bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Krio
/
Krio (Krio Fɔs Oli Baybul)
/
2 Kings 10
2 Kings 10
Krio (Krio Fɔs Oli Baybul)
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 11 →
1
Eab bin gɛt sɛvinti bɔypikin dɛn na Sameria. Jeu rayt lɛta sɛn am go na Sameria: i rayt to in ɔfisa dɛn na Jɛzril, di bigman dɛn ɛn di man dɛn we de tek kia ɔf Eab in pikin dɛn.
2
I rayt se as dɛn gɛt in lɛta so, sins dɛn masta in bɔypikin dɛn de wit dɛn ɛn dɛn gɛt ɔs ɛn karej dɛn, ɛn di siti gɛt gud sikyɔriti ɛn dɛn gɛt wɛpɔn,
3
lɛ dɛn pik di bɔypikin we soba pas ɔl ɛn put am nain papa in chia, dɔn lɛ dɛn fɛt ɛnibɔdi we go se nɔ.
4
Bɔt di man dɛn fred ɛn advays dɛnsɛf se if tu kiŋ dɛn nɔ ebul fɛt Jeu udat na dɛn we go ebul fɛt am.
5
So di man we bin de inchaj ɔf di kiŋ in os, di gɔvna dɛn, di bigman dɛn ɛn ɔl di ɔda agbagba dɛn sɛn mɛsej to Jeu se dɛn nain bɔbɔ dɛn, ɛn dɛn rɛdi fɔ du ɛnitin we i se; bɔt dɛn nɔ go mek nɔbɔdi kiŋ, so lɛ in du wetin i want.
6
So Jeu rayt ɔda lɛta bak to dɛn se if dɛn no se dɛn de nain say, ɛn dɛn rɛdi fɔ du wetin i se, lɛ dɛn kɔt dɛn masta in bɔypikin dɛn ed, ɛn kɛr dɛn go mit am na Jɛzril da sem awa de di nɛks de. Na sɛvinti bɔypikin dɛn di kiŋ bin gɛt, ɛn dɛn ɔl bin de to di bigman dɛn fɔ mɛn.
7
Wɛn dɛn gɛt Jeu in lɛta, dɛn kech di kiŋ in bɔypikin dɛn kil dɛn ɔl, dɛn sɛvinti; dɛn kɔt kɔt dɛn ed put dɛn na baskit ɛn kɛr dɛn go to Jeu na Jɛzril.
8
Wɛn di mɛsenja go mit Jeu ɛn tɛl am se dɛn dɔn briŋ di kiŋ in bɔypikin dɛn ed kam, i se lɛ i payl dɛn tu say lɛkɛ ip bifo di siti get te do klin.
9
Wɛn do klin, Jeu go tinap na do ɛn tɛl di pipul dɛn se dɛn ɔl inosɛnt bikɔs nain di vɛri wan mek ku pan in masta ɛn kil am; bɔt i aks dɛn udat kil ɔl dɛn mɔtalman de.
10
I tɛl dɛn se in want dɛn fɔ no da de de se nɔn pan wetin PAPA GƆD se bɔt Eab in famili go fɔdɔm na grɔn; i se PAPA GƆD dɔn du wetin i bin tɛl Ilayja.
11
Jeu kil ɔl udat bin lɛf pan Eab in fambul na Jɛzril. I kil ɔl Eab in men man dɛn, in tayt padi dɛn, ɛn in man dɛn we de mek sakrifays fɔ pipul sin; wan pan dɛn sef i nɔ lɛf.
12
Jeu chuk ed go ɔp Sameria. Wɛn i rich na Bɛth Ɛkɛd usay dɛn de mɛn ship ɛn got,
13
i si sɔm pan Kiŋ Aazaya na Juda in fambul dɛn ɛn aks dɛn udat na dɛn. Dɛn ansa am se dɛn na Aazaya in fambul dɛn, dɛn de go waka to Kwin Jɛzibɛl fɔ tɛl in ɛn in famili adu.
14
Jeu gi ɔda se lɛ dɛn kech dɛn ɔl, so dɛn kech dɛn ɔl ɛn kil dɛn nia wan ol na Bɛth Ɛkɛd, dɛn fɔti-tu; wan pan dɛn nɔ lɛf.
15
Wɛn Jeu lɛf Bɛth Ɛkɛd, in ɛn Jɛonadab we na Rekab in bɔypikin mitɔp na rod; Jɛonadab bin de go fɔ go mit am. Jeu tɛl am adu ɛn aks am if i de wit am lɛkɛ aw insɛf de wit am. Jɛonadab ansa am se yɛs, na de Jeu tɛl am se if na so lɛ i gi am in an. Jɛonadab tret in an to Jeu so Jeu ɛp am fɔ klem ɔp in karej.
16
Jeu tɛl am se lɛ i de waka wit am fɔ lɛ i go si aw i de magomago fɔ PAPA GƆD. So dɛn ɔltu rayd na Jeu in karej.
