Jeremiah 22

Kamba (MBIVILIA ŨVOO MŨSEO)

← Chapter 21 Jump to: Chapter 23 →

1Mwĩai Ngai nĩwaneenie nakwa ambĩa nĩende nyũmbanĩ ya mũsumbĩ wa Yuta, na ngĩneenea vo nasye atĩĩ,

2“Ĩw'a ũndũ Mwĩai Ngai ũkwasya we mũsumbĩ wa Yuta, we ũla wĩkalĩlaa kĩvĩla kya ũsumbĩ kya Ndeviti, ĩw'a we na athũkũmi maku na andũ maku ala mesĩlaa mĩvĩanĩ ĩno.

3Mwĩai Ngai emwĩa atĩĩ, ‘Umyai sila wa katĩ na kwĩka ũlũngalu. Mũvonokyei ũla ũkũvenwa syĩndũ syake ndakaendee kũthĩnw'a nĩ ũla ũkũmũvena. Mũikameke naĩ kana kũmathĩny'a aeni ala me nthĩ yenyu, kana ala makw'ĩĩwe nĩ aaĩthe, kana aka ndiwa; mũikoaĩe andũ mate na ĩvĩtyo nthĩ ĩno.

4Nũndũ ethĩwa nĩmũkwĩanĩsya mwĩao ũũ, asumbĩ me na ũtonyi ta wa Mũsumbĩ Ndeviti makalikĩlaa mĩvĩanĩ ya nyũmba ĩno, makuĩtwe nĩ makasya ma kaũ na malĩsĩte mbalasinĩ, me vamwe na athũkũmi moo na andũ moo.

5Ĩndĩ mwalea kũmbĩw'a na kwĩanĩsya mwĩao ũũ, nyie Mwĩai Ngai nĩngwĩvĩta na ĩsyĩtwa yakwa mwene, kana nyũmba ĩno ĩkatiwa yĩ nthei.’ ”

6Ũũ nĩw'o Mwĩai Ngai ũkwasya ĩũlũ wa nyũmba ĩno ya mũsumbĩ wa Yuta: “Kwa w'o we wĩ mwanake ta nthĩ ya Ngileati, wanakavĩte ta mĩthya ya iĩma sya Levanoni, ĩndĩ vate ndĩi ngakũtw'ĩkĩthya weũ, ndũa ite andũ.

7Ngaete andũ ma ũkwananga; kĩla ũmwe e na mĩio yake ya kaũ, na makatemanga mĩkũũ yaku ĩla mĩseo vyũ, na kũmĩkya mwakinĩ.

8“Andũ kuma mbaĩnĩ mbingĩ makavĩtĩla ndũanĩ ĩno, na kĩla ũmwe akakũlya ũla ũngĩ atĩĩ, ‘Nĩkĩ Mwĩai Ngai wĩkĩte ndũa ĩno nene ũndũ ũilyĩ ũũ?’

9Makasũngĩanaa atĩĩ, ‘Nĩkwĩthĩwa andũ ma ndũa ĩno nĩmaanangie ũtianĩo wa Mwĩai Ngai, Ngai woo, na mathaitha ngai ingĩ na kũithũkũma.’ ”

10Mũikamũĩĩe Mũsumbĩ Yosia ũla ũnakwie, o na mũikethĩwe na kyeva nũndũ wake, ĩndĩ ĩai kĩĩo kĩ woo nũndũ wa Mũsumbĩ Salumu, ũla wĩtwawa kũasa, nũndũ ndakasyoka ĩngĩ kwona nthĩ ĩno wasyaĩwe.

11Nũndũ ũũ nĩw'o Mwĩai Ngai ũkwasya ĩũlũ wa Salumu mwana wa Yosia mũsumbĩ wa Yuta, ũla wasumbĩkie ĩtina wa ĩthe wake Yosia, na watwaiwe kuma vaa: “Ndakasyoka vaa ĩngĩ,

12ĩndĩ akakw'ĩĩa na kũthikwa nthĩ ĩla watwaiwe e mwove. Ndakasyoka kwona nthĩ ĩno ĩngĩ.”

13“Kyeva nĩ kwake ũla wakaa nyũmba yake kwa nzĩa ĩte ya ũlũngalu, na kwaka tũsũmba twake twa ĩũlũ atekũatĩĩa ũw'o. Ũla ũnengae atũi make wĩa mamũthũkũme mana, na ndekũmaĩva ĩtuvi yoo.

14Ũla ũneenaa na kwasya, ‘Ngeeyakĩa nyũmba nene mũno, yĩ na nyũmba nene sya ĩũlũ,’ na aĩmĩkĩa ndĩlĩsya, na kũmĩseũvya nthĩnĩ na mbwaũ sya mĩkũũ, na kũmĩvaka langi mũtune.

