Ecclesiastes 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Nagamba mu mutima gwange nti: “Jjangu, nzija kukugeza n'amasanyu, nzuule ekirungi kye gawa.” Ne mu kino temuli kantu.

2Ku nseko nagamba nti: “Bulalulalu,” ate ku ssanyu nti: “Kigasa ki?”

3Nalowooza ku ky'okusanyusa obulamu bwange n'omwenge, ne ku ky'okuwambaatira obutamanya, gwo omutima gwange nga gukyankulembera n'amagezi. Nayagala ndabe kiki ekigasa abaana b'abantu okukola wansi w'enjuba mu nnaku entono ez'obulamu bwabwe.

4Ne mbakana n'eby'okukola: neezimbira ennyumba, ne nsimba emizabbibu.

5Neesimbira ennimiro n'obulimiro obw'ebimuli, ne nsimbamu emiti egy'ebibala ebya buli kika.

6Neekolera ebidiba eby'amazzi nfukirire ennimiro y'emiti egyali gigenda gyanya.

7Nalina abaddu n'abazaana, n'abaddu abamu banzaalirwa mu maka gange; nalina amagana g'ente n'ebisibo by'endiga n'embuzi ebinene okusinga bonna abankulembera mu Yeruzaalemu bye baalina.

8Era neekuŋŋaanyiza ffeeza, zaabu n'obugagga bwa bakabaka n'abaamasaza; nafuna abayimbi abasajja n'abakazi, na buli kisanyusa omutima gw'omuntu, anti gwe mwandu gw'abakazi.

9Ne ntutumuka, ne nsinga bonna abankulembera mu Yeruzaalemu; go amagezi gange gaasigala nange.

10Na byonna amaaso gange bye geegombanga nga sibigagaana, n'omutima gwange saagumma ssanyu na limu. Omutima gwange gwasanyukira byonna bye nakola, era guno gwe gwali omugabo gwe naggya mu bye nakola.

11Naye bwe nakyukira eri byonna emikono gyange bye gyali gikoze n'okutegana kwe nali nteganyeeemu okubaako kye nkola, byonna temwali kantu, kwali kugoba mpewo buwewo; mpaawo magoba wansi w'enjuba.

12Awo ne nzira ku kwekkaanya amagezi, obulalulalu n'obutamanya. Anti omuntu alisikira kabaka alikola ki? Si kye baakola edda?

13Nalaba nti amagezi gasinga obutamanya, kyenkana ng'ekitangaala bwe kisinga enzikiza.

14Omugezi amaaso ge gali ku mutwe gwe, naye omusiru atambulira mu nzikiza. Nayiga nti byombi enkomerero ye emu ebituukirira.

15Ne ŋŋamba mu mutima gwange nti: “Ekigwira omusiru nange kye kiringwira; ngasirwamu ki okubeera omugezi?” Ne njogera mu mutima gwange nti: “Na bino temuli kantu.”

16Kubanga omugezi okufaanana n'omusiru talijjukirwa emirembe gyonna; manyanga gye bulijja bombi nga beerabirwa dda. Omusiru afa, n'omugezi afa kyenkana.

17Obulamu kyennava mbukyawa, kubanga ebikolebwa wansi w'enjuba ndaba bibi. Byonna temuli kantu, kugoba mpewo buwewo.

18Nakyawa okutegana kwange kwe nateganamu wansi w'enjuba kubanga nalaba nga ndibirekera oyo alinziririra.

19Ani amanyi oba aliba mugezi oba musiru? Oyo y'alifuga emirimu gyange gyonna egyanteganya wansi w'enjuba kwe namalira amagezi gange. Na kino temuli kantu.

20Awo omutima gwange ne guterebuka mu bye nali nteganyeemu wansi w'enjuba.

21Kubanga omuntu ategana n'akola n'amagezi, n'okumanya n'obukugu, naye omugabo gwe n'agulekera omulala ataabikolerera; na kino nakyo temuli kantu, kya nnaku nnyo.

22Omuntu mugaso ki gw'aggya mu byonna by'ateganamu wansi w'enjuba n'omutima gwe bye gwefubirira.

23Obudde bwe bwonna nnaku nsa, n'emirimu gye kusobezebwa kwereere; n'ekiro kyonna omutima gwe teguwummula; na kino nakyo temuli kantu.

24Teri kirungi omuntu kye yandikoze kyandisinze kulya, kunywa n'okusanyukira mu kutegana kwe. Ndaba na kino kiva mu mikono gya Katonda,

25kubanga awatali Katonda ani yandiridde, ani yandisanyuse?

26Omuntu omulungi mu maaso ga Katonda, amuwa amagezi, okumanya, n'essanyu, naye omwonoonyi amuwa mugugu gwa kukuŋŋaanya na kutuuma alyoke awe oli eyasanyusa Katonda. Na kino temuli kantu, kugoba mpewo buwewo.

← Chapter 1 Jump to: Chapter 3 →