Ecclesiastes 6

Luganda (BIBU1) (BIBULIYA ENTUKUVU)

← Chapter 5 Jump to: Chapter 7 →

1Waliyo n'ekibi ekirala kye nalaba wansi w'enjuba, ate nakyo nga kizitoowerera abantu:

2Omuntu Katonda gw'awa obugagga, ebintu n'ekitiibwa, ng'omutima gwe tegukyajula mu bye gwegomba, ate Katonda n'atamuwa kubyeliira, bo abalala ne babirya, kino temuli kantu; kirwadde kibi!

3Oli ne bwe yandizadde abaana ekikumi, n'awangaala emyaka mingi, ne bwe yandiwangadde kutuusa wa, naye nga teyeeyagalidde kimala mu bugagga bwe, n'ataziikibwa na bulungi, ku oyo nze ŋŋamba nti olubuto oluvuddemu lumusinga.

4Anti omwana yajjira bwereere, n'alaga mu nzikiza, n'erinnya lye lizingiddwazingiddwa mu nzikiza.

5Newandibadde teyalaba ku njuba yadde okugimanya, naye awummudde okusinga oli,

6oyo ne bwe yaliwangadde emyaka lukumi n'alukubisaamu n'emirundi ebiri naye n'ateeyagalira mu bugagga bwe. Bonna tebagenda mu kifo kimu?

7Byonna omuntu by'ateganira bidda eri kamwa ke, okwegomba kwe tekulikkuta.

8Omugezi kiki ky'asinga omusiru? N'omwavu afunamu ki amanyi okweyisa obulungi mu maaso g'abalamu?

9Amaaso kye galaba kirungi okusinga okwegomba bye kulondoola; na kino temuli kantu, kugoba mpewo buwewo.

10Buli kyonna ekiriwo kyatuumibwa dda erinnya, na buli muntu ky'ali kimanyiddwa, nti tayinza kuwerennemba n'oli amusinga amaanyi.

11Ebigambo gye bikomya obungi n'obutabaamu kantu. Awo nno omuntu aggyamu ki?

12Ani amanyi ekirungi eri omuntu mu bulamu, mu nnaku entono omutali na mugaso, z'amalako ng'ekisiikirize? Yadde ani asobola okumumanyisa ekiribaawo wansi w'enjuba nga ye takyaliwo?

← Chapter 5 Jump to: Chapter 7 →