15Wĩsũanĩa ta wĩ mũsumbĩ, nũndũ nĩwakĩte nyũmba ya mĩkũũ nzeo kwĩ nyũmba sya andũ ala angĩ? Ĩthe waku aĩ na kya ũya na kya ũnyw'a, nĩwaatĩĩaa sila wa katĩ na kwĩka ũlũngalu, na kwoou nĩwaendeeie nesa.

16Nĩwokitĩaa ala ngya na athĩni na kwoou nĩwaendeeie nesa. Nĩkũlya, kwĩka ũu ti kw'o kwonanasya kana mũndũ nũmbĩsĩ nyie Mwĩai Ngai?

17Ĩndĩ kwenda kwaku kw'onthe nĩ ũkwate syĩndũ kwa nzĩa ĩtaĩlĩte, wũae andũ mate na ĩvĩtyo, na kũthĩny'a andũ na kũmeka naĩ.”

18Kwoou ũũ nĩ w'o Mwĩai Ngai ũkwasya ĩũlũ wa Yeoiakimu mwana wa Yosia mũsumbĩ wa Yuta: “Yĩla wĩkw'a andũ maikamũĩĩa mayasya, ‘Ĩiaa, mwana-a-ia!’ Kana, ‘Ĩiaa, mwĩĩtu-a-ia!’ O na maikamũĩĩa mayasya, ‘Ĩiaa, mũnene wakwa!’ Kana, ‘Ĩiaa, mũsumbĩ wakwa!’

19Nũndũ akathikwa ta ĩng'oi: Akakusw'a akekw'e nza wa mĩvĩa ya Yelũsalemu!”

20Mwĩai Ngai easya atĩĩ, “Ambatai iĩmanĩ sya Levanoni mũkaĩe, ũkĩlyai wasya wenyu mwĩ iĩmanĩ sya Mbasani, ĩai mwĩ iĩmanĩ sya Avalimu, nũndũ endwa menyu onthe nĩ amine.

21Nĩnaneenie nenyu yĩla mwaendee nesa, ĩndĩ mwanzũngĩa mwambĩa, ‘Tũikwĩthukĩĩsya.’ Ũsu nĩ w'o wĩthĩĩtwe mwĩkalĩle wenyu kuma wananĩ wenyu, nĩmũleaa kũmbĩw'a.

22Atongoi maku onthe makakuwa nĩ kĩseve, na endwa maku makatavwa matwawe nthĩ ya ũeninĩ. Nĩvo ĩndĩ wĩĩw'a nthoni na kũsaanĩw'a, nũndũ wa mothũku onthe ala wĩkĩte.

23We ũla wĩkalaa vandũ vailyĩ ta Levanoni, we ũla wĩkalaa nyũmbanĩ yakĩtwe na mĩkũũ, Ũkaluma mũno yĩla wĩkwatwa nĩ woo, woo ta wa mũndũ mũka ũkwaũnya.

24“O tondũ nyie Mwĩai Ngai nĩ thayũ, we Konia mũsumbĩ wa Yuta, mwana wa Yeoiakimu, nĩkwĩa kana o na kethĩwa we nue ngome ya kwĩkĩa mũulĩ ĩla yĩ kw'okonĩ kwakwa kwa aũme, ngumya ngakwĩkya kũasa.

25Ngakũnengane ũtonyinĩ wa ala mendaa ũkũaa na wa ala ũkĩaa, ũtonyinĩ wa Nevukatinesa mũsumbĩ wa Mbavilonĩ na andũ make.

26Ngakwĩkya nza we vamwe na inyia waku ũla wakũsyaie, mũthi nthĩ ĩngĩ ĩla mũtaasyaĩwa, na nĩkw'o mwĩkw'ĩĩa.

27Mũkenda mũno kũsyoka nthĩ ĩno, ĩndĩ mũikamĩsyoka.”

28Nĩkũlya, nũndũ Konia ũtw'ĩkĩte ta mbisũ ngw'ũ ĩla ĩvũthĩtw'e nĩ andũ, ĩla ĩtasũvĩawa o na vanini? Nĩkĩ ĩndĩ we na syana syake mekĩtw'e kũasa, makathi nthĩ mataamanya o na ĩndĩĩ?

29We nthĩ, nthĩ, nthĩ, ĩthukĩĩsye ũndũ Mwĩai Ngai ũkwasya!

30Mwĩai Ngai easya atĩĩ, “Mũandĩke mũndũ ũũ kwĩthĩwa ta ũte syana, mũndũ ũtakaendeea nesa ĩvindanĩ ya thayũ wake w'onthe, nũndũ vai ũmwe wa ũsyao wake, ũkekalĩla kĩvĩla kya kĩ-ũsumbĩ kya Ndeviti ĩngĩ asumbĩke Yuta.”

← Chapter 21 Jump to: Chapter 23 →