Nehemiah 13

Kamba (Mbivilia) 1956

← Chapter 12 Jump to:

1Mũthenya ũsu nĩmasomie ĩvukunĩ ya Mose andũ makĩw’a; na nĩkwoonekie kũandĩkĩtwe nthĩnĩ wayo, atĩ Mũamimoni na Mũmoavi matikalika ũmbanonĩ wa Ngai tene na tene,

2nĩkwĩthĩwa matyaamathaũsya ana ma Isilaeli kĩmũtũ na manzĩ, ĩndĩ matuvie Mbalaamu, amaumanĩe: ĩndĩ Ngai waitũ aalyũla kĩumo kyu kĩthĩwe ũathimo.

3Na kweethĩwa, yĩla meewie mĩao, mavatha kwa Isilaeli nguthu yonthe ya elikya.

4Na ĩndĩ ũu ũtanekĩka, mũthembi Eliasivu, ũla waiiwe asũvĩae tũsũmba twa nyũmba ya Ngai waitũ, nũndũ aĩ na ndũũ na Tovia,

5aĩ anamũseũvĩsya kasũmba kanene, vala tene maiaa nthembo sya mũtu, na ũvumba, na mĩio, na ilungu sya ĩkũmi sya lĩu wa mbaa ngetha, na mbinyu mbĩthĩ, na mauta, ila syeeaĩtwe inengawe Alivai, na aini, na asũvĩi ma mĩomonĩ; na nthembo sya kũkĩlw’a kwondũ wa athembi.

6Ĩndĩ ĩvinda yu yonthe ndyaĩ Yelusaleme; nũndũ nĩnaendie kwa mũsumbĩ mwaka wa mĩongo ĩtatũ na ĩlĩ wa kũsumbĩka kwa Alitasasita mũsumbĩ wa Mbaviloni: na ĩtina wa mĩthenya ĩmwe namwĩtya mũsumbĩ ũthei wa kũthi,

7na navika Yelusaleme, na namanya ũthũku ũla Eliasivu wekie kwondũ wa Tovia, aimũseũvĩsya kasũmba nza sya nyũmba ya Ngai.

8Na ũndũ ũsu wambĩw’ĩthya woo mũno: kwondũ wa ũu nekĩĩsya nza syĩndũ syonthe vyũ sya Tovia kũsyumya kasũmbanĩ.

9Nĩvo ĩndĩ neeaie, na mathesya tũsũmba: na naete vo ĩngĩ mĩio ya nyũmba ya Ngai, vamwe na nthembo sya mũtu na ũvumba.

10Na namanya Alivai matyaanengwa ilungu syoo; na ĩndĩ Alivai na aini, ala matethasya wĩa, nĩmakĩĩte kĩla ũmwe akathi mũũndanĩ wake mwene.

11Na ĩndĩ natetan’ya na asumbĩki, na nakũlya, Nĩkĩ nyũmba ya Ngai ĩtiĩtwe? Na namomban’ya na naia kĩla mũndũ vandũ vake.

12Nĩvo ĩndĩ Yuta onthe maetie kĩlungu kya ĩkũmi kya lĩu wa mbaa ngetha na mbinyu mbĩthĩ na mauta kũla kwiawa syĩndũ.

13Na naia asũvĩi ma ũsũvĩaa kũla kwiawa ũthwii, mũthembi Selemia, na mũandĩki Nzatoki, na wa Alivai, Vetaia: na ĩtina woo kwaĩ Aananu mwana wa Nzakuli, mwana wa Matania; nũndũ nĩmatalwa me kĩthito, na wĩa woo waĩ wa kũmaaanĩsya ana‐a‐ĩthe moo.

14Ame Ngai wakwa, ndilikana ũndũnĩ ũsu, na ndũkavute meko makwa maseo ala neekie kwondũ wa nyũmba ya Ngai wakwa, na kwondũ wa mawĩa mayo.

15Mĩthenya ĩsu nĩnoonie Yuta andũ amwe makĩkinyanga iangĩo sya mbinyu savatonĩ, o na makĩete syove sya ngetha, makuĩthĩtye mang’oi; o na mbinyu, na nzavivũ, na makũyũ, na mĩthenya yonthe ya mĩio, ĩla malikilye Yelusaleme mũthenya wa savato: nakwa namakũsĩĩa mũthenya ũla mathooisye lĩu.

