Ecclesiastes 11

Luganda (BIBU1) (BIBULIYA ENTUKUVU)

← Chapter 10 Jump to: Chapter 12 →

1Omugaati gwo gukasuke ku mazzi, kubanga nga wayise ennaku nnyingi oligusanga nate.

2Ekitundu kigabire omusanvu oba omunaana, kubanga tomanyi kabi kaligwa mu nsi.

3Ebire bwe bijjula amazzi, biyiwa enkuba ku nsi; omuti bwe gugwira emaserengeta oba emambuka we gugudde, we gusigala.

4Eyekkaanya empewo, tasiga, n'eyeetegereza ebire, talikungula.

5Nga bw'otomanyi mpewo bw'efuuwa, n'engeri omuntu gy'akula mu lubuto, bw'otyo era bw'otomanyi mirimu gya Katonda, eyakola buli kintu.

6Ku nkya siga ensigo zo, n'akawungeezi toleka mikono gyo kulagaya, kubanga tomanyi kiriraka, kino oba kiri; obanga byombi birivaamu bulungi.

7Ekitangaala kiwoomerera, n'okulaba enjuba kisanyusa amaaso.

8Gyonna emyaka omuntu gy'aliba awangadde, kirungi agyeyagaliremu gyonna. Naye kisaanye ajjukire obudde obwa kazigizigi, kubanga nabwo buliba bunene; buli kijja kyonna temuli kantu.

9Kale mulenzi, sanyuka mu buto bwo, n'omutima gwo gusanyuse mu nnaku z'obuvubuka bwo. Tambula ng'omutima gwo bwe gukugamba n'amaaso go nga bwe gakulambika; kyokka manya nti Katonda alikulamula olwa bino byonna.

10Omutima gwo guggyemu okweraliikirira n'omubiri gwo gugobeeko ebigulumya, kubanga obuvubuka n'obusuumufu temuli kantu.

← Chapter 10 Jump to: Chapter 12 →