Ecclesiastes 10

Luganda (BIBU1) (BIBULIYA ENTUKUVU)

← Chapter 9 Jump to: Chapter 11 →

1Ensowera enfu ereetera omuzigo okucuuma, n'obutamanya obutono buti buzitowa okusinga amagezi n'ekitiibwa.

2Omutima gw'omugezi gumuwunzikira ku ddyo, naye omutima gw'omusiru gumuwunzikira ku kkono.

3Omusiru bw'atambula mu kkubo tabaamu ka buntu, yeeraga bonna bw'ali omusiru.

4Obusungu bw'omufuzi bwe bukuyimukirangamu, tovanga mu kifo kyo; obuteefu bukkakkanya ensobi ennene.

5Waliwo ekibi ekirala kye nalaba wansi w'enjuba, ensobi etera okugwibwamu abalina obuyinza.

6Abasiru bassibwa mu bifo ebya waggulu, ate abagagga ne bassibwa mu bya wansi.

7Nalaba abaddu nga beebagadde ku mbalaasi, bo abakungu nga batambulira ku ttaka ng'abaddu.

8Asima obunnya, alibugwamu, n'oli ayiwa ekisenge, omusota gulimubojja.

9Ayasa amayinja galimuteekako obuvune n'ayasa enku zandimutuusaako akabi.

10Embazzi bw'ekoŋŋontera ng'obwogi tebukyasala, omulimu gweyongera, naye obukugu buleeta magoba.

11Omusota bwe gubojja nga tegunagulikibwa, omugulisi taggyamu magoba.

12Ebigambo by'akamwa k'omugezi bimureetera obuganzi, naye emimwa gy'omusiru gimwettira.

13Mu kusooka, ebigambo by'akamwa ke biba butamanya; mu kumaliriza, emimwa gye gyogera bugwagwa obw'ekiralulalu;

14ye omusiru akanya bigambo. Teri amanyi kirijja, ani asobola okutegeeza omuntu ekirimuddirira?

15Okutegana kw'omusiru kumukooya, atamanyi na kkubo limutuusa ku kibuga.

16Zikusanze ggwe ensi erina kabaka akyali omulenzi, erina n'abakungu abakeera okulya.

17Weesiimye, ggwe ensi erina kabaka ow'olulyo olulangira, erina abakungu abalya mu budde obw'okulya, lwa kwezzaamu ndasi naye si lwa ttamiiro.

18Olw'obunafu obusolya bukka; olw'obugayaavu bw'emikono ennyumba etonnya.

19Embaga zikolebwa kuwa ku nseko, n'omwenge gucamula obulamu, naye ssente y'efuga byonna.

20Tovumiriranga kabaka, yadde mu birowoozo byo, tovumiriranga mugagga, yadde eyo mu kisenge kyo; kubanga ebinyonyi eby'omu bbanga byanditwala ebigambo byo, ekirina ebiwaawatiro ky'andiroopa by'oyogedde.

← Chapter 9 Jump to: Chapter 11 →