16O na andũ ma Tile nĩmatwĩe vo nthĩnĩ, ala maetie makũyũ, na mĩthemba yonthe ya syĩndũ sya ũthoosya, na mamathooesye ana ma Yuta mũthenya wa savato, o na nthĩnĩ wa Yelusaleme.

17Nĩvo ĩndĩ natetanisye na anene me ndaĩa ma Yuta, na namakũlya, Ũndũ ũũ ũthũku ũla mũkwĩka nĩ mwaũ, na kũvukya mũthenya wa savato?

18Aaĩthe menyu matyaaĩka ũu, na Ngai waitũ ndaatũetee ũthũku ũũ w’onthe, o na ndũanĩ ĩno? Ĩndĩ inyw’ĩ nĩmũetee Isilaeli ũthilĩku ũngĩ ũndũ wa kũvukya savato.

19Na kweethĩwa, yĩla mbingĩlo sya Yelusaleme syambĩlĩlye kũya ũmololi savato ũtanamba kũvika, neeaa mĩomo ĩvingwe, na neeaa ndĩkavingũwe kũvika savato wathela: na naia athũkũmi amwe makwa masũvĩe i mbingĩlo, mũio o na wĩva ndũkalikwe nthĩnĩ mũthenya wa savato.

20Kwondũ wa ũu atandĩthya na athoosya ma mĩthemba yonthe ya syĩndũ makoma ũtee wa Yelusaleme ĩvinda yĩmwe kana kelĩ.

21Nĩvo ĩndĩ namakũsĩĩie, na namakũlya, Mwĩkoma mũthengeee ũvai nĩkĩ? Ethĩwa mũkeeka ũu ĩngĩ ngamũkwata. Kuma ĩvinda yĩu matyaaũka ĩngĩ mũthenya wa savato.

22Nakwa nameaĩa Alivai meevathan’ye methĩwe atheu, na moke masũvĩe i mbingĩlo, mavathan’ye mũthenya wa savato wĩthĩwe mũtheu. Ame Ngai wakwa, ndilikanĩla ũndũ ũsu naw’o, noindeka kwĩanana na ũnene wa ũseo waku wĩ wendo.

23O na mĩthenya ĩsu nĩnoonie Ayuti ala matwaĩte aka ma Asitoti, na ma Amimoni, na ma Moavi:

24na ana moo nĩmaneenaa nyunzu ya kĩthyomo kya Asitoti, na matyaatonya kũneena kĩthyomo kya Ayuti, ĩndĩ kwĩanana na kĩthyomo kya kĩla ũko wa andũ.

25Nakwa natetan’ya nao, na namaumanĩa, na nakũna amwe moo, na nakũa nzw’ĩĩ syoo, na nameavĩthya na Ngai, ngĩmea, Mũtikaamanenge ana moo eĩtu menyu, kana mũtikaamatwaĩe ana menyu eĩtu moo, o na kũmatwaa ũndũ wenyu ene.

26Solomoni mũsumbĩ wa Isilaeli ndaaĩka naĩ maũndũnĩ asu? Ĩndĩ mbaĩnĩ nyingĩ vatyaĩ mũsumbĩ wailyĩ take, na endwa nĩ Ngai wake, na Ngai amũtw’ĩkĩthya mũsumbĩ wa Isilaeli onthe: ĩndĩ o nake aka ma nthĩ ĩngĩ mamũvĩtĩthya.

27Tũkamwĩw’a inyw’ĩ ĩndĩ twĩke ũthũku ũũ w’onthe, tũmũvĩtanĩsye Ngai waitũ tũkĩtwaa aka ma nthĩ ĩngĩ?

28Na mwana ũmwe wa Yoiata, mwana wa mũthembi mũnene Eliasivu, aĩ mũthoni wa Sanavalati Mũoloni: kwondũ wa ũu namũlũngya aume vala nĩĩ.

29Ame Ngai wakwa, malilikane, nĩkwĩthĩwa nĩmavukĩtye ũthembi, na ũtianĩo wa ũthembi, na wa Alivai.

30Ũu nĩw’o namatheisye ngĩmavathan’ya na andũ onthe ma nthĩ ĩngĩ, na naia mosyaĩĩsyo ũndũ wa athembi na ũndũ wa Alivai, kĩla ũmwe wĩanĩ wake;

31na ũndũ wa nthembo ya ngũ, mavinda matw’ĩtwe, na ũndũ wa mosyao ma mbee. Ame Ngai wakwa, ndilikana ũmbĩke ũseo.

← Chapter 12 Jump to: