Jeremiah 36

Kamba (MBIVILIA ŨVOO MŨSEO)

← Chapter 35 Jump to: Chapter 37 →

1Mwakanĩ wa kana wa kũsumbĩka kwa Yeoiakimu mwana wa Yosia, mũsumbĩ wa Yuta, Mwĩai Ngai nĩwaneenie na Yelemia amwĩa atĩĩ,

2“Osa ĩvuku ĩkũnze ũandĩke ndeto syonthe ila nĩneenete naku ĩũlũ wa Ĩsilaeli, Yuta na ĩũlũ wa nthĩ syonthe, kuma mũthenya ũla nambĩĩie kũneena naku, ĩvindanĩ yĩla Yosia waĩ mũsumbĩ kũvika ũmũnthĩ.

3Nĩkũtonyeka andũ ma Yuta meew'a ĩũlũ wa ũthũku ũla nĩvangĩte kũmeka, kĩla ũmwe woo akaeka kwĩka mothũku ala wĩkaa, nakwa ngĩmaekea mavĩtyo na naĩ syoo.”

4Kwoou Yelemia nĩweetie Mbaluku mwana wa Nelia, na amũtavya ndeto syonthe ila Mwĩai Ngai wamũtavĩtye, nake Mbaluku aiandĩka syonthe ĩvukunĩ ĩkũnze.

5Nĩvo ĩndĩ Yelemia weeaĩie Mbaluku amwĩa atĩĩ, “Nyie nĩmũsiĩĩe ũkethĩa nditonya kũthi Ĩkalũnĩ.

6Kwoou enda Ĩkalũnĩ mũthenyanĩ wa kũtĩĩa kũya, na ũisomea andũ onthe ndeto isu sya Mwĩai Ngai, ila ngũtavĩtye na ũkaiandĩka ĩvukunĩ yĩu ĩkũnze. O ta ũu isomee andũ onthe ma Yuta ala mokĩte kuma ndũanĩ syoo.

7Nĩkũtonyeka makavoya Mwĩai Ngai na kĩla ũmwe woo aieka kwĩka maũndũ mathũku, nũndũ Mwĩai Ngai aĩtye kana akakany'a andũ aa ũthatunĩ na ũthilĩkunĩ wake mũnene.”

8Mbaluku mwana wa Nelia nĩweekie maũndũ onthe ala mwathani Yelemia wamwĩĩte nĩeke; nĩwasomeie Ĩkalũnĩ ndeto sya Mwĩai Ngai ila syaandĩkĩtwe ĩvukunĩ ĩkũnze.

9Mweinĩ wa kenda wa mwaka wa katano wa kũsumbĩka kwa Yeoiakimu mwana wa Yosia, mũsumbĩ wa Yuta, andũ onthe ala matwĩe Yelũsalemu, na andũ onthe ala maumĩte ndũanĩ sya Yuta makoka Yelũsalemu, nĩmatwie kũtĩĩa kũya nĩ kana mamwĩsũve Mwĩai Ngai.

10Nĩvo ĩndĩ Mbaluku wasomeie andũ onthe ndeto sya Yelemia kuma ĩvukunĩ ĩkũnze. Amasomeie me Ĩkalũnĩ, kasũmbanĩ ka Ngemalia mwana wa mũandĩki Savani, kala kaĩ kĩwanzanĩ kya ngalĩko ya ĩũlũ, ũlikĩlonĩ wa Mũvĩa Mweũ wa Ĩkalũ.

11Yĩla Mikaia mwana wa Ngemalia, mwĩsũkũũe wa Savani weewie ndeto sya Mwĩai Ngai, ila Mbaluku wasomie kuma ĩvukunĩ ĩkũnze,

12nĩwaendie nyũmbanĩ ya mũsumbĩ, alika kasũmbanĩ ka mũandĩki vala anini onthe ma mũsumbĩ mekalĩte. Anini asu maĩ Elisama ũla waĩ mũandĩki, Ndelaia mwana wa Semaia, Elinathani mwana wa Akivoli, Ngemalia mwana wa Savani, Nzetekia mwana wa Aanania, na anini ala angĩ onthe ma mũsumbĩ.

13Mikaia nĩwamatavisye maũndũ onthe ala weewie yĩla Mbaluku wasomeie andũ ĩvuku ĩkũnze.

14Nĩvo ĩndĩ anini onthe ma mũsumbĩ matũmie Yeuuti mwana wa Nethania, mwĩsũkũũe wa Selemia, ũla waĩ mwana wa Kusi athi akatavye Mbaluku atĩĩ, “Ũka na ũyĩete ĩvuku ĩkũnze yĩla wasomea andũ.” Kwoou Mbaluku mwana wa Nelia nĩwaendie vala maĩ akuĩte ĩvuku yĩu ĩkũnze.

15Nĩmamwĩie atĩĩ, “Ĩkala nthĩ na ũitũsomea ĩvuku yĩu.” Kwoou Mbaluku nĩwamasomeie ĩvuku yĩu ĩkũnze.

16Yĩla meewie ndeto isu syonthe, nĩmasianisye me na w'ĩa, na meea Mbaluku atĩĩ, “No nginya tũtavye mũsumbĩ ndeto isu.”

