bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Krio
/
Krio (Krio Fɔs Oli Baybul)
/
2 Kings 17
2 Kings 17
Krio (Krio Fɔs Oli Baybul)
← Chapter 16
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 18 →
1
Di ia we mek Eaz twɛlv ia as kiŋ na Juda, na da ia de Oshia we na Ila in bɔypikin bi kiŋ na Izrɛl, ɛn na Sameria i bin de. I rul fɔ nayn ia.
2
Insɛf nɔ du wetin rayt na PAPA GƆD in yay bɔt in nɔ bin tan lɛk di ɔda kiŋ dɛn na Izrɛl we bin de bifo am.
3
Kiŋ Shalmanɛsa na Asiria go fɔ atak Oshia we bin de pe taks to am.
4
Bɔt i kam fɛnɔt se Oshia kɔmɔt biɛn am bikɔs i sɛn man dɛn to Kiŋ So na Ijipt fɔ mek Kiŋ So sɔpɔt am ɛn i lɛf fɔ pe taks to Kiŋ Shalmanɛsa so i kech Oshia ɛn lɔk am na jel.
5
Kiŋ Shalmanɛsa na Asiria atak Izrɛl; i le ambush rawnd Sameria fɔ tri ia.
6
Di ia we mek Oshia nayn ia as kiŋ, na da ia de Shalmanɛsa kapchɔ Sameria ɛn sɛn ɔl di Izrɛlayt dɛn go na Asiria. I mek dɛn tap na Ala ɛn Gozan we de nia Riva Abɔ, wit dɛn ɔda siti dɛn na Mɛdis
7
Ɔl dis waala yaso mit Izrɛl bikɔs dɛn kɔmit sin to PAPA GƆD dɛn PAPA GƆD we pul dɛn kɔmɔt na Ijipt na di kiŋ na Ijipt in an. Dɛn bin de wɔship ɔda gɔd dɛn
8
ɛn du wetin dɛn ɔda neshɔn dɛn we PAPA GƆD drɛb kɔmɔt bifo dɛn bin de du; dɔn dɛn bin de du dɛn bad bad tin we di kiŋ dɛn na Izrɛl bin de du.
9
Di Izrɛlayt dɛn bin de ayd de du tin dɛn we PAPA GƆD nɔ lɛk. Dɛn bil ples fɔ de wɔship lay lay gɔd na dɛn siti ɛn dɛn smɔl siti.
10
Dɛn bil ples fɔ wɔship Ashɛra na ɔl dɛn il ɛn ɔnda dɛn tik.
11
Ɛn na so dɛn bin jɛs de bil ɔlta ɛn bɔn insɛns de gbay, de falamakata dɛn neshɔn dɛn we PAPA GƆD drɛb kɔmɔt bifo dɛn; dɛn du bad tin we mek PAPA GƆD vɛks bad bad wan pan dɛn.
12
Dɛn bin de wɔship lay lay gɔd, ivin we PAPA GƆD bin dɔn wɔn dɛn nɔ fɔ du dat.
13
PAPA GƆD tɛl in prɔfɛt dɛn fɔ wɔn Izrɛl ɛn Juda fɔ lɛf dɛn bad trik ɛn fɔ du wetin PAPA GƆD in lɔ we i gi dɛn fɔstɛm-papa dɛn ɛn ɔl di lɔ dɛn we i gi di prɔfɛt dɛn fɔ de tɛl dɛn.
14
Bɔt usay, dɛn nɔ yɛri; na soso di bad abit we dɛn fɔstɛm-papa dɛn bin gɛt we dɛn nɔ de lisin to papa GƆD, nain dɛnsɛf gɛt.
15
Dɛn nɔ gri fɔ du wetin PAPA GƆD se, ɛn nɔ kip di Kɔvinant we i sayn wit dɛn fɔstɛm-papa dɛn; bifo dat dɛn bigin de wɔship lay lay gɔd dɛn we nɔ min natin ɛn na so dɛnsɛf kam fiba mɔtalman dɛn we nɔ fit natin. Dɛn falamakata dɛn ɔda neshɔn dɛn we PAPA GƆD bin dɔn wɔn dɛn bɔt, ɛn du wetin PAPA GƆD tɛl dɛn nɔ fɔ du.
16
Dɛn lɛf fɔ du wetin PAPA GƆD tɛl dɛn fɔ du, bifo dat dɛn mek tu kaw lay lay gɔd ɛn wan ɔda wan lay lay gɔd we nem Ashɛra. Dɛn bigin fɔ wɔship ɔl dɛn lay lay gɔd ya ɛn dɛn sta wit Beal insɛf, dɛn se na dɛn gɔd dat.
17
Dɔn igen, dɛn kil dɛn bɔy ɛn gyal pikin dɛn, ɛn bɔn dɛn na faya as sakrifays; dɛn de go to mɔreman, dɛn de lukgrɔn, ɔlkanaba bad tin nain dɛn du fɔ mek PAPA GƆD vɛks.
18
So PAPA GƆD vɛks bad bad pan Izrɛl ɛn dɔnawe wit dɛn kpatakpata. Na Juda nɔmɔ bin lɛf.
19
Juda we lɛf sɛf nɔ bin de du wetin PAPA GƆD se. Dɛnsɛf falamakata Izrɛl pan dɛn bad abit.
20
Dat mek PAPA GƆD tɔn in bak pan ɔl di Izrɛlayt dɛn, i pɔnish dɛn mek dɛn ɛnimi dɛn skata skata dɛn ɛn nyamanyama dɛn te wan pan dɛnsɛf nɔ lɛf.
