Acts 10

Lugbara (E’yo Siza Alatararu Munguniri BIBLIA)

← Chapter 9 Jump to: Chapter 11 →

1’Ba alu ovupi Kaisariaari, runi Korinelio, eri ovu ’ba amboru enyati asikari turu aluni yini omvele Italianiri ma driliari’i.

2Eri ovu ’ba inzita be Mungu rupi ’ba eri vile joa ’diyi be driari, eri adri afa fe ’ba alioru dri tu, azini eri zi Mungu tia ’dani.

3Ogogo sawa oromirisi eri ndre eceta alia kilili malaika Mungunini efuzu i vu ’yozu i tia, Korinelio!

4Eri su mile ruania, asi erini mbu ciri urisi, eri ’yo ra, Opi, e’yo ngoni ya? Eri ’yo eri tia, Zita mini afa feza mini fele ’diyi be yi tu uru Mungu drilia, Mungu ega e’yoni ’dani ani.

5Curu’do mi pe ’ba ti Yopaa, mi omve Simoni yini omvele Peterori;

6eri la omuru Simoni ’ba enyi edepiri vile joa, aku erini ovu ogogo miri tia.

7Malaika e’yo ’yopi eri beri ka mu ’bo, eri omve ati’ba iri azini asikari Mungu inzipiri, ’ba yi ebipi azi ngapi eri dri ’diyi ma eselia;

8erini e’yo ’diri dria eceria yi dri ’boria, eri pe yi ti Yopaa.

9Te drusi yini muria geria, yini ecaria ogogo aku amboria, Petero eri tu uru jo dri senderuria Mungu zizu, ekile etu aziarile.

10Abiri fu eri, eri le nyaka nya; yini enya ovaria, avani oti ra,

11eri ndre ’bu ovu zizaru, ndre vini afa ekile bongo walarule, o’izaru oji kalania su ’diyia, osile va engazu ’buari.

12Eri ma alia afa dria ovupi pa su be ’diyi, afa acipi agatisi nyakua ’diyi, azini aria ’bua ’diyi be.

13Te o’duko ecea eri vu kini, Mi enga, Petero; mi li, mi nya.

14Te Petero ’yo ra, ’Dini yo, Opi; te ma nyani nga afa saaru alatara kokoru ’diyi drio ku.

15O’duko eca eri vu dika pale iririsi kini, Afa Munguni ’bale alatararu ’diyi, mi ma omve yi saaru ku.

16E’yo ’diri ovu ’yezaru ’dini pale na, coti afazu nderi ovu ’duzaru ’bua.

17Te Peteroni e’yo egaria i asia ti, kini eceta ini ndrele ’dori ma efi ngoni ya, mi ndre, agupi Korinelioni tini epele ’diyi, yini jo Simonini ziria ’boria, yi oso pa kalitilea.

18Yi oyu zizu kani Simoni yini omvele Petero’iri la omuru ’doa yani.

19Te Peteroni eceta ini ndreleri ma; e’yo egaria, Orindi ’yo eri tia kini, Mi ndre, agu na yi mi nda.

20Mi nga, mi si va, mi mu yi be ’ba ma, esele cozu ku, a’disiku ma epe yi ti ma’i.

21Petero eri si va ’ba ’diyi vu, eri ’yo ra kini, Emi ndre, ’ba emini ndaleri ma’i; emi eca ’doa a’disi ya?

22Yi ’yo ra, Korinelio ’ba amboru asikari turu alu drilia, ’ba onyiru Mungu rupi, suru Yahudini driani runi idule idu inzitasiri, malaika alatararu Munguni ece eri dri eri ma pe ’ba ti mi vu jo ’doria, e’yo erizu mi tia.

23’Dini omve yi ma efi joa, ’ba yi wa’diru. Drusi eri enga, eri mu yi be, te adripi Yopaa ’diyi ma azi yi mu yi be indi.

24Drozi ’dini yi fi Kaisariaa. Korinelio ovu yi ma dri teria, isu eri omve ori’ba ini azini agyi ini ’diyi tualu ’boo

25Te eri nga eca ’dini, Peteroni firia Korinelio nga di dri fu eri be, nga i eco va eri palaa eri inzizu.

