Ecclesiastes 1

Luganda (BIBU1) (BIBULIYA ENTUKUVU)

Jump to: Chapter 2 →

1Ebigambo bya Koweleti, mutabani wa Dawudi kabaka mu Yeruzaalemu.

2Temuli kantu, temuli kantu, Koweleti bw'agamba; temuli yadde akantu, byonna temuli kantu!

3Magoba ki omuntu g'aggya mu kutegana kwe kwonna kw'ateganamu wansi w'enjuba?

4Amazadde gagenda, amazadde ne gajja, naye ensi yo esigalawo emirembe gyonna.

5Enjuba evaayo, enjuba n'egwa, n'eddayo mangu mu kifo kyayo.

6Empewo efuuwa ng'eraga emaserengeta, n'ekyusa ng'edda emambuka; empewo egenda yeetooloola nga bwedda mu kisinde kyayo.

7Emigga gyonna gikulukutira mu nnyanja, naye ennyanja tejjula; mu kifo emigga gye gisibuka, eyo gye gidda nate.

8Ebintu byonna bikooya, omuntu tayinza kubittottola. Eriiso terikkuta kulaba, n'okutu tekujjula kuwulira.

9Ekyaliwo kiriddamu okubaawo, n'ekyakolebwa kiriddamu okukolebwa; wansi w'enjuba teri kiggya,

10Waliwo oli ky'ayinza okwogerako nti: “Kino kiggya?” Kyaliwo dda mu mirembe giri, kyaliwo nga tetunnabaawo.

11Ebyasooka tebijjukirwa, naye n'ebyo ebiribeerawo gye bujja, nabyo tebirijjukirwa abo abalijja.

12Nze Koweleti nali kabaka wa Yisirayeli mu Yeruzaalemu;

13neefubirira okunoonya n'okwekenneenya n'amagezi byonna ebikolebwa wansi w'eggulu. Omugugu Katonda gwe yabinika abaana b'abantu bakole, nga muzibu!

14Ndabye ebikolwa byonna ebikolebwa wansi w'enjuba; naye byonna temuli kantu, kugoba mpewo buwewo.

15Ekyewese tekisoboka kugololwa, n'ekibulawo tekisoboka kubalibwa.

16Nagamba mu mutima gwange nti: “Wuuno neeyongedde ne ntutumuka mu magezi okusinga bonna abankulembera okufuga mu Yeruzaalemu; ndabye bingi eby'amagezi n'okumanya.”

17Awo kwe kwefubirira ku ky'okumanya amagezi era ne ku ky'okumanya obulalulalu n'obutamanya. Kyokka nategeera nti yadde na bino, kugoba mpewo buwewo.

18Kubanga ku magezi amangi kujjirako obuyinike nkumu, n'okumanya gye kweyongera, n'ennaku gy'ekoma.

Jump to: Chapter 2 →