Acts 15

Lugbara (E’yo Siza Alatararu Munguniri BIBLIA)

← Chapter 14 Jump to: Chapter 16 →

1Te ’ba azini ’diyi enga Yudiaa emu ra, yi imba adripi kini, Emi ka ovu agele liza Musani azileri kokoru, emi econi emi pazaru ku.

2Paulo pi Baranaba be yi ka agata ga e’yo ozizu yi be ambo, yi azi Paulo pi tia Baranaba pie, ’ba azini ’diyi pie, yi ma tu Yerusalemua ’ba ti opele azini ’ba atalauru ’diyi vu ozita ’dirisi.

3’Dini kanisani yi ti peria, yi aga Foenikia azini Samariaa, ’ba Juruni yi ma asi ojazuri ma e’yo oluzu; yi fe ayiko amboru adripi dri dria,

4Yini caria Yerusalemua, ’ba kanisani ’diyi pi a’i yi ra, ’ba ti opele ’diyi pie, ’ba ’wara kanisani ’diyi pie; yi ece yi dri e’yo dria Munguni ’yele tualu yi be ’diyi.

5Te ’ba azini suru Farisaini ma eselia a’ipi ’diyi oso pa, ’yozu, ’Ba ’diyi ma ovu lizaru, ma azi yi ma ’ye azita Musani indi.

6’Ba ti opele ’diyi oku yi tualu ’ba ’wara be e’yo nderi egazu.

7Yi ka yi ozi yi eselia ozitasi ambo ’bo, Petero nga di enga ’yo yi tia kini, Ma adripi la, emi ni Mungu pe ndra ma drio emi eselia, ’dini ’ba Jururu ’diyi ma eri e’yo bari ma tisi, yi ma a’i ani.

8Mungu asisile nipiri eri nze e’yo yini ma eti, erini Orindi Alatararu fele yi dri tro tro erini fele ama dririlerisi;

9eri coni ama esele yi be ku, te eri oji asi yini alaru a’itasi.

10E’yo nderisi curu’do emi o’bi Mungu a’disi ya, emini kulumgbu ombele ’ba Yesu vuti bipi ’diyi ma ombelearisi? Ama a’bipi azini ama’i indi, ama econi kulumgbu nzizaru nderi ’duzaru ku.

11Te ama a’i ama nga ovu pazaru ’yeta anzutiri Opi Yesunirisi, ekile ’ba ’diyile ’dini.

12’Ba ongulumuru dria yi ovu ndi; yi co bile e’yo Baranaba pini olule Paulo beri erizu, yini eceta azini tali osutaru Munguni ’yele ’ba uruni ma eselia dri yinisi ’diyi ma e’yo eceria.

13Yi ka de e’yo oluzu ’bo, Yakobo omvi e’yo kini, Ma adripi la, emi eri e’yo mani ’yoleri.

14Simeoni olu Munguni ’ba Jururu andrizu oko ’ba opezu yi eselia eri ma rusiri ma e’yo.

15E’yo nabini ’yole ’diyi yi fu dri e’yo nderi be trotro, ekile erini ovule sizarurile,

16E’yo ’diyi ma vutia ma nga emvi ra, ma nga jo Daudini asurupi vari si dika; ma nga pari andruru eriniri si dika, ma nga eri edre uru,

17’dini ’ba joloko acepi ’diyi ma nda Opini ani, ’ba jururu dria ovupi omvezaru ru manisi ’diyi be indi,

18Opi, eri’i e’yo ’diyi ecepi engazu driowuri, ’yo ’dini.

19E’yo ’disi ma li e’yo ’dini, ama ma ecandi ’ba engapi Juru eselia yi ojapi Mungu vu ’diyi ku,

20te ama ma si yi dri waraga, yi ma ga afa Mungu toko edezuri si, ali ’baza pie, anyapa nzile nziri pie, ari pie.

21Te engazu ewu driorisi Musa ovu ’ba e’yo erini olupi ’diyi be aku amboru vusi dria, te yi la e’yo erini pari ’ba Yahudiniri yi okuzuria sabato vusi.

22Te eri ovu onyiru ’ba ti opele ’diyi pi ma milia ’ba ’wara be, ’ba kanisani ’diyi dria be indi, ’ba opezu yi eselia ti pezu Antiokiaa tualu Paulo pi Baranaba be. Yi pe Yudasi yini omvele ru azinisi Barasaba azini Sila, yi ’ba ambo wara adripi eselia;

23pe yi ti waraga ’diri be kini: Adripi amani ’ba Juruni eselia Antiokiaa, azini Suriaa, azini Kilildaa ’diyi, ama adripi emini ’ba ti opele ’diyi’ba ’wara ’diyi be, ama zi emi ci ci.

24Ama eri kini ’ba azini efupi ama eselia ’diyi fe emini abazu e’yo ’yozasi, asisile emini ezazu, de ama feni azita yi dri ’yezu ’dini ku.

25E’yo ’disi amani ama okuria asi alusi tualu, eri ovu onyiru ama milia ’ba azini opezu, yi ti pezu emi vu Paulo azini Baranaba ’ba amani lele tu ’diyi pie,

26’ba ndra idri yini adipi dra dri Opi amani Yesu Kristo ma rusi ’diyi.

27E’yo ’diyisi ama pe Yudasi pi ma ti Sila be, yi nga e’yo olu emi tia yi ma tisi indi.

28A’disiku eri ovu onyiru Orindi Alatararu ma milia, ama ma milia indi, afa azini nzizaru agapi ra ’diyi ’bazu emi ombelea ku, pe lu e’yo amboru ’diyi a’dule:

29emi ma ga afa Mungu toko ’diyi edezu ’diyi pi si, ari pie, anyapa nzile nzi ’diyi pie, ali ’baza pie. Emi ka emi ta mba e’yo ’diyisi, emi nga ’ye onyiru. Emi adri di onyiru.

30Yini yi ti peria ’boria, yi si Antiokiaa; yi oku ’ba ongulumuro tualu, yi fe waraga nderi yi dri.

31Yi ka eri la ra yi ovu ayikosi asi omiza nderisi.

32Yudasi pi Sila be, yini ovule ’ba nabinirisi, yi omi adripi ma asi e’yo kakausi indi, yi ’bazu okporu.

33Yi ka ovu ’dale o’du izu were, adripi nde ’diyi pe yi ti asi anzuru be mvizu ’ba yi ti pepi ’dayi vu.

34Te eri ovu onyiru Sila ma milia ovuzu ’daa.

35Te Paulo pi Baranaba be, ’ba azini be kakau, yi te Antiokiaa ’ba imbaria azini e’yo Opini oluria.

36O’du ka aga were ’bo Paulo ’yo Baranaba tia kini,Mi emu, ama mvi aku ambo ambo amani e’yo Opini oluzu ’diyia dria, adripi alenia ’diyi andrizu, kani yi ovu ngoni yani.

37Baranaba le Yohana yini omvele Marako’iri ’duzu muzu yi be.

38Te Paulo leni eri ’duzu yi be ku, ndra erini yi kule angu Pamfuliaa, erini mule azi ngazu yi be kurisi.,

39E’yo nde fu agatatu yi ma eselia, yi co yi ma esele ani; Baranaba eri ’du Marako muzu eri be, yi fi oguru alia muzu Kuporoa,

40te Paulo pe Sila’i, yi fu muzu, adripi yini yi kuria asi ndriza Opini dri.

41Eri aga Suriaasi azini Kilikiaasi, kanisa o’bazu okporu.

← Chapter 14 Jump to: Chapter 16 →