Jeremiah 27

Khmer 2014 (អាល់គីតាប)

← Chapter 26 Jump to: Chapter 28 →

1នៅដើមរជ្ជកាលស្តេចសេដេ‌គា បុត្រស្តេចយ៉ូសៀស ជាស្ដេចស្រុកយូដា អុលឡោះ‌តាអាឡា មានបន្ទូលមកកាន់យេរេមា ដូចតទៅ:

2អុលឡោះ‌តាអាឡា មានបន្ទូលមកខ្ញុំថា៖ «ចូរធ្វើនឹម និងវេញខ្សែ យកមកពាក់នៅលើស្មារបស់អ្នក។

3បន្ទាប់មក ចូរផ្ញើខ្សែ និងនឹមទាំងនោះ ទៅឲ្យស្ដេចស្រុកអេដុម ស្ដេចស្រុកម៉ូអាប់ ស្ដេចស្រុកអាំម៉ូន ស្ដេចក្រុងទីរ៉ុស និងស្ដេចក្រុងស៊ីដូន តាមរយៈពួករាជ‌ទូត ដែលមកជួបសេដេ‌គា ជាស្ដេចស្រុកយូដា នៅក្រុងយេរូ‌សាឡឹម។

4ចូរផ្ដាំអ្នកទាំងនោះឲ្យទៅជម្រាបស្ដេចរបស់ខ្លួនថា: អុលឡោះ‌តាអាឡា ជាម្ចាស់នៃពិភពទាំងមូល ជាម្ចាស់របស់ជន‌ជាតិអ៊ីស្រ‌អែល មានបន្ទូលដូចតទៅ: ចូរទៅជម្រាបស្ដេចរបស់អ្នករាល់គ្នាថា

5យើងបានបង្កើតផែនដី ព្រមទាំងមនុស្ស និងសត្វដែលរស់នៅលើផែនដី ដោយអំណាច និងបារមីរបស់យើង។ យើងប្រគល់ផែនដីនេះទៅឲ្យនរណាក៏បាន ស្រេចតែចិត្តយើង។

6ឥឡូវនេះ យើងប្រគល់ស្រុកទាំងនេះទៅក្នុងកណ្ដាប់ដៃរបស់នេប៊ូ‌ក្នេសា ស្ដេចស្រុកបាប៊ី‌ឡូន ជាអ្នកបម្រើរបស់យើង។ សូម្បីតែសត្វព្រៃទាំង‌ឡាយ ក៏យើងដាក់ឲ្យនៅក្រោមអំណាចស្តេចនេប៊ូ‌ក្នេសាដែរ។

7ប្រជា‌ជាតិទាំងអស់នឹងនាំគ្នាបម្រើនេប៊ូ‌ក្នេសា ព្រមទាំងកូន និងចៅរបស់គេ រហូតដល់ពេលកំណត់ ដែលស្រុករបស់នេប៊ូ‌ក្នេសាត្រូវប្រជា‌ជាតិជាច្រើន និងស្ដេចដ៏ខ្លាំងពូកែយកធ្វើជាចំណុះ។

8ប្រសិនបើមានប្រជា‌ជាតិណាមួយមិនព្រមបម្រើនេប៊ូ‌ក្នេសា ជាស្ដេចស្រុកបាប៊ី‌ឡូន គឺប្រសិនបើគេមិនព្រមស្ថិតនៅក្រោមនឹមស្ដេចស្រុកបាប៊ី‌ឡូនទេនោះ យើងនឹងដាក់ទោសប្រជា‌ជាតិនោះ ឲ្យស្លាប់ដោយមុខដាវ ដោយទុរ្ភិក្ស និងដោយជំងឺអាសន្ន‌រោគ រហូតទាល់តែយើងប្រហារពួកគេឲ្យវិនាស‌សូន្យ ក្នុងកណ្ដាប់ដៃរបស់នេប៊ូ‌ក្នេសា - នេះជាបន្ទូលរបស់ អុលឡោះ‌តាអាឡា ។

9រីឯអ្នករាល់គ្នាវិញ ពេលព្យាការី គ្រូទាយ អ្នកកាត់សប្ដិ គ្រូហោរ និងគ្រូធ្មប់របស់អ្នករាល់គ្នាប្រាប់ថា “កុំចុះចូលនឹងស្ដេចនេប៊ូ‌ក្នេសា!” នោះមិនត្រូវស្ដាប់ពាក្យរបស់គេឡើយ

10ដ្បិតពួកគេទាយកុហក ធ្វើឲ្យអ្នករាល់គ្នាចាកចេញឆ្ងាយពីទឹកដីរបស់ខ្លួន គឺឲ្យយើងកំចាត់‌កំចាយអ្នករាល់គ្នា ហើយអ្នករាល់គ្នាត្រូវវិនាស។

11ផ្ទុយទៅវិញ បើប្រជា‌ជាតិណាសុខចិត្តនៅក្រោមនឹម និងបម្រើស្ដេចស្រុកបាប៊ី‌ឡូន យើងនឹងឲ្យប្រជា‌ជាតិនោះបានសេចក្ដីសុខនៅក្នុងស្រុក ព្រមទាំងធ្វើស្រែចម្ការ និងរស់នៅលើទឹកដីរបស់ខ្លួន» - នេះជាបន្ទូលរបស់ អុលឡោះ‌តាអាឡា ។

12ខ្ញុំក៏បាននាំពាក្យទាំងនេះទៅជម្រាបស្តេចសេដេ‌គា ជាស្ដេចស្រុកយូដា ដូចតទៅ: សូមស្តេច និងប្រជា‌ជនដាក់ខ្លួននៅក្រោមនឹមស្ដេចស្រុកបាប៊ី‌ឡូន សូមបម្រើស្ដេច និងប្រជា‌រាស្ត្រនោះទៅ ទើបស្តេច និងប្រជា‌ជនយូដាបានរួចជីវិត។

