Jeremiah 35

Kamba (MBIVILIA ŨVOO MŨSEO)

← Chapter 34 Jump to: Chapter 36 →

1Ĩvindanĩ yĩla Yeoiakimu mwana wa Yosia waĩ mũsumbĩ wa Yuta, Mwĩai Ngai nĩwaneenie na Yelemia amwĩa atĩĩ,

2“Enda kũla kwĩ andũ ma mũsyĩ wa Lekavi ũkaneene namo, na ũimaete kasũmbanĩ kamwe ka Ĩkalũ yakwa nyie Mwĩai Ngai na ũimanenga ndivai manyw'e.”

3Kwoou nĩneetie Ya-asania mwana wa mũndũ ũngĩ weetawa Yelemia mwana wa Avasinia, na ana-a-ĩthe make, ana make na ala angĩ onthe ma mũsyĩ wa Lekavi.

4Nĩnamatwaie Ĩkalũnĩ ya Mwĩai Ngai kasũmbanĩ ka ana ma mwathani Anani mũndũ wa Ngai, ũla waĩ mwana wa Ikitalia. Kasũmba kau kaĩ vakuvĩ na kasũmba ka atongoi, ĩũlũ wa kasũmba ka Maaseia ũla wasiasya molikĩlo ma Ĩkalũ na waĩ mwana wa Salumu.

5Nĩvo ĩndĩ naeteie Alekavi mbakũli syusĩe ndivai na ikombe na namea atĩĩ, “Nyw'ai ndivai.”

6Ĩndĩ nĩmanzũngĩie mambĩa atĩĩ, “Tũinyw'a ndivai, nũndũ ũmae witũ Yonatavu mwana wa Lekavi nĩwatwĩaĩie atwĩa, ‘Mũikaanyw'e ndivai, inyw'ĩ kana nzyawa syenyu ĩvindanĩ yonthe ya thayũ wenyu.

7O ta ũu mũyaĩlĩte kwaka nyũmba kana kũĩma kana kwĩthĩwa na mĩũnda ya mĩsavivũ, ĩndĩ mũkekalaa maeemanĩ kĩla ĩvinda. Nĩvo ĩndĩ mwĩĩkala mĩthenya mingĩ mwĩ nthĩ ĩla mũtũaa mwĩ aeni.’

8Nĩtwĩkĩte maũndũ onthe ala Yonatavu ũmae waitũ mwana wa Lekavi watwĩaĩie. Ithyĩ, iveti sitũ, ana na eĩtu maitũ tũyaanyw'a ndivai,

9kana kwaka nyũmba sya kwĩkala. Tũi na mĩũnda ya mĩsavivũ, kana mĩũnda ya kũĩma, kana mbeũ sya kũvanda.

10Twĩkalaa maeemanĩ na nĩtwĩkĩte maũndũ onthe ala Yonatavu ũmae waitũ watwĩaĩie.

11Ĩndĩ yĩla Nevukatinesa mũsumbĩ wa Mbavilonĩ wavithũkĩie nthĩ ĩno, nĩtwaisye kana nĩtũthi Yelũsalemu nĩ kana tũkĩe asikalĩ ma Mbavilonĩ na ma Silia. Kĩu nĩkyo kĩtumĩte twĩkala Yelũsalemu.”

12Nĩvo ĩndĩ Mwĩai Ngai waneenie nakwa ambĩa atĩĩ,

13“Nyie Mwĩai Ngai Mwene Ũtonyi W'onthe, Ngai wa Ĩsilaeli nĩkwĩa enda kũla kwĩ andũ ma Yuta na ala matwĩe Yelũsalemu ũkamee nyie Mwĩai Ngai nĩmakũlya atĩĩ, ‘Mũitonya kũkwata momanyĩsyo na kwĩw'a ndeto syakwa?

14Yonatavu mwana wa Lekavi nĩweeaĩie nzyawa syake maikanyw'e ndivai, na mwĩao ũsu nĩwĩanĩaw'a. Kũvika ũmũnthĩ mainyusaa ndivai, nũndũ nĩmeanĩasya mwĩao wa ũmae woo. Nĩnĩneenete nenyu ĩngĩ na ĩngĩ, ĩndĩ mũyaambĩw'a.

15Nĩnaendeeie kũtũma athũkũmi makwa athani kũla mũĩ ĩngĩ na ĩngĩ, na nĩmamwĩaa kĩla ũmwe wenyu nĩaekane na maũndũ mathũku ala wĩkaa, na kwĩkaa maũndũ ala maĩlĩte. Nĩmamwĩie nĩmũeke kũthaitha na kũthũkũma ngai ingĩ, nĩ kana mũendee kwĩkala nthĩ ĩla namũnengie mwĩ na aaũmae menyu. Ĩndĩ mũyaambĩthukĩĩsya kana mũkambĩw'a.

16Ana ma Yonatavu mwana wa Lekavi nĩmeanĩasya mwĩao ũla ũmae woo wamanengie, ĩndĩ andũ aa maimbĩw'aa.

17Kwoou nyie Mwĩai Ngai, Ngai Mwene Ũtonyi W'onthe, Ngai wa Ĩsilaeli nĩasya kana nĩngũetee andũ ma Yuta, na andũ onthe ala matwĩe Yelũsalemu mothũku onthe ala nĩneenete ngasya kana ngamaetee. Nũndũ nĩnĩneenete namo na makalea kũmbĩthukĩĩsya, na nĩnĩmetĩte na makalea kwĩtĩka.’ ”

18Nĩvo ĩndĩ Yelemia weeie andũ ma mũsyĩ wa Lekavi atĩĩ, “Ũũ nĩw'o Mwĩai Ngai Mwene Ũtonyi W'onthe, Ngai wa Ĩsilaeli ũkũmwĩa inyw'ĩ andũ ma mũsyĩ wa Lekavi, ‘Nĩmwĩanĩĩtye mwĩao wa ũmae wenyu Yonatavu, na mũkaatĩĩa motw'ĩo make onthe, na mũkeka maũndũ onthe ala wamwĩaĩie.

19Kwoou nyie Mwĩai Ngai Mwene Ũtonyi W'onthe, Ngai wa Ĩsilaeli nĩasya kana kĩla ĩvinda Yonatavu mwana wa Lekavi akeethĩawa na nzyawa ya mũndũ-ũme ya kũnthũkũma.’ ”

← Chapter 34 Jump to: Chapter 36 →