17
Wɛn Jeu rich na Sameria, i kil ɔl di balans pipul dɛn we bin lɛf na Eab in famili; wan sɛf i nɔ lɛf, ɛn ɔl dat bi fɔ lɛ wetin PAPA GƆD bin dɔn tɛl Ilayja, bi.
18
Jeu gɛda ɔl di pipul dɛn ɛn tɛl dɛn se, Eab nɔ bin de sav Beal bɛtɛ, bɔt in rɛdi fɔ sav Beal bɛtɛ bɛtɛ wan,
19
so, lɛ ɔl Beal in prɔfɛt dɛn, di man dɛn we de mek sakrifays to Beal ɛn ɔl dɛn wan we de wɔship am gɛda na wan ples; i se dɛn fɔ mek shɔ se nɔbɔdi nɔ lɛf biɛn bikɔs na big big sakrifays in wan ɔfa to am, ɛn udat nɔ de de go day. Na kɔni Jeu ple fɔ kil ɔl dɛn wan we bin de wɔship Beal.
20
Jeu gi ɔda se lɛ dɛn mek anawnsmɛnt se na big big okezhɔn dɛn de mek fɔ ɔna Beal. Dɛnsɛf du dat.
21
Jeu sɛn wɔd go ɔlɔbɔt na Izrɛl; ɛn ɔl di wan dɛn we bin de wɔship Beal go, wan pɔsin sɛf nɔ lɛf biɛn. Dɛn ɔl go pak insay Beal in os we dɛn de wɔship am; na so di ples bin chok frɔm domɔt to domɔt.
22
Jeu tɛl di man we bin de inchaj ɔf di wɔdrob se lɛ i pul ɔl di rob dɛn fɔ di wan dɛn we de wɔship Beal. Di man insɛf pul ɔl di rob dɛn.
23
Jeu ɛn Jɛonadab we na Rekab in bɔypikin go insay di os; i tɛl di pipul dɛn we de wɔship Beal se lɛ dɛn mek shɔ se nɔbɔdi nɔ de insay de we de wɔship PAPA GƆD, if ɛnibɔdi de insay de lɛ dɛn put am na do.
24
So i go insay fɔ ɔfa sakrifays ɛn mek bɔn animal sakrifays. Wetin Jeu du, i put eti man dɛn na do ɛn tɛl dɛn se ɛnibɔdi we go mek ɛniwan pan dɛn rɔnawe, da pɔsin de go lɔs in layf.
25
As Jeu dɔn mek di sakrifays dɔn so, i tɛl di sikyɔriti dɛn ɛn di ɔfisa dɛn se lɛ dɛn go insay Beal in os ɛn kil ɔlman, lɛ wan pɔsin sɛf nɔ rɔnawe. Aw dɛn de kil dɛn na so dɛn de ib dɛn na do; dɛn go insay di sikrit rum na Beal in os,
26
pul di imej we bin de insay de ɛn bɔn am.
27
Dɛn brok Beal insɛf yon imej, brok di os ɛn tɔn am to latrin. Na so di ples de te tide.
28
Na so Jeu tek klia ɔlkayn Beal biznɛs na Izrɛl.
29
Bɔt in di Jeu nɔ tap fɔ du di bad tin we Jɛroboam we na Nebat in bɔypikin bin de du, we i mek Izrɛl kɔmit sin ɛn mek gold kaw lay lay gɔd na Bɛthɛl ɛn Dan.
30
PAPA GƆD tɛl Jeu se bikɔs i dɔn du ɔl wetin i want am fɔ du ɛn dɔn nyakanyaka Eab in famili kpatakpata lɛkɛ aw in di PAPA GƆD want, in pikin dɛn go rul Izrɛl te rich in gret grampikin.
31
Bɔt Jeu insɛf nɔ bin bisin fɔ de du wetin PAPA GƆD, di PAPA GƆD fɔ Izrɛl want wit ɔl in at. I nɔ tap fɔ du di bad tin we Jɛroboam bin de du we i mek Izrɛl kɔmit sin.
32
Dɛn tɛm dɛn de, PAPA GƆD bin dɔn bigin fɔ sheb Izrɛl ɛn ridyus dɛn land. Azaɛl ib fɛt na Izrɛl ɛn kapchɔ dɛn;
33
i bigin kapchɔ frɔm di ist pat na Riva Jɔdan te rich Giliad usay Gad, Rubɛn ɛn Manasɛ fambul dɛn tap; i kapchɔ, Aroa nia Riva Anɔn krɔs go oba Giliad te rich Beshan.
34
Ɔl di ɔda tin dɛn we Jeu du, di wan dɛn we i kapchɔ o, dɛn ɔl rayt na di istri buk bɔt dɛn kiŋ na Izrɛl.
35
Jeu day ɛn dɛn bɛr am na Sameria. Nain bɔypikin Jɛoaaz tek in ples as kiŋ.
36
Ɔl ɛn ɔl Jeu rul Izrɛl na Sameria twɛnti-et ia.
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 11 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25