulamu.

5Na Esala avuũa ĩvuku andũ onthe mene (nũndũ aĩ ĩũlũ wa andũ onthe); na yĩla wayĩvuũie, andũ onthe maũngama.

6Na Esala amũtaia Yeova, Ngai mũnene; na andũ onthe masũngĩa, Ameni, Ameni, makyũkĩlya moko moo: na makunamya mĩtwe yoo, na mathaitha Yeova mothyũ moo melekelye nthĩ.

7O na Yesua, na Mbani, na Selevia, na Yamini, na Akuvu, na Savethai, na Otia, na Maaseia, na Kelita, na Asalia, na Yosavati, na Aananu, na Velaia, na Alivai, mamalyũlĩla andũ ĩla mĩao: na andũ no maũngeme vala maĩ.

8Na masoma ĩvukunĩ, o mĩaonĩ ya Ngai, na wasya mũseo; na moonan’ya ũalyũlo, na ĩndĩ mamanya ũndũ masomewe.

9Na Neemia, ũla waĩ ngavana, na mũthembi Esala mũandĩki, na Alivai ala mamamanyĩisye andũ, mamea andũ onthe, Mũnthĩ ũũ nĩ mũtheu kwa Yeova Ngai wenyu; mũtikamete kana kũĩa. Nũndũ andũ onthe nĩmaĩie, yĩla meewie ndeto sya ĩla mĩao.

10Nĩvo ĩndĩ wameie, Ĩeendeei, mũye mathunya, na kũnyw’a kĩla kĩ mũyo, na mũimũtwaĩa kya ũya ũla ũtaseũvĩw’a kĩndũ; nũndũ mũnthĩ ũũ nĩ mũtheu kwa Mwĩaĩi waitũ: o na mũtikethĩwe na woo; nũndũ ũtanu wa Yeova nĩ vinya wenyu.

11Na ĩndĩ Alivai mavindĩthya andũ onthe, makĩmea, Ĩkilĩlyei, nũndũ mũthenya ũũ nĩ mũtheu; o na mũtikethĩwe na woo.

12Na andũ onthe makwata nzĩa mathi, maye, na manyw’e, na matwaanĩe kya ũya, na kũtana mũno, nũndũ nĩmamanyie ndeto ila mataviw’e.

13Na mũthenya wa kelĩ atongoi ma nyũmba sya aaĩthe ma andũ onthe, na athembi, na Alivai, mamũmbanĩa mũandĩki Esala, nĩ kana methukĩĩsye ndeto sya mĩao.

14Na moona kũandĩkĩtwe mĩaonĩ, kana Yeova nĩweaie na kanyw’a wa Mose, ana ma Isilaeli mekalae malwandanĩ mbokanĩ ya mwei wa mũonza;

15na nĩ kana manyaĩĩkye na kũtavan’ya ndũanĩ syoo syonthe, na Yelusaleme, makyasya, Umaalai mũende kĩĩmanĩ, mũlatye mbonge sya mĩthata, na mbonge sya mĩthata ya kĩthekanĩ, na mbonge sya mĩtĩ ya mĩandasi, na mathangũ ma mĩtende, na mbonge sya mĩtĩ mĩthungu, sya kũseũvya malwanda, o tondũ kũandĩkĩtwe.

16Na ĩndĩ andũ maumaala mathi, na maiete, na meeseũvĩsya malwanda, kĩla mũndũ kyalanĩ kya nyũmba yake, na nza syoo, na nza sya nyũmba ya Ngai, na vala vandũ vathanthau va mbingĩlo ya manzĩ, na vandũ vathanthau va mbingĩlo ya Evalaimu.

17Na ũmbano w’onthe wa ala maumĩte kũtavwanĩ maseũvya malwanda, na mekala ala malwandanĩ: nũndũ kuma mĩthenya ya Yesua mwana wa Nuni kũvika mũthenya ũsu ana ma Isilaeli matyaaĩka ũu. Na kwaĩ ũtanu mwingĩ mũno.

18O na mũthenya na mũthenya, kuma mũthenya wa mbee kũvika mũthenya wa mũminũkĩlyo, asomaa ĩvukunĩ ya mĩao ya Ngai. Na malilikana mboka mĩthenya mũonza; na mũthenya wa nyanya kwaĩ ũmbano ũkilĩtye, kwĩanana na ũtw’ĩo.

← Chapter 7 Jump to: Chapter 9 →