Ecclesiastes 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Buli kintu kirina akaseera kaakyo, na buli kikolebwa wansi w'eggulu kirina obudde bwakyo:

2Obudde obw'okuzaalibwa n'obudde obw'okufa, obudde obw'okusimba, n'obudde obw'okukuula ekyasimbibwa;

3obudde obw'okutta n'obudde obw'okuwonya, obudde obw'okuzimbulula n'obudde obw'okuzimba;

4obudde obw'okukaaba n'obudde obw'okuseka, obudde obw'okukungubaga n'obudde obw'okuzina;

5obudde obw'okusaasaanya amayinja n'obudde obw'okugakuŋŋaanya, obudde obw'okuwambaatira, n'obudde obw'okuleka okuwambaatira;

6obudde obw'okunoonya, n'obudde obw'okufiirwa ebintu, obudde obw'okukuuma n'obudde obw'okusuula eri;

7obudde obw'okuyuza n'obudde obw'okutunga, obudde obw'okusirika n'obudde obw'okwogera;

8obudde obw'okwagala n'obudde obw'okukyawa, obudde obw'olutalo n'obudde obw'eddembe.

9Omuntu magoba ki g'aggya mu kutegana kwe?

10Nalaba omugugu Katonda gwe yabinika abaana b'abantu beetikke.

11Yakola bulungi ebintu byonna nga bituukana n'obudde bwabyo; yassa mu mutima gw'omuntu okutegeera obudde obutaliiko kkomo, naye era abantu tebasobola kwefumiitiriza ne bakomekkereza omulimu Katonda gwe yakola okuva ku ntandikwa okutuuka ku nkomerero.

12Mmanyi nti teri kirungi kisinga kusanyuka na kukola bulungi mu bulamu bw'omuntu.

13Anti buli muntu yandiridde, n'anywa n'amatira ebirungi ebiva mu kutegana kwe; kino kitone kya Katonda.

14Nayiga nti byonna Katonda bye yakola bisigalawo emirembe gyonna; tewali kya kwongerako, yadde eky'okumogolako; Katonda ye yabikola balyoke bamusseemu ekitiibwa.

15Ekiriwo kyaliwo dda, ate ekiribeerawo kyabaawo dda; Katonda azzaawo ekyayita.

16Nayongera okulaba wansi w'enjuba: mu kifo ky'obutuufu waaliwo bugwenyufu, mu kifo ky'obutuukirivu waaliwo bugwenyufu.

17Nagamba mu mutima gwange nti: “Omutuukirivu n'omubi Katonda alibalamula, kubanga buli kintu kirina obudde, na buli kikolebwa kirina ebbanga lyakyo.”

18Era nagamba mu mutima gwange ku baana b'abantu nti: “Katonda ageza abantu abalage nti bafaanagana n'ebisolo.

19Kubanga ebigwira abaana b'abantu n'ebigwira ebisolo bye bimu; ng'ekimu bwe kifa, n'ekirala bwe kifa; byonna omwoyo gwe gumu: omuntu talina ky'asinza ku bisolo. Byonna temuli kantu.

20“Byonna biraga mu kifo kimu: byonna byaggyibwa mu nfuufu, era mu nfuufu byonna mwe bidda.

21Ani amanyi oba omwoyo gw'abaana b'omuntu gwambuka waggulu, ate omwoyo gw'ebisolo nga guserengeta wansi mu ttaka?”

22Nakitegeera nti tewali kirungi kisinga muntu kusanyukira mu ky'akoze; kubanga ekyo gwe mugabo gwe, kubanga ani alimuleeta okulaba ebiribaawo ye ng'avuddewo?

← Chapter 2 Jump to: Chapter 4 →