Acts 9

Lugbara (E’yo Siza Alatararu Munguniri BIBLIA)

← Chapter 8 Jump to: Chapter 10 →

1Te Saulo kuni ’ba Opi vuti bipi ’diyi ma omuko tozu, yi inzazu, yi ofuzu ku; eri mu kuhani amboruri vu,

2eri a’i waraga muzu Damasikia pari ’bani yi okuzu ’dayi vu, ’dini eri ka ’ba Geri ndea ’diyi isu, kani agupi kani oku, eri ma o’i yi ejizu Yerusalemua.

3Erini muria caria Damasikia ogogo, coti diza ibi enga ’bua dizu eri ma ageia.

4Eri eco i va nyakua, eri eri o’duko ’yozu eri tia kini, Saulo, Saulo, mi ma inza a’disi ya?

5Eri ’yo ra, Opi, mi a’di’i ya? Eri ’yo ra, Ma Yesu mini inzaleri’i;

6te mi nga, mi fi aku amborua, te mi nga e’yo mani lele mi ma ’yeri eri ra.

7’Ba nde mupi eri be ’diyi oso pa ciri, yini o’duko eriria, te yi ndreni ’ba ku.

8Saulo enga nyakuarisi, mileni ka yi zi ’bo eri econi afa aluni ndrezaru ku. Yi se eri drisi, fizu Damasikia.

9O’du na ’dipi eri ndreni angu ku, nyani afa ku, mvuni afa ku indi.

10’Ba azini indi Damasikia Yesu ma vuti bipiri, runi Anania’i. Opi ’yo eri tia eceta erini ndrelerisi kini, Anania. Eri ’yo ra, Ma ’do’i, Opi.

11Opi ’yo eri tia, Mi enga, mi mu geri ’bani omvele Kililiruria, mi zi jo Yudasinia ’ba engapi Tarisoa omvele Saulo’iri ci ya; mi ne, eri ovu Mungu ziria,

12eri ndre ’ba azini runi Ananiani efiria dri tiria i dria, i ma mile ma ndre angu ani dika,

13Te Anania eri omvi e’yo tinia, Opi, ma eri e’yo ’ba ’dirini ’ba kakau ma tia, e’yo onzi kakau erini ’yele ’ba mini alatararu Yerusalemua ’diyi vuri;

14te ’doa eri ovu okpo kuhani amboru ’diyini fele eri driri be, ’ba dria mi ma ru i omvepi ’diyi o’izu.

15Te Opi ’yo eri tia, Mi mu, a’disiku eri ovu afazu mani pele ru mani ojizu suru ndu ndu vu, azini opi vu, azini anzi i Israelini vu indiri;

16te ma nga inzata amboru erini ngale isule ma rusiri ece eri dri.

17Ka’dini Anania nga di mu ra, eri fi jo nderia, erini dri tiria eri dria eri ’yo kini, Ma adripi Saulo,Opi Yesu, eri’i i e’dapi mi vu geria mini emuriari pe ma u mi vu ’dini mi ma ndre angu dika azini mi ma ovu gazaru tre Orindi Alatararusi ani.

18Coti afa e’de eri miliasi va ekile ongoro’bole, eri ndre angu dika. Te eri enga, eri bi baputizi,

19azini eri ka nyaka nya ’bo eri isu okpo ra. Eri ovu ’ba Yesu vuti bipi Damasikia ’diyi be o’du were.

20Coti eri olu Yesu pari ’bani yi okuzuria, kini, Eri Mvi Munguniri’i.

21’Ba dria e’yo erini ’yoleri eripi ’diyi yi osu tu, yi ’yo ra kini, Agu ’diri ovuni ’ba ’ba ru ’diri omvepi Yerusalemua ’diyi inzapiri ku ya? Eri eca ’doa e’yo nderisi indi, eri ma o’i yi ejizu kuhani amboru milia.

