Jeremiah 39

Kamba (MBIVILIA ŨVOO MŨSEO)

← Chapter 38 Jump to: Chapter 40 →

1Mweinĩ wa ĩkũmi wa mwaka wa kenda wa kũsumbĩka kwa Nzetekia mũsumbĩ wa Yuta, Nevukatinesa mũsumbĩ wa Mbavilonĩ nĩwookie na asikalĩ make onthe kũvithũkĩa Yelũsalemu na mamĩthyũlũlũka.

2Mũthenyanĩ wa kenda wa mwei wa kana mwaka wa ĩkũmi na ũmwe wa kũsumbĩka kwa Nzetekia, ũkũta wa ndũa ya Yelũsalemu nĩwavũthũiwe.

3Yĩla Yelũsalemu yakwatiwe, anini onthe ma mũsumbĩ wa Mbavilonĩ nĩmookie na mekala Mũvĩanĩ wa Katĩ. Atongoi asu maĩ Nelikali-saleseli, Samikali-nevo, Salisekimu ũla waĩ mũnene wa asikalĩ, Nelikali-saleseli ũla waĩ mũtai mũnene wa mũsumbĩ, vamwe na anini ala angĩ ma mũsumbĩ wa Mbavilonĩ.

4Yĩla Nzetekia mũsumbĩ wa Yuta na asikalĩ make onthe moonie anini asu ma mũsumbĩ wa Mbavilonĩ, nĩmasembie makĩa. Maumie ndũanĩ ũtukũ mesĩlĩte nzĩanĩ ĩla yaĩ mũũndanĩ wa mũsumbĩ, maumaalĩla mũvĩanĩ ũla waĩ katĩ wa ngũta ilĩ. Makĩie melekele Mwandanĩ wa Yolotani.

5Ĩndĩ asikalĩ ma Mbavilonĩ nĩmamaatĩĩie na makwatĩa Nzetekia ũiĩnĩ wa Yeliko. Nĩmamũtwaie kũla kwĩ Nevukatinesa mũsumbĩ wa Mbavilonĩ, ũla waĩ ndũanĩ ya Livila kĩsionĩ kya Amathi, vala Nevukatinesa waumisye ũtw'ĩo ĩũlũ wake.

6Nevukatinesa nĩwooaĩie ana ma Nzetekia vau Livila Nzetekia asyaĩĩsye. O ta ũu nĩwooaie atongoi onthe ma Yuta.

7Nĩwavũthũangie Nzetekia metho, na amwova na mbĩngũ nĩ kana amũtwae Mbavilonĩ.

8Andũ ma Mbavilonĩ nĩmavĩvisye nyũmba ya mũsumbĩ, na nyũmba sya andũ ala angĩ, na maomboanga ngũta sya Yelũsalemu.

9Nĩvo ĩndĩ Nevusalatani mũtongoi wa asikalĩ ala masungaa mũsumbĩ wakwatie andũ ala angĩ onthe matialĩte ndũanĩ ya Yelũsalemu, na amatwaa Mbavilonĩ me ove. O ta ũu nĩwatwaie onthe ala meenenganĩte kũla ũĩ, na andũ ala angĩ onthe.

10Ĩndĩ Nevusalatani nĩwatiie nthĩ ya Yuta andũ amwe ala maĩ ngya na mataĩ kĩndũ, na amanenga mĩũnda ya mĩsavivũ na o ta ũu amanenga mĩũnda ĩngĩ.

11Nevukatinesa mũsumbĩ wa Mbavilonĩ nĩweeaĩie Nevusalatani mũtongoi wa asikalĩ ala masungaa mũsumbĩ ĩũlũ wa Yelemia amwĩa atĩĩ,

12“Enda ũkose Yelemia na ũimũsũvĩa nesa; ndũkamwĩke ũndũ mũthũku, ĩndĩ mwĩke ũndũ ũkũkwĩa.”

13Kwoou Nevusalatani mũtongoi wa asikalĩ ala masungaa mũsumbĩ, Nevusasivani ũla waĩ mũnene wa asikalĩ, Nelikali-saleseli ũla waĩ mũtai mũnene wa mũsumbĩ, vamwe na anini ala angĩ onthe ma mũsumbĩ wa Mbavilonĩ,

14nĩmatũmanie Yelemia aetwe kuma kĩwanzanĩ kya asyaĩĩsya. Nĩmamũnenganie kũla kwĩ Ngetalia mwana wa Aikamu, mwĩsũkũũe wa Savani nĩ kana amwĩnũkye mũsyĩ kwake. Kwoou Yelemia nĩwekalanilye na andũ ala angĩ.

15Mwĩai Ngai nĩwaneenie na Yelemia ĩvindanĩ yĩla wavingĩwe kĩwanzanĩ kya asyaĩĩsya amwĩa atĩĩ,

16“Enda ũkee Mũethiovia Eveti-meleki atĩĩ, ‘Nyie Mwĩai Ngai Mwene Ũtonyi W'onthe, Ngai wa Ĩsilaeli nĩasya kana nĩngwĩanĩsya ũndũ naisye ĩũlũ wa ndũa ĩno, kwa kũete ũndũ mũthũku na ti ũseo. Ĩvinda yĩu yavika ũkeeyonea ũu naisye ũyĩanĩa.

17Ĩndĩ ngakũtangĩĩa mũthenya ũsu, na ndũkanenganwe ũtonyinĩ wa andũ ala ũkĩaa.

18Kwa w'o ngakũtangĩĩa, na ndũkoaĩwa kaũnĩ; ĩndĩ ũkatangĩĩa thayũ waku nũndũ nĩwandĩkĩĩie. Nĩasya ũu nyie Mwĩai Ngai.’ ”

← Chapter 38 Jump to: Chapter 40 →