Ecclesiastes 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Nakyuka ne ndaba okunyigiriza okukolebwa wansi w'enjuba; amaziga g'abanyigiriziddwa, nga mpaawo akubagiza; eryanyi liri n'abanyigiriza, tewali akubagiza.

2Ne neesiimisa abafu abaamala edda okufa, nti ba mukisa okusinga abo abakyali abalamu.

3Naye akyasinza na bano bombi omukisa y'oyo atannazaalibwa, atannalaba ku bikolwa bibi ebikolebwa wansi w'enjuba.

4Ne ndaba nti emirimu n'amagoba g'okutegana biva mu kukwatiraganirwa buggya. Ne mu kino era temuli kantu, kugoba mpewo buwewo.

5Omusiru azinga emikono gye, ne yeegoogombya.

6Olubatu mu ddembe lukira embatu zombi ez'okutegana n'okugoba empewo obuwewo.

7Era nazuula n'ekirala wansi w'enjuba omutali kantu:

8Waaliwo omusajja ng'ali bwannamunigina, talina mwana yadde muganda we. Yali tata kutegana, naye amaaso ge nga tegakkuta bya bugagga bye. Awo nno ntawaanira ani? Lwaki neesubya ebirungi? Ne mu kino nakyo temuli kantu, kutegana okukwasa ennaku.

9Ababiri basinga omu kubanga bafuna empeera nnungi mu kutegana kwabwe.

10Omu bw'aba agudde, omulala amusitulawo. Ali obw'omu alabye. Bw'agwa, tewaba amusitulawo.

11Era, ababiri bwe beebaka awamu, omu abugumya munne. Ali omu abuguma atya?

12Omuntu yandikina kw'ali obw'omu, naye abali ababiri bandimulwanyisa. Omuguwa ogw'emiko esatu tegumala gakutulibwa.

13Omulenzi omwavu, omugezi asinga kabaka omukadde ate nga musiru, atakyawuliriza kulabulibwa,

14omulenzi ne bw'aba yava mu kkomera okujja ku nnamulondo, obanga yazaalibwa musabirizi mu bwakabaka bwe obwo.

15Nalaba abalamu bonna abatambula wansi w'enjuba, nga bagoberera omuvubuka oli eyadda mu kifo kya kabaka.

16Omuwendo gw'abantu bonna gwali tegukoma, ogw'abo bonna abaabakulemberamu. Naye abaddawo oluvannyuma tebaamusanyukira. Na kino temuli kantu, kugoba mpewo buwewo.

17Kuuma ekigere kyo bw'oyingira mu nnyumba ya Katonda. Sembera mu buwulize okusinga okuweereza ebitambiro by'abasiru, abo abatamanyi nti bakola kibi.

← Chapter 3 Jump to: Chapter 5 →