26Te Petero enga eri uru, ’yo ra, Mi so pa uru; ma’i ma alu ’bani.

27Erini e’yo ’yoria eri be eri fi, eri isu ’ba kakau okuzaru;

28eri ’yo yi tia, Emi’i, emi ni ra azita a’ini ’ba Yahudini dri ti ecizu ’ba jururu be, kani muzu yi vu ku; te Mungu ece ma dri ma ma omve ’ba aluni saaru kani alatara kokoru ku.

29E’yo ’disi ma emu ani agata kokoru, ’bani ma omveria. Ma zi emi tia ani, emi omve ma a’disi ya?

30Te Korinelio ’yo ra, O’du su aga curu’do e’yo nderi ma vutia ’boo Etu ekile ’dipile o’du nderisi, ma ovu ndra Mungu ziria sawa oromirisi jo mania; mi ne, agu bongo be emvendrindriri so pa ma ageia

31’yozu kini, Korinelio, zita mini ovu erizaru azini afa feza mini ovuni avizaru Mungu dri ku.

32E’yo ’disi mi pe ’ba ti Yopaa, mi omve Simoni yini omvele Petero’iri; eri la omuru Simoni enyi edepiri vile jo ovupi ogogo miri tiaria.

33E’yo ’disi ma pe ’ba ti mi vu coti, te mi ’ye onyiru mini emulerisi, Curu’do ama ovu dria ’doa Mungu ma milia, e’yo dria Opini azile mi driri erizu.

34Te Petero zi i tile e’yo ’yozu: Adaru ma va ra Mungu openi ’ba ku,

35te suru dria ma eselia eri adri ’ba i rupi e’yo onyiru ’yepiri a’i ra.

36Emi ni e’yo erini ti pele anzi Israelini vu, e’yo bari asi anzuruni oluzu Yesu Kristosiri (eri ovu Opi ’ba dria ’diyini),

37emi ni e’yo nde ovupi oluzaru angu Yudiani ma alia dria, engazu Galilia baputizi Yohanani oluleri ma vutiari.

38E’yo nderi ece e’yo Munguni Yesu Nazaretiari pezu odu osuzu drinia Orindi Alatararusi, okposi indiri; eri aci pari dri dria e’yo onyiru ’yezu, azini ’ba dria Satanini inzale ombele ci ’diyi ma rua atizu, Munguni ovule tualu eri berisi.

39Ama ovu ’ba e’yo dria erini ’yele angu Yahudini ma alia azini Yerusalemua ’diyi ma eti nzepi ’diyiru. Yi fu eri yini eri diria pati ruaa;

40te Mungu enga eri dika o’du narisi, azini e’da eri indi;

41’ba dria milia ku, te ama ’ba Munguni opele ovuzu ’ba e’yo eti nzepi ’diyiru ’diyi ma milia, ama’i ’ba oyapi mvupi tualu eri be erini engaria ’ba draza ma eselia ’boria ’diyi.

42Te eri azi: amani e’yo oluzu ’ba vu, e’yo eti, nzezu, kini agu ’diri eri ’ba Munguni pele ovuzu ’ba idriru pi ma e’yo lizu ’ba draza ’diyi be indiri.

43Nabi dria yi nze ’ba ’diri ma e’yo eti, kini; ’ba dria eri a’ipi ’diyi yi isu e’yo onzi wuza eri ma rusi ra.

44Peteroni nga e’yo ’diri ’yoria, Orindi Alatararu e si va ’ba dria e’yo ’diri eripi ’diyi dria.

45Te ’ba a’ipi ovupi lizaru ecapi tualu Petero be ’diyi yi osu tu feta Orindi Alatararunirini i osule ’ba Jururu ’diyi ma dria indirisi.

46A’disiku yi eri yini e’yo ’yoria ti ndu ndusi Mungu ru inzizu. Vutinia Petero omvi e’yoi kini,

47A’di eco yi ogazu baputizi fezu ’ba ’diyi drini ya, yi’i Orindi Alatararu a’ipi ekile amani a’ilerile ’diyi?

48Eri nga di azi baputizi fezu yi dri Yesu Kristo ma rusi. Vutinia yi ’ba matu eri vu ma ovu nga yi be o’du were ka.

← Chapter 9 Jump to: Chapter 11 →