Nehemiah 3

Kamba (Mbivilia) 1956

← Chapter 2 Jump to: Chapter 4 →

1Nĩvo ĩndĩ mũthembi mũnene Eliasivu wokĩlile vamwe na ana‐a‐ĩthe athembi, na matũngĩĩa mbingĩlo ya malondu; mamĩvathan’ya yĩthĩwe ntheu, na maũngamya mĩomo yayo; o na mamĩvathan’ya kũvika mwako mũtũlu wa mũnyoolo wa Ananeli.

2Na ĩtina wake andũ ma Yeliko maaka. Na ĩtina woo Nzakuli mwana wa Imili aaka.

3Na ana ma Asenaa maaka mbingĩlo ya makũyũ; na meekĩa mĩamba yayo, na maũngamya mĩomo yayo, na meekĩa ivingi syayo, na ivingo syayo.

4Na ĩtina woo Melemothi mwana wa Uliya, mwana wa Akosi, atũngĩĩa. Na ĩtina woo Mesulamu mwana wa Mbelekia, mwana wa Mesesaveli, atũngĩĩa. Na ĩtina woo Nzatoki mwana wa Mbaana atũngĩĩa.

5Na ĩtina woo Atekoa matũngĩĩa; ĩndĩ anene me ndaĩa moo matyaalikya ngingo syoo wĩanĩ wa mwĩaĩi woo.

6Na mbingĩlo ya tene yatũngĩĩwa nĩ Yoiata mwana wa Vasea na Mesulamu mwana wa Mbesoteia; maia mĩamba yayo, na maũngamya mĩomo yayo, na meekĩa ivingi syayo, na ivingo syayo.

7Na ĩtina woo Melatia Mũngiveoni, na Yatoni Mũmelonothi, andũ ma Ngiveoni, na ma Misiva, matũngĩĩa, ala ma kĩvĩla kya ũsumbĩ kya ngavana mũingo wa ũla Ũsĩ.

8Na ĩtina woo Usieli mwana wa Aliaia, wa atwii ma thaavu, atũngĩĩa. Na ĩtina wake Aanania ũmwe wa aseũvya ma manukato atũngĩĩa, nao malũlũmĩlya Yelusaleme o kũvika ũvai mũthanthau.

9Na ĩtina woo Lavaia mwana wa Uulu atũngĩĩa, mũsumbĩki wa nyunzu ya kĩvalo kya Yelusaleme.

10Na ĩtina woo Yetaia mwana wa Alumavu atũngĩĩa, kwelekela nyũmba yake. Na ĩtina wake Atusi mwana wa Asavineia atũngĩĩa.

11Malikiya mwana wa Alimu, na Asuvu mwana wa Vaathi‐moavi, matũngĩĩa kĩlungu kĩngĩ, na mwako mũtũlu wa mũnyoolo wĩ maiko manene.

12Na ĩtina wake Salumu mwana wa Aloesi, mũsumbĩki wa nyunzu ya kĩvalo kya Yelusaleme, atũngĩĩa, we na eĩtu make.

13Anuni na ala matwĩe Nzanoa matũngĩĩa mbingĩlo ya kyandanĩ; mamyaka, na maũngamya mĩomo yayo, na meekĩa ivingi syayo, na ivingo syayo, na matũngĩĩa mĩkono ngili ya ũvai kũvika mbingĩlo ya kumĩlya vũũ.

14Na Malikiya mwana wa Lekavi, mũsumbĩki wa kĩvalo kya Mbethi‐akelemu, atũngĩĩa mbingĩlo ya kumĩlya vũũ; amyaka, na aũngamya mĩomo yayo, na eekĩa ivingi syayo, na ivingo syayo.

15Na Saluni mwana wa Koli‐ose, mũsumbĩki wa kĩvalo kya Misiva, atũngĩĩa mbingĩlo ya nthongo ya manzĩ; amyaka, na amĩvw’ĩka, na aũngamya mĩomo yayo, na eekĩa ivingi syayo, na ivingo syayo, o na ũvai wa ndia ya Siela vakuvĩ na mũũnda wa mũsumbĩ, o kũvika mbasyanĩ ĩla ĩtheeete kuma ndũanĩ ya Ndaviti.

