Jeremiah 52

Kamba (MBIVILIA ŨVOO MŨSEO)

← Chapter 51 Jump to:

1Nzetekia atw'ĩkie mũsumbĩ wa Yuta e na ũkũũ wa myaka mĩongo ĩlĩ na ũmwe. Asumbĩkie myaka ĩkũmi na ũmwe e Yelũsalemu. Nyinyia wake eetawa Amutali mwĩĩtu wa mũndũ ũngĩ weetawa Yelemia, ũla watwĩe ndũanĩ ya Livina.

2Nzetekia nĩwavĩtĩisye Mwĩai Ngai o tondũ Mũsumbĩ Yeoiakimu weekie.

3Mwĩai Ngai nĩwathatiw'e mũno nĩ andũ ma Yelũsalemu na ma Yuta, nginya amalũngya mauma mbee wake. Nzetekia nĩwang'endeie Nevukatinesa mũsumbĩ wa Mbavilonĩ.

4Kwoou Nevukatinesa ookany'a na asikalĩ make na mavithũkĩa Yelũsalemu mũthenya wa ĩkũmi wa mwei wa ĩkũmi, mwakanĩ wa kenda wa kũsumbĩka kwa Nzetekia. Nĩmeelingĩlile ndũa ĩsu na maaka ivumbu kũmĩthyũlũlũka.

5Kwoou ndũa ya Yelũsalemu nĩyekalile yĩlingĩlĩtwe nĩ amaitha, nginya mwakanĩ wa ĩkũmi na ũmwe wa kũsumbĩka kwa Nzetekia.

6Mũthenyanĩ wa kenda wa mwei wa kana mwakanĩ o ũsu, yũa nĩyaingĩvie mũno weethĩa vai lĩu o na ũmwe ũtialĩte ndũanĩ ĩsu andũ matonya kũya.

7O na kau asikalĩ ma Mbavilonĩ nĩmeelingĩlĩte Yelũsalemu, ũkũta wa ndũa ĩsu nĩwavũthũiwe, na asikalĩ onthe makĩa ũtukũ mathi na nzĩa ĩla yesĩlĩte mũũndanĩ wa mũsumbĩ, na maumaalĩla mũvĩanĩ ũla waĩ katĩ wa ngũta isu syelĩ. Nĩmakĩie melekele Mwandanĩ wa Yolotani.

8Ĩndĩ asikalĩ ma Mbavilonĩ nĩmaatĩĩie Mũsumbĩ Nzetekia, na mamũkwatĩa ũiĩnĩ ũla waĩ vakuvĩ na ndũa ya Yeliko. Asikalĩ onthe ma Nzetekia nĩmasembie manyaĩĩka mamũtia.

9Nĩvo ĩndĩ asikalĩ ma Mbavilonĩ makwatie Mũsumbĩ Nzetekia mamũtwaa ndũanĩ ya Livila, ĩla yĩ kĩsionĩ kya nthĩ ya Amathi, kũla kwĩ mũsumbĩ wa Mbavilonĩ, nake amũsilĩla.

10Kũu Livila mũsumbĩ wa Mbavilonĩ nĩwooaie ana ma Nzetekia asyaĩĩsye, na o ta ũu ooaa atongoi onthe ma Yuta.

11Ĩtina wa ũu Nevukatinesa nĩwavũthũangie Nzetekia metho, amwĩkĩa mbĩngũ, na amũtwaa Mbavilonĩ amũvingĩa yela, na Nzetekia ekala vo nginya mũthenya ũla wakwie.

12Mũthenya wa ĩkũmi wa mwei wa katano mwakanĩ wa Ĩkũmi na kenda wa kũsumbĩka kwa Nevukatinesa mũsumbĩ wa Mbavilonĩ, Nevusalatani mũtongoi wa asikalĩ ala masungaa mũsumbĩ wa Mbavilonĩ, mũthũkũmi wa mũsumbĩ nĩwookie Yelũsalemu.

13Nĩwavĩvisye Ĩkalũ, nyũmba ya kĩ-sumbĩ na nyũmba syonthe sya Yelũsalemu; avĩvisye nyũmba syonthe ila syaĩ vata.

14Asikalĩ onthe ma Mbavilonĩ matongoew'e nĩ mũtongoi wa asikalĩ ala masungaa mũsumbĩ, nĩmaomboangie ngũta syonthe ila syeelingĩlĩte Yelũsalemu.

15Nevusalatani nĩwakuie amwe katĩ wa andũ ala maĩ ngya mũno, na andũ ala angĩ onthe matialĩte Yelũsalemu, vamwe na andũ ala maĩ na ũmanyi wa kũseũvya syĩndũ, na ala maumĩte Yelũsalemu makathi kũla kwĩ mũsumbĩ wa Mbavilonĩ. Akuie andũ asu amatwaa nthĩ ya ũeninĩ me ove.

16Ĩndĩ Nevusalatani nĩwatialilye andũ amwe katĩ wa ala maĩ ngya mũno ma Yuta, nĩ kana mathũkũmae mĩũndanĩ ya mĩsavivũ na mĩũndanĩ ĩla ĩngĩ.

17Andũ ma Mbavilonĩ nĩmatilangile ituĩ sya kyũma kya mbulonzi, na makasya ala maĩ Ĩkalũnĩ, vamwe na ĩtangi ĩnene ya mbulonzi syatw'ĩka ilungu, na makua mbulonzi ĩsu yonthe mamĩtwaa Mbavilonĩ.