13មិនគួរឲ្យស្តេច និងប្រជា‌ជនត្រូវបាត់បង់ជីវិត ដោយមុខដាវ ដោយទុរ្ភិក្ស និងដោយជំងឺអាសន្ន‌រោគ ដូច អុលឡោះ‌តាអាឡា មានបន្ទូលទុកអំពីប្រជា‌ជាតិ ដែលពុំព្រមបម្រើស្ដេចស្រុកបាប៊ី‌ឡូននោះឡើយ។

14សូមកុំស្ដាប់ពាក្យរបស់ពួកណាពីដែលពោលថា “អ្នករាល់គ្នានឹងមិនបម្រើស្ដេចស្រុកបាប៊ី‌ឡូនទេ” ដ្បិតពាក្យដែលគេថ្លែងនោះមិនពិតឡើយ។

15អុលឡោះ‌តាអាឡា មានបន្ទូលថា: យើងពុំបានចាត់អ្នកទាំងនោះឲ្យមកទេ ពួកគេបានយកឈ្មោះយើងមកប្រើ ដើម្បីថ្លែងពាក្យកុហក ធ្វើឲ្យយើងកំចាត់‌កំចាយអ្នករាល់គ្នា ហើយអ្នករាល់គ្នា ព្រមទាំងពួកណាពី ដែលថ្លែងពាក្យក្លែង‌ក្លាយប្រាប់អ្នករាល់គ្នាមុខជាត្រូវវិនាសពុំ‌ខាន។

16ខ្ញុំបានប្រាប់ក្រុមអ៊ីមុាំ និងប្រជា‌ជនទាំងមូលដូចតទៅ: អុលឡោះ‌តាអាឡា មានបន្ទូលថា ណាពីរបស់អ្នករាល់គ្នាបានប្រកាសថា “សម្ភារៈសម្រាប់ប្រើ‌ប្រាស់ក្នុងដំណាក់របស់ អុលឡោះ‌តាអាឡា នឹងត្រូវគេនាំយកពីស្រុកបាប៊ី‌ឡូនមកវិញ ក្នុងពេលឆាប់ៗ!” កុំស្ដាប់ពាក្យគេឲ្យសោះ ដ្បិតសេចក្ដីដែលគេថ្លែងនោះមិនពិតទេ។

17កុំស្ដាប់ណាពីទាំងនោះឡើយ ចូរនាំគ្នាបម្រើស្ដេចស្រុកបាប៊ី‌ឡូនវិញ ទើបអ្នករាល់គ្នាបានរួចជីវិត។ កុំបណ្ដោយឲ្យក្រុងនេះវិនាសឡើយ។

18ប្រសិនបើអ្នកទាំងនោះពិតជាណាពី ហើយប្រសិនបើ អុលឡោះ‌តាអាឡា ពិតជាមានបន្ទូលតាមរយៈពួកគេមែន ចូរឲ្យពួកគេទូរអា‌អង្វរ អុលឡោះ‌តាអាឡា ជាម្ចាស់នៃពិភពទាំងមូល សូមឲ្យសម្ភារៈដែលនៅសេស‌សល់ក្នុងដំណាក់របស់ អុលឡោះ‌តាអាឡា ក្នុងដំណាក់របស់ស្ដេចស្រុកយូដា និងក្នុងក្រុងយេរូ‌សាឡឹម បានគង់‌វង្ស គឺកុំឲ្យគេដឹកយកទៅក្រុងបាប៊ី‌ឡូនឡើយ។

19អុលឡោះ‌តាអាឡា ជាម្ចាស់នៃពិភពទាំងមូលមានបន្ទូលអំពីសសរ អាងធំ និងដែកកំណល់ ព្រមទាំងរបស់ឯទៀតៗដែលនៅសេស‌សល់ក្នុងក្រុងនេះ

20គឺរបស់ដែលស្តេចនេប៊ូ‌ក្នេសា ជាស្ដេចស្រុកបាប៊ី‌ឡូន ពុំបានយកទៅជាមួយ នៅពេលស្ដេចចាប់ស្តេចយេកូ‌នាស បុត្ររបស់ស្តេចយេហូ‌យ៉ាគីម ជាស្ដេចស្រុកយូដា ព្រមទាំងអ្នកធំនៅក្រុងយេរូ‌សាឡឹម និងនៅស្រុកយូដា យកពីក្រុងយេរូ‌សាឡឹម ទៅជាឈ្លើយសឹកនៅស្រុកបាប៊ី‌ឡូន។

21អុលឡោះ‌តាអាឡា ជាម្ចាស់នៃពិភពទាំងមូល ជាម្ចាស់របស់ជន‌ជាតិអ៊ីស្រ‌អែល មានបន្ទូលស្ដីអំពីសម្ភារៈដែលនៅសល់ក្នុងដំណាក់របស់ អុលឡោះ‌តាអាឡា និងរបស់នៅក្នុងដំណាក់ស្ដេច ព្រមទាំងរបស់នៅក្នុងក្រុងយេរូ‌សាឡឹមថា:

22គេនឹងដឹកជញ្ជូនរបស់ទាំងនោះទៅស្រុកបាប៊ី‌ឡូន រួចទុកនៅទីនោះ រហូតដល់ថ្ងៃដែលយើងនឹងមក ហើយនាំយកទៅទុកនៅកន្លែងដើមវិញ -នេះជាបន្ទូលរបស់ អុលឡោះ‌តាអាឡា ។

← Chapter 26 Jump to: Chapter 28 →