16Na ĩtina wake Neemia mwana wa Asivuki, mũsumbĩki wa nyunzu ya kĩvalo kya Mbethi‐suli, atũngĩĩa kũvika vala velekele ngunga sya Ndaviti vala vathikawa akw’ũ, na kũvika ndia ĩla yaseũviw’e, na kũvika nyũmba ya ila ngũmbaũ.

17Na ĩtina wake Alivai, me na Leumu mwana wa Mbani, matũngĩĩa. Na ĩtina wake Asavia, mũsumbĩki wa nyunzu ya kĩvalo kya Keila, atũngĩĩa, kwondũ wa kĩvalo kyake.

18Na ĩtina wake ana‐a‐ĩthe moo matũngĩĩa, Mbavai mwana wa Enatati, mũsumbĩki wa nyunzu ya kĩvalo kya Keila.

19Na ĩtina wake Eseli mwana wa Yesua, mũsumbĩki wa Misiva, atũngĩĩa kĩlungu kĩngĩ, kwelekela kyambato kya vala vaiawa mĩio ya kaũ vala ũvai weekotele.

20Na ĩtina wake Mbaluku mwana wa Nzavai atũngĩĩa kĩlungu kĩngĩ na ũthangaau, kuma vala ũvai weekotele kũvika mũomo wa nyũmba ya mũthembi mũnene Eliasivu.

21Na ĩtina wake Melemothi mwana wa Uliya mwana wa Akosi atũngĩĩa kĩlungu kĩngĩ, kuma mũomonĩ wa nyũmba ya Eliasivu o kũvika mũthya wa nyũmba ya Eliasivu.

22Na ĩtina wake athembi, andũ ma Ũiĩ, matũngĩĩa.

23Na ĩtina woo Mbenyamini na Asuvu matũngĩĩa kwelekela nyũmba yoo. Na ĩtina woo Asalia mwana wa Maaseia mwana wa Anania atũngĩĩa vakuvĩ na nyũmba yake mwene.

24Na ĩtina wake Mbinui mwana wa Enatati atũngĩĩa kĩlungu kĩngĩ, kuma nyũmba ya Asalia kũvika vala ũvai weekotele, na kũvika kĩkotonĩ.

25Valali mwana wa Usai atũngĩĩa kwelekela vala ũvai weekotele, na mwako mũtũlu wa mũnyoolo ũla wumĩlĩte nyũmbanĩ ya ĩũlũ ya mũsumbĩ, ĩla yĩ vakuvĩ na nza ya kolokolo. Na ĩtina wake Vetaia mwana wa Valosi atũngĩĩa.

26(Na ĩndĩ Anethini nĩmatũaa Oveli, kũvika vandũ velekele mbingĩlo ya manzĩ kwelekela wumĩlonĩ wa syũa, na mwako mũtũlu wa mũnyoolo ũla wumĩlĩte.)

27Na itina wake Atekoa matũngĩĩa kĩlungu kĩngĩ, kwelekela mwako mũnene mũtũlu wa mũnyoolo ũla wumĩlĩte, na kũvika ũvai wa Oveli.

28Athembi matũngĩĩa ĩũlũ wa mbingĩlo ya mbalasi, kĩla ũmwe kwelekela nyũmba yake mwene.

29Na ĩtina woo Nzatoki mwana wa Imeli atũngĩĩa kwelekela nyũmba yake mwene. Na ĩtina wake Semaia mwana wa Sekania, mũsũvĩi wa mbingĩlonĩ ya ngalĩ ya wumĩlonĩ wa syũa, atũngĩĩa.

30Na ĩtina wake Aanania mwana wa Selemia, na Anuni mwana wa thanthatũ wa Nzalavi, matũngĩĩa kĩlungu kĩngĩ. Na ĩtina wake Mesulamu mwana wa Mbelekia atũngĩia kwelekela kasũmba kake.

31Na ĩtina wake Malikiya ũmwe wa atwii ma thaavu atũngĩĩa kũvika nyũmba ya Anethini, na ya athoosya ma mĩio, kwelekela mbingĩlo ya Amivikati, na kũvika kwambata kwa kĩkoto.

32Na atwii ma thaavu ma athoosya ma mĩio matũngĩĩa katĩ wa kwambata kwa kĩkoto na mbingĩlo ya malondu.

← Chapter 2 Jump to: Chapter 4 →