Ecclesiastes 9

Luganda (BIBU1) (BIBULIYA ENTUKUVU)

← Chapter 8 Jump to: Chapter 10 →

1Byonna bino nabikubaganyaako mu mutima gwange, ne ntegeera nti abatuukirivu, abagezi n'emirimu gyabwe biri mu mikono gya Katonda. Naye omuntu tamanyidde ddala oba kwagala oba bukyayi; byonna mu maaso gaabwe temuli kantu.

2Bonna enkomerero ye emu: omutuukirivu n'omubi, omulungi n'omubi, omulongoofu n'atali mulongoofu, atambira ebitambiro n'atatambira; nga bwe kiri ku mulungi, bwe kiri ne ku mubi; nga bwe kiri ku alayira, bwe kiri ne ku atalayira.

3Kino kye kibi mu byonna ebiri wansi w'enjuba: okulaba nga bonna ekibalindiridde kye kimu; emitima gy'abaana b'abantu gijjudde bwonoonefu, ne mu mitima gyabwe mulimu obulalulalu ebbanga lyonna nga balamu, ate oluvannyuma ne beegatta ku baafa.

4Oli akyali n'abalamu akyalina essuubi; anti embwa ennamu nnungi okukira empologoma enfu.

5Kubanga abalamu bamanyi nti ba kufa, naye abafu tebalina kirala kye bamanyi; tebakyalinayo na mpeera ndala, kubanga n'eby'okubajjukira byaggwa.

6Okwagala kwabwe, obukyayi n'obuggya bwabwe byonna byabulawo dda; tebikyalina na mugabo mu ebyo ebikolebwa wansi w'enjuba.

7Genda weriire emmere yo mu ssanyu, wenywere n'omwenge gwo n'omutima omusanyufu, kubanga Katonda yasanyukira dda by'okola.

8Obudde bwonna ebyambalo byo bibeere nga byeru, n'omuzigo guleme kuggwa ku mutwe gwo.

9Weeyagale n'omukazi gw'oyagala, ennaku zo zonna ez'obulamu buno omutali kantu obwakuweebwa wansi w'enjuba, obudde bwonna omutava kaganyula. Anti ekyo gwe mugabo gwo mu bulamu bwo ne mu kutegana kw'oteganamu wansi w'enjuba.

10Kyonna omukono gwo kye gugwikiriza okukola, kikole n'amaanyi go gonna, kubanga mu magombe gy'ogenda teriba kukola, kutetenkanya, yadde okuyiga oba amagezi.

11Nalaba ekirala wansi w'enjuba: embiro teziwangulibwa asinga kuwenyuka, newandibadde olutalo, asinga buzira; n'emmere tejjira bagezi, wadde obugagga abategeevu, oba obuganzi abayivu, wabula buli omu asanga akadde n'akakisa.

12Ate era omuntu tamanyi nkomerero ye; wabula ng'ebyennyanja ekiragala ekibi bwe kibikwata, nga n'ennyonyi bwe zikwatibwa ekitimba, n'abantu bwe bategwa batyo obudde obubi obubazinduukiriza.

13Era nalaba ekintu eky'amagezi wansi w'enjuba kye nasanga nga kikulu:

14Waaliwo ekibuga ekitono, nga mulimu abantu batono, kabaka ow'amaanyi n'akirumba, n'akitaayiza, n'akituumako embibiro ennene okukyetoolooza.

15Kati nno mu kibuga ekyo mwalimu omusajja omunaku, naye nga mugezi, eyawonya ekibuga n'amagezi ge. Naye tewali akyajjukira musajja oyo omunaku.

16Ne ŋŋamba nti: “Amagezi malungi okusinga amaanyi, newandibadde ng'amagezi g'omunaku gagayibwa n'ebigambo bye tebiwulirwa.”

17Ebigambo by'abagezi ebikkakkamu biwulirwa okusinga okuleekaana kw'afuga mu basiru.

18Amagezi malungi okusinga ebissi eby'omu ntalo, naye omwonoonyi omu afiiriza ebirungi nfaafa.

← Chapter 8 Jump to: Chapter 10 →