22Te Saulo isu ini okpo o’diru drile drile ’dani, eri fe ’ba Yahudini ovopi Damasikia ’diyini abazu aba erini yi ndele ra, erini eceria kini agu ’diri eri Kristo’i adaru rarisi.

23O’du kakau ka aga ’bo, yi eci ti tualu ndazu eri fuzu,

24te Saulo eri ni e’yo yini otule i ma ruaari ra. Yi re kalitile agei etu zu ini rra, lezu eri fuzu;

25te ’ba voti bipi ’diyi yi ’du di eri inisi ra, yi osi eri abi ruaasi va acalaka alia.

26Eri ka eca Yerusalemua eri o’bi fizu tualu ’ba Yesu voti bipi ’diyi be, te yi dria ru eri tu, yi a’ini leu kini eri ovu ’ba Yesu vuti bipiriru.

27Te Baranaba ’du eri, ii ’ba ti opele ’diyi vu, ece yi dri e’yo erini Opini ndrezu, azini Opini e’yo ’yozu eri be etiari, azini e’yo erini e’yo oluzu uri kokoru Damasikia ru Yesunisiri.

28’Dini eri ovu yi be Yerusalemua fizu azini fuzu,

29azini e’yo oluzu Opi ma rusi uri kokoru. Eri ’yo e’yo, eri ga agata ’ba Yahudini Giriki ti ’yopi ’diyi be; te yi nda eri fuzu.

30Adripi yi ka e’yo nderi ni ra, yi ji eri Kaisariaa, tini pezu Tarisoa.

31’Dini kanisa ma alia Yudiaa, azini Galilia, azini Samariaa dria, yi ovu asi anzuru be, yi zo drile drile; yini aciria ruta Opiniri pi ma alia asi omiza Orindi Alatararuniri be, yi ezu tre.

32Te Peteroni aciria yi eselia pari dri dria, eri si ’ba alatararu ovupi Ludaa ’diyi vu indi.

33’Dale eri isu ’ba alu runi Aenea, eri ovu azo ’ba ombepi omberi be valesi pari dria eli aro.

34Petero ’yo eri tia kini, Aenea, Yesu Kristoni mi ati; mi enga, mi tra pari mini! Coti eri enga ra,

35’Ba ovupi Ludaa azini Saronaa ’diyi dria yi ndre eri ra, yi oja yi Opi vu ani.

36Te oku alu Yesu vuti bipi Yopaari runi Tabita, ru nderi ma efi ti azinisi Dorokasi. Oku nderi ovu ’ba gapi azi onyirusi tre, azini afa feza erini fele ’ba alioru dri ’diyi yi tre indi.

37Ewu nderisi azo bi eri, eri dra ra; yini eri ojiria ’bo, yi ’ba eri jo uruleruria.

38Te Ludani ovuzu ogogo Yopa berisi, ’ba Yesu vuti bipi ’diyini e’yo Peteroni ovuzu ’daleri eriria, yi pe ’ba iri ti eri vu matu ’bazu kini, Mi emu ama vu tekokoru fo!

39’Dini Petero enga, eri mu yi be. Erini ecaria ’boria yi ce eri dri jo uruleruria, Awuzi dria yi otu pa eri ageia awu wuzu, azini yi ece eri dri bongo ’beza Dorokasini die erini ovuria nga yi be ’diyi, bongo azini erini die ’diyi be indi.

40Te Petero ofu yi dria amve, eri osi kumuti va Mungu zizu; eri oja i avu vu ’yo ra, Tabita, mi enga! Eri zi i mile, eri ka Peteroni ndre ra eri enga ri uru.

41Eri eju i dri eri engazu, azini eri omve ’ba alatararu oku awuziru ’diyi be, eri ece di eri yi dri idriru.

42E’yo nderi ku Yopaa dria wakaka, ’ba kakau yi a’i Opini.

43Eri eca ’dini, Petero ovu Yopaa o’du kakau Simoni ’ba enyi edepiri vile akua.

← Chapter 8 Jump to: Chapter 10 →