18O ta ũu nĩmakuie mĩko, na syĩndũ sya kwĩkĩa mũu ila syatũmĩawa kũthesya kĩthembeo, syĩndũ ila syatũmĩawa kũvosya taa, mbakũli ila syatũmĩawa kwanyĩlĩĩlya nthakame ya nyamũ ila syathembawa, mbakũli ila syatũmĩawa kũvĩvya ũvani, na mĩio ĩla ĩngĩ yonthe ya mbulonzi yatũmĩawa Ĩkalũnĩ.

19Nevusalatani nĩwakuie mĩio yonthe ĩla yaseũvĩtw'e na thaavu kana silĩva. Mĩio ĩsu yaĩ tũvakũli, syĩndũ sya kwoka mwaki, tũlaĩ, mbakũli ila syatũmĩawa kwanyĩlĩĩlya nthakame ya nyamũ ila syathembawa, syĩndũ sya kwilĩĩla taa, mbakũli ila syatũmĩawa kũvĩvya ũvani na mbakũli ila syatũmĩawa kwĩta nthembo ya ndivai.

20Mbulonzi ĩla Solomoni watũmĩie kũseũvya ituĩ ilĩ, ĩtangi na ila nzaũ ĩkũmi na ilĩ yailĩĩlwe, na makasya, yaĩ ngito ũkethĩa ndĩtonya kũthimĩka.

21Ituĩ syelĩ syailyĩ ũndũ ũmwe; kĩla kĩmwe kyaĩ na ũasa wa mita nyanya, na ũthanthau wakyo kũkĩthyũlũlũka waĩ mita itano na sendimita mĩongo ĩtatũ. Syaĩ na ĩima nthĩnĩ na kĩemo kyasyo kyaĩ sendimita mũonza na nyusu.

22Kĩla kĩmwe kyaĩ na ngunĩko ya mbulonzi mũthya. Ũasa wa ngunĩko ĩsu waĩ mita ilĩ na sendimita mĩongo ĩlĩ. Kĩla ngunĩko yaanakavĩtw'e kwa kũmbĩĩwa matunda ma makũngũmanga mamĩlingĩlĩte, onthe maseũvĩtw'e na mbulonzi.

23Ndeenĩ wa ituĩ isu vaĩ na makũngũmanga mĩongo kenda na thanthatũ. Ũtalo wa makũngũmanga onthe waĩ ĩana na kwaĩ na mawanake ũtee wamo.

24Nevusalatani mũtongoi wa asikalĩ ala masungaa mũsumbĩ nĩwakwatie Selaia Mũthembi Mũnene, Nzevania mũnini wa Mũthembi Mũnene, na athũkũmi ala angĩ atatũ masungaa ũlikĩlo wa Ĩkalũ, na amatwaa me ove.

25O ta ũu katĩ wa andũ ala maĩ ndũanĩ ya Yuta, Nevusalatani nĩwakuie mũndũ ũla waũngamĩe asikalĩ na atai mũonza ma mũsumbĩ. Nĩwakuie mũandĩki wa mũnene wa asikalĩ, ũla waũngamĩe wĩa wa kũandĩka masyĩtwa ma andũ ma nthĩ ya Yuta, na andũ angĩ mĩongo thanthatũ ala meethĩiwe ndũanĩ.

26Nevusalatani akwatie andũ asu amatwaa me ove kũla kwĩ Mũsumbĩ wa Mbavilonĩ, ũla waĩ ndũanĩ ya Livila

27kĩsionĩ kya nthĩ ya Amathi. Me vau mũsumbĩ nĩweeaie makũnwe moawe. Kwoou andũ ma Yuta nĩmatwaiwe Mbavilonĩ me ove, maumw'a nthĩ yoo,

28Ũũ nĩw'o ũtalo wa andũ ala Nevukatinesa watavie amatwaa me ove: Mwakanĩ wa mũonza wa kũsumbĩka kwake atavie Ayuti ngili itatũ na mĩongo ĩlĩ na atatũ;

29mwakanĩ wa ĩkũmi na nyanya wa kũsumbĩka kwake, atavie Ayuti maana nyanya na mĩongo ĩtatũ na elĩ kuma Yelũsalemu.

30Mwakanĩ wa mĩongo ĩlĩ na itatũ wa kũsumbĩka kwa Nevukatinesa, Nevusalatani ũla waĩ mũtongoi wa asikalĩ ala masungaa mũsumbĩ atavie Ayuti maana mũonza na mĩongo ĩna na atano. Kwoou andũ ala matavĩtwe onthe maĩ ngili inya na maana thanthatũ.

31Mwakanĩ wa mĩongo ĩtatũ na mũonza wa kwovwa kwa Yeoiakini Mũsumbĩ wa Yuta, mweinĩ wa ĩkũmi na ilĩ, mũthenyanĩ wa mĩongo ĩlĩ na itano wa mwei ũsu, Evili-melotaki nĩwatw'ĩkie mũsumbĩ wa Mbavilonĩ. Nĩweew'ĩie Yeoiakini tei na amũthasya kuma yela.

32Nĩweekie Yeoiakini nesa kwa kũmũnenga kĩvĩla kya ndaĩa, mbee wa asumbĩ ala angĩ maĩ vamwe nake Mbavilonĩ.

33Yeoiakini nĩwaumisye ngũa sya yela, na ĩvindanĩ yonthe ya thayũ wake aĩsanĩaa na mũsumbĩ.

34Kĩla mũthenya Mũsumbĩ Evili-melotaki, nĩwanengae Yeoiakini kĩla waaĩlĩte kũtũmĩa kwondũ wa mavata make ĩvindanĩ yonthe ya thayũ wake.

← Chapter 51 Jump to: