Jeremiah 40

Kamba (MBIVILIA ŨVOO MŨSEO)

← Chapter 39 Jump to: Chapter 41 →

1Mwĩai Ngai nĩwaneenie na Yelemia, ĩtina wa Nevusalatani mũtongoi wa asikalĩ ala masungaa mũsumbĩ wa Mbavilonĩ amũthaĩsya ndũanĩ ya Lama. Mũtongoi ũsu wa asikalĩ nĩwoosie Yelemia ovetwe na nyololo, e vamwe na andũ angĩ onthe ala makwatĩtwe kuma Yelũsalemu na Yuta na matwaĩtwe Mbavilonĩ me ove.

2Mũtongoi ũsu wa asikalĩ ma mũsumbĩ nĩwoosie Yelemia na amwĩa atĩĩ, “Mwĩai Ngai, Ngai waku nĩwawetie kana ũthũku ũũ ũkeekĩka nthĩ ĩno.

3Yu Mwĩai Ngai nũtumie ũthũku ũsu wĩthĩwa, na nĩwĩkĩte kwĩanana na ũndũ waisye. Ũndũ ũũ ũmũkwatĩte nũndũ inyw'onthe nĩmwamũvĩtĩisye Mwĩai Ngai na mwalea kũmwĩw'a.

4Ĩndĩ ũmũnthĩ nĩngũũthasya nyololo ila ikwovete moko. Ethĩwa nũkwenda tũendany'e Mbavilonĩ, ũka na ngakũsũvĩa. Ĩndĩ ethĩwa ndũkwenda, ndũkoke. Wĩna mwanya wa kũnyuva vala ũkwenda kũthi nthĩ ĩno; enda vala ũkwenda.”

5Ĩndĩ Yelemia atanamba kũthi, Nevusalatani nĩwaneenie nake ĩngĩ amwĩa atĩĩ, “Syoka kũla kwĩ Ngetalia mwana wa Aikamu, mwĩsũkũũe wa Savani, ũla mũsumbĩ wa Mbavilonĩ ũtw'ĩkĩthĩtye ngavana wa ndũa sya Yuta. Enda ũkekalany'e nake na andũ ala angĩ, kana ũthi vala ũkwenda.” Nĩvo ĩndĩ mũtongoi ũsu wa asikalĩ wanengie Yelemia lĩu na mũthĩnzĩo na amũeka athi.

6Kwoou Yelemia nĩwaendie Misiva kũla kwĩ Ngetalia mwana wa Aikamu, na ekalany'a nake vamwe na andũ ala angĩ matiĩtwe nthĩ ĩsu.

7Atongoi onthe ma asikalĩ na asikalĩ moo ala matiĩtwe nthĩ ya Yuta, nĩmeewie kana mũsumbĩ wa Mbavilonĩ nũtw'ĩkĩthĩtye Ngetalia mwana wa Aikamu ngavana wa nthĩ ĩsu, na akamũnenga wĩa wa kũũngamĩa aũme, aka na syana ala nĩmo ngya vyũ nthĩ ĩsu, na mataatavwa makatwawa Mbavilonĩ.

8Atongoi asu nĩmookie Misiva kũla kwĩ Ngetalia. Atongoi asu maĩ Ĩsumaeli mwana wa Nethania, Yoanani na Yonathani ana ma Kalea, Selaia mwana wa Tanumethi, ana ma Evai kuma Netovathi, Yesania mwana wa mũndũ waumĩte Maaka. Atongoi asu maĩ vamwe na asikalĩ moo.

9Ngetalia nĩweevĩtie aĩkĩĩthye atongoi asu na asikalĩ aimea atĩĩ, “Mũikakĩe kũthũkũma andũ ma Mbavilonĩ; ĩkalai nthĩ ĩno na kũthũkũma mũsumbĩ wa Mbavilonĩ, na maũndũ menyu nĩmekũendeea nesa.

10Nyie nĩngwĩkala Misiva, nĩ kana nĩneenae na andũ ma Mbavilonĩ yĩla mekũka kũla tũĩ. Ĩndĩ inyw'ĩ ũmbany'ai na kwia ndivai, matunda, na mauta na mũyĩkala ndũanĩ ila mwosete mũkamesya.”

11O ta ũu Ayuti onthe ala maĩ nthĩ ya Moavi, ya Amimoni, ya Etomu, na nthĩ ingĩ nĩmeewie kana mũsumbĩ wa Mbavilonĩ nũtiĩte andũ amwe moo maendee kwĩkala Yuta, na kana nũtw'ĩkĩthĩtye Ngetalia ngavana woo.

12Kwoou Ayuti asu nĩmaumie kw'onthe kũla manyaĩĩkĩw'e na masyoka nthĩ ya Yuta. Nĩmaendie Misiva vala ve Ngetalia, na me vau moombany'a ndivai mbingĩ mũno na matunda.

13Ĩtina wa maũndũ asu, Yoanani mwana wa Kalea na atongoi onthe ma asikalĩ ala matiĩtwe Yuta nĩmookie Misiva kũla kwĩ Ngetalia,

14na mamũkũlya atĩĩ, “We nĩwĩsĩ kana Mbaalisi mũsumbĩ wa Aamimoni nũtũmĩte Ĩsumaeli mwana wa Nethania oke ũkũaa?” Ĩndĩ Ngetalia ndaaĩkĩĩa ndeto sya andũ asu.

15Nĩvo ĩndĩ Yoanani mwana wa Kalea waneenie na Ngetalia me Misiva kwa kĩmbithĩ amwĩa atĩĩ, “Eka nĩthi ngoae Ĩsumaeli mwana wa Nethania, na vai mũndũ wĩmanya. Ekũaĩa kĩ na kũtuma Ayuti onthe ala mombanĩe vala ũĩ manyaĩĩka, na o ta ũu aituma andũ ma Yuta ala matialĩte mathela?”

16Ĩndĩ Ngetalia nĩweeie Yoanani atĩĩ, “Ndũkeke ũndũ ũsu, nũndũ wĩneena ũvũngũ ĩũlũ wa Ĩsumaeli!”

← Chapter 39 Jump to: Chapter 41 →