17Nĩvo ĩndĩ makũlilye Mbaluku, “Tũtavye, ũandĩkie ndeto isu syonthe ata? Yelemia nĩ we ũkũtavisye kĩla ũkũandĩka?”

18Mbaluku nĩwamasũngĩie amea atĩĩ, “Ĩĩ, Yelemia andavisye ndeto ii syonthe, nakwa naiandĩka na ingi ĩvukunĩ yĩĩ ĩkũnze.”

19Nĩvo ĩndĩ anini ma mũsumbĩ meeie Mbaluku, “We na Yelemia endai mũkevithe, na mũiketĩkĩle mũndũ o na wĩva amanye vala mũĩ.”

20Anini asu ma mũsumbĩ nĩmaiie ĩvuku yĩu ĩkũnze kasũmbanĩ ka Elisama ũla waĩ mũandĩki, na mathi kĩwanzanĩ kya nza vala mũsumbĩ waĩ, na mamũtavya maũndũ asu onthe.

21Nĩvo ĩndĩ mũsumbĩ watũmie Yeuuti athi akaete ĩvuku yĩu ĩkũnze, nake athi kũyosa kasũmbanĩ ka Elisama ũla waĩ mũandĩki. Yeuuti nĩwasomeie mũsumbĩ ĩvuku yĩu vamwe na anini make onthe ala maũngamĩte vakuvĩ nake.

22Ĩvinda yĩu kwaĩ mwei wa kenda, na mũsumbĩ ailyĩ nyũmbanĩ yake ĩla wekalaa ĩvinda ya mbevo, na nĩwootaa mwaki waĩ ĩikonĩ.

23Yeuuti amina kũsoma mĩthĩa ĩtatũ kana ĩna, mũsumbĩ nĩwatilaa mĩthĩa ĩsu na kavyũ akamĩkya mwakinĩ ũsu wootaa. Nĩwaendeeie kwĩka ũu nginya ĩvuku yĩu ĩkũnze yonthe yavĩĩa ĩikonĩ yĩu yathela.

24Ĩndĩ o na kau mũsumbĩ na anini make onthe nĩmeewie ndeto isu syonthe, vai ũmwe woo waakwatwa nĩ w'ĩa kana akatembũanga ngũa syake nĩ kyeva.

25O na kau Elinathani, Ndelaia, na Ngemalia nĩmeesũvie mũsumbĩ ndakavĩvye ĩvuku yĩu ĩkũnze, ndaamethukĩĩsya.

26Mũsumbĩ nĩweeaĩie Yelameeli mwana wake, Selaia mwana wa Anzilieli, na Selemia mwana wa Aviteeli makwate mũandĩki Mbaluku na mwathani Yelemia. Ĩndĩ Mwĩai Ngai aĩ anamavitha.

27Mũsumbĩ amina kũvĩvya ĩvuku ĩkũnze yĩla Mbaluku waandĩkĩte ndeto ila watavĩtw'e nĩ Yelemia, Mwĩai Ngai nĩwaneenie na Yelemia amwĩa atĩĩ,

28“Osa ĩvuku yĩngĩ ĩkũnze na ũiyĩandĩka ndeto ila waandĩkĩte ĩvukunĩ yĩla ya mbee, yĩla Yeoiakimu mũsumbĩ wa Yuta wavĩvisye.

29O ta ũu tavya Yeoiakimu mũsumbĩ wa Yuta ũmwĩe nyie Mwĩai Ngai nĩmwĩa atĩĩ, Nũvĩvisye ĩvuku ĩkũnze, na wakũlya Yelemia, “Nĩkĩ ũandĩkĩte ĩvukunĩ yĩĩ kana vate nzika mũsumbĩ wa Mbavilonĩ nũkũka na kwananga nthĩ ĩno, na kũaa andũ mayo na nyamũ syayo?

30Kwoou nyie Mwĩai Ngai nĩkwĩa kana we Mũsumbĩ Yeoiakimu, vai nzyawa yaku ĩkekalĩla kĩvĩla kya kĩ-ũsumbĩ kya Ndeviti. Kimba kyaku kĩkekw'a nza kĩvye nĩ syũa mũthenya na kĩikwatwa nĩ mbevo ũtukũ.

31Ngakũkany'a we vamwe na nzyawa syaku na anini maku nũndũ wa mavĩtyo menyu. Inyw'onthe vamwe na andũ ma Yuta na ala mekalaa Yelũsalemu, ngamũetee mothũku ala nathanie kana ngaete nũndũ mũyaaĩthukĩĩsya.”

32Kwoou Yelemia nĩwoosie ĩvuku yĩngĩ ĩkũnze na ayĩnenga mũandĩki Mbaluku mwana wa Nelia. Mbaluku nĩwayĩandĩkie ndeto syonthe ila wataviw'e nĩ Yelemia, ila syaĩ ĩvukunĩ ya mbee ĩkũnze, yĩla Yeoiakimu mũsumbĩ wa Yuta wavĩvisye, na ndeto ingĩ mbingĩ iilyĩ ta isu syongeleelwa.

← Chapter 35 Jump to: Chapter 37 →