Ecclesiastes 5

Luganda (BIBU1) (BIBULIYA ENTUKUVU)

← Chapter 4 Jump to: Chapter 6 →

1Toyanguyirizanga kwogera; mu mutima gwo toyanguyirizanga kwogera kigambo mu maaso ga Katonda. Katonda ali mu ggulu, ate ggwe oli ku nsi, awo nno ebigambo byo bibeere bitono.

2Kubanga ebirooto bijja lwa kweraliikirira kungi, n'okwogera okw'ekisiru kuva mu kwogera bingi.

3Bw'obaako kye weeyamye eri Katonda tolwangawo kukituukiriza. Tosanyukiranga mu basiru; kye weeyamye kituukirize.

4Obuteeyama kantu kisinga okweyama ate n'ototuukiriza.

5Toganya kamwa ko kukuleetera kukola kibi, era teweemulugunya mu maaso ga mubaka nti: “Yali nsobi.” Lwaki oleetera Katonda okunyiigira ebigambo byo, n'oyonoona emirimu gy'emikono gyo?

6Awaba ebirooto ebingi, wabaawo ebitaliimu kantu n'ebigambo ntoko. Ggwe tya Katonda.

7Bw'olaba eyo mu bitundu ng'abanaku banyigirizibwa, ng'obwenkanya n'obwannannyini bityoboolebwa, ekyo tokyewuunyanga. Kubanga omukungu omukulu alondoolwa amusingako, ate ne waggulu wa bano bombi eriyo ababasinga.

8Amagoba agava mu nsi bagagabana; kabaka y'atwala eby'omu nnimiro.

9Ayagala ssente, talikkuta ssente, n'ayagala obugagga talikkuta magoba. Na kino nakyo temuli kantu.

10Awali ebintu ebingi, n'ababirya baba bangi; olwo nnannyini byo bimugasa ki, mpozzi okubitunulako obutunuzi?

11Otulo tw'omukozi tuwooma, ne bw'alya akatono ne bw'alya ekingi; naye omwero gw'omugagga tegumuganya kwebaka.

12Waliwo ekirwadde ekibi kye nalaba wansi w'enjuba: obugagga obutuume obw'obulabe eri nnannyinibwo.

13Bwazikirira olw'entaanya emu; ate yalina omwana omu, naye teyalina kantu mu mikono gye.

14Bwereere nga bwe yafuluma mu lubuto lwa nnyina, era omuntu bw'aligenda. Talina ky'alitwala ku bye yateganira ky'aliyinza kugenda nakyo mu ngalo.

15Kino kirwadde kibi okugenda nga bwe yajja; magoba ki gaafuna okuteganira empewo?

16Amala ennaku zonna ez'obulamu bwe ng'aliira mu nzikiza, ng'ali mu kusoberwa, buyinike na busungu.

17Nze ndaba nga kirungi era kye kituufu oli okulya, okunywa n'okusanyukira mu kutegana kwe kwe yateganamu wansi w'enjuba, mu nnaku entono ez'obulamu bwe Katonda ze yamuwa; anti ogwo gwe mugabo gwe.

18Buli muntu Katonda gw'awa obugagga n'ebintu, n'amusobozesa okubyeyagaliramu, n'amukkiriza n'okusanyukira mu biva mu kutegana kwe, ekyo nno kirabo kya Katonda.

19Emirundi mingi talirowooza ku bumpi bwa nnaku ze, kubanga Katonda aliba amutwalirizza n'essanyu ly'omutima gwe.

← Chapter 4 Jump to: Chapter 6 →