21
Afta we PAPA GƆD dɔn pul di Izrɛlayt dɛn kɔmɔt to di Juda pipul dɛn, di Izrɛlayt dɛn mek Nebat in bɔypikin we na Jɛroboam Kiŋ. Jɛroboam tek tɛm pul di Izrɛlayt dɛn kɔmɔt ɛn nɔ mek dɛn du wetin PAPA GƆD want.
22
Di Izrɛlayt dɛn du ɔl di bad tin dɛn we Jɛroboam se fɔ du,
23
na dat dɛn bin de pan te PAPA GƆD drɛb dɛn kɔmɔt bifo am; ɛn i bin dɔn tɛl in prɔfɛt dɛn fɔ wɔn dɛn. Na so di Izrɛlayt dɛn tek kɔmɔt go Ɛgzayl na Asiria ɛn na de dɛn de te tide.
24
Di kiŋ na Asiria pul pipul dɛn kɔmɔt na Babilɔn, Kutha, Ava, Amath ɛn Sɛfavaim ɛn kɛr dɛn go na di difrɛn siti dɛn na Sameria fɔ go tek di Izrɛlayt dɛn ples de. Na dɛn bin tap na ɔl di siti dɛn na Sameria.
25
Wɛn dɛn jɛs go tap de, dɛn nɔ bin de wɔship PAPA GƆD, so i mek layɔn dɛn atak ɛn kil sɔm pan dɛn.
26
Wɔd rich di kiŋ na Asiria se di pipul dɛn we i mek go tap na Sameria nɔ ɔndastand di gɔd we de de, ɛn nɔ no wetin i want, so i dɔn mek layɔn dɛn go skata dɛn ɛn kil sɔm pan dɛn.
27
Di kiŋ gi ɔda se lɛ dɛn tek wan pan di man dɛn we de mek sakrifays fɔ pipul sin we dɛn kapchɔ na Sameria kɛr am go de lɛ i go tap de fɔ de lan di pipul dɛn wetin di gɔd we gɛt di land want.
28
So wan pan di man dɛn we de mek sakrifays fɔ pipul sin we bin tap na Sameria go bak na Bɛthɛl ɛn bigin fɔ lan di pipul dɛn aw fɔ de wɔship PAPA GƆD.
29
Bɔt nɔ mɛn o, di pipul dɛn bin stil de wɔship smɔl smɔl gɔd dɛn na di siti we dɛn tap; ɛn na usay di pipul dɛn na Sameria bin dɔn bil fɔ de kip dɛn yon smɔl smɔl gɔd dɛn, na de dɛnsɛf bin de kip dɛn yon gɔd dɛn.
30
Ɔlman bin mek in yon gɔd, di wan dɛn we kɔmɔt Babilɔn mek Sɔkɔt Bɛnɔt; di wan dɛn we kɔmɔt Kutha mek Nagal; di wan dɛn we kɔmɔt Amath mek Ashima we na dɛn di Sɛfavaim dɛn bin de wɔship,
31
di wan dɛn we kɔmɔt Ava mek Nibaz ɛn Tatak; dɔn di wan dɛn we kɔmɔt Sɛfavaim bin de bɔn dɛn pikin na faya as sakrifays to dɛn gɔd dɛn we nem Adramɛlɛk ɛn Anamɛlɛk.
32
Dɛn bin de wɔship PAPA GƆD o, bɔt dɛn bin pik sɔm pan dɛnsɛf fɔ wok as man dɛn we de mek sakrifays fɔ pipul sin fɔ de na dɛn ay ples we dɛn de wɔship.
33
Ivin we dɛn bin de wɔship PAPA GƆD, dɛn bin stil de wɔship dɛn yon gɔd dɛn we dɛn pul kɔmɔt na dɛn kɔntri lɛkɛ aw dɛn bin de du we dɛn de, de.
34
Ɔl wetin dɛn bin de du trade nain dɛn de du te tide. Dɛn nɔ de wɔship PAPA GƆD, ɛn dɛn nɔ bisin fɔ du wetin di kɔmandmɛnt ɛn lɔ dɛn we i gi dɛn se, dat na wetin i bin gi Jekɔb we i gi nem Izrɛl in Jɛnareshɔn dɛn.
35
Wɛn PAPA GƆD bin mek Kɔvinant wit di Izrɛlayt dɛn, i gi dɛn lɔ se, dɛn nɔ fɔ wɔship nɔn ɔda gɔd dɛn ɔ mek sakrifays to dɛn.
36
I se na PAPA GƆD we pul dɛn kɔmɔt na Ijipt wit in mayti pawa dɛn. I se nain dɛn fɔ wɔship. I se nain dɛn fɔ baw to ɛn ɔfa sakrifays to,
37
ɛn dɛn fɔ tek tɛm du wetin ɔl in kɔmandmɛnt ɛn lɔ dɛn we i dɔn rayt gi dɛn. I se dɛn nɔ fɔ wɔship nɔn ɔda gɔd.
38
Dɛn nɔ fɔ fɔgɛt di Kɔvinant we i bin mek wit dɛn, ɛn dɛn nɔ fɔ wɔship nɔn ɔda gɔd.
39
Bifo dat nain PAPA GƆD dɛn PAPA GƆD dɛn fɔ wɔship, nain go pul dɛn na dɛn ɛnimi dɛn an.
40
Bɔt usay, di pipul dɛn nɔ yɛri, dɛn bin jɛs de du wetin dɛn fil fɔ du.
41
Ivin we dɛn bin de wɔship PAPA GƆD, dɛn bin de wɔship lay lay gɔd bak. Te tide dɛn pikin dɛn ɛn grampikin dɛn stil de wɔship lay lay gɔd lɛkɛ dɛn fɔstɛm-papa dɛn.
← Chapter 16
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 18 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25