Acts 5

Lugbara (E’yo Siza Alatararu Munguniri BIBLIA)

← Chapter 4 Jump to: Chapter 6 →

1Agupi azini, runi Anania, oku erini Safira be, yi fe amvu yini je,

2eri zi silingi nde ’diyi ma joloko yini, okuni e’yoni niria, te eri eji silingi acepiri ’ba ’ba ti opele,’diyi ma palaa.

3Te Petero ’yo, kini, Anania, Satani ga mi asia tre inzo lizu Orindi Alatararu dri, mi linga silingi amvuniri ma joloko zi mi vu ci ’dini a’disi ya?

4Okorisi de nga mi feni eri jezu ku, eri ovuni ndra amvu mini ku ya? Kani mi ka leri fe je ’bo, mi econi ani e’yo ’yezu imini lelerile ku ya? Mi nga e’yo ega mi asia ’dini a’di e’yo efisi ya? Te mi lini inzo ’diri ’ba dri ku, te Mungu dri.

5Anania ka e’yo ’diyi jeri ra, eri e’de va, dra ra. Uri amboru bi ’ba e’yo ’diri eripi ’diyi dria.

6Karile yi enga eri avu ombe, ji eri amve sazu.

7Etu na ka aga ra oku erini nga efi, nini e’yo nderi ku.

8Petero nga ’yo eri tia, Mi ece ma dri, silingi emini isule amvusi ’diyi yi ’dipi ya? Eri omvi,E, eri ’dini.

9Te Petero ’yo eri tia, Emi ega e’yo tualu orindi Opini o’bizu ’dinile a’di e’yosi ya? Mi ndre, ’ba mi vile jagupi sapi ’diyi ma pa eca jotilia, yi,nga mi ’du ji amve indi.

10Coti eri e’de va eri ma palaa, dra ra. Karileni firia yi isu eri dra ’bo, yi nga eri avu ’du ji amve, nga eri sa jagupi erini be.

11Uri amboru bi ’ba kanisani ’diyi dria, ’ba e’yo nderi eripi ’diyi be dria.

12Eceta azini tali osutaru kakau ovu ’yezaru ’ba ti opele ’diyi ma drisi ’ba ma eselia, Yi ovu dria asi lalusi tualu, jobilekoni Sulemaniniria.

13Ba azini yi ru fizaru yi ma eselia, te ’ba ongulumuru yi inzi yi tu.

14Te ’ba yi o’bapi yi vu Opini a’ipi ’diyi ma kalafe zo drile drile, agupi kakau oku pie kakau.

15Yi ji ’ba azoru ’diyi yi o’bazu geria oro dria, kani omi dria, ’dini Peteroni agaria endrilendri erini ma ’de yi ma dria.

16’Ea ongulumuru enga aku amboru Yerusalemu ma kalaa ’diyi ma alia, oku yi tualu; yi eji ’ba azoru ’diyi pi, ’ba candi nyapi orindi onzi dri ’diyi pie, yi dria alu alu ma rua ati ra.

17Te kuhani amboruri nga enga, ’ba ovopi eri be ’diyi be dria, yi suruti ’ba Sadukayoni, yi ga ma’yalasi tre,

18yi o’i ’ba ti opele ’diyi, ’ba yi arujoa.

19Te inisi malaika Opini nga arujo ma tile zi, ofu yi amve, ’yo ra,

20Emi mu pa so hekalua, emi olu ’ba nde ’diyi tia dri ’dori ma e’yo dria.

21Yi ka e’yo ’dirieri ’bo, yi fi hekalu alia angu trasi ’ba imbazu. Te kuhani amboruri nga emu ’ba erini be, yi omve ’ba ’wara e’yo amapi ’diyi azini ’ba mbazaru anzi Israelini ma eselia ’diyi dria, yi pe ’ba ti arujoa yi ejizu.

22Te ’ba asikari drilia ’diyi ka ca ra, yi isuni yi arujoa ku, yi emvi e’yoni ecezu, ’yo ra,

23Te ama isu arujo ma tile opizaru dria onyiru kirikiri, ’ba agei tepi ’diyi yi so pa jotilea, te ama ka jotile zi ’bo ama isuni ’ba alenia aluni ku.

24Asikari ambo hekaluari pini e’yo ’diri eriria, kuhani amboru ’diyi pie, yi aba aba e’yo yini ’yole ’diyisi, yi nini e’yo ’diri nga ca ovuzu ngoni yari ku.

25Te agu azini emu ’yo yi tia, Emi lu, ’ba emini ’bale arujoa ’diyi yi ovu hekalua ’daa, pa sozu ’ba imbaria

26Asikari ambo nga di mu ’ba erini be yi ejizu, te yi ejini yi okposi ku, a’disiku yi ru kani ’ba ongulumuru yi nga yi o’be onisi yani.

27Yi ka yi eji ’bo, yi ’ba yi ’ba e’yo lipi ’diyi ma milia. Te kuhani amboruri zi e’yo yi tia,

28’yo ra, Ama feni ndra emi dri azita okporu kini emi ma imba ’ba ’ba ’diri ma rusi ku ’diniri ku ya? Te emi ne, emi fe di Yerusalemuni gazu imbata eminisi tre, emi le vini ama dria ari ’ba ’dirini eji indi.

29Te Petero pi, omvi e’yo ’ba ti opele ’diyi be, ’yo ra; Onyiru ama ma ru Munguni aga ’ba ra.

30Mungu ama a’bipiniri enga Yesu emini dile fule ndra pati alazaru ma driari,

31Mungu ’ba eri uru i dri ndiria ovuzu Opiru ’Ba ’ba Papiriru indi, eri ma fe asi ojaza ’ba Israelini ’diyi dri, e’yo onzi yini wuzu indi.

32Ama ovu ’ba e’yo ’diyi ma eti nzepi ’diyiru, rualo Orindi Alatararu Munguni fele ’ba e’yo erini eripi ’diyi driri be.

33Te ’ba ’diyini e’yo ’diri eriria, yi asi ovu aokosi tu, yi le yi ofu ra.

34Te ’ba Farisaini alu ’ba e’yo lipi ’diyi ma eselia, runi Gamalieli, ’ba azita imbapi, ’ba driani runi idule idu inzitasiri, eri tu pa, fe azita ’ba ’diyi ofuzu nga amve.

35Eri ’yo yi tia, Emi te emi agei e’yo emini ’yele ’ba ’diyi vurisi.

36Andra okorisi Teudasi enga, eri ’yo i ovu ’ba amboni, azini ’ba kakau ekile turu su eci ti eri be; te ja ndra dri ra, azini ’ba dria eri ma e’yo a’ipi ’diyi ere yi saaru, yi eca toko.

37’Di ma vutia Yudasi ’ba Galiliari efu ra ewu ’ba sizurisi, eri se ’ba kakau i vuti bizu; ’ba nderi ja dri ra, azini ’ba e’yo erini a’ipi ’diyi ere yi saaru.

38Curu’do ma ’yo emi tia, emi ku ’ba ’diyi ma ovu, te ondua ’diri azini azi yini ’dori ka ibi enga ’ba vu, eri nga i de ra,

39te ka ibi enga Mungu vu, econi emini drini jazaru ku, emi kazu omba ’bazu Mungu be ku.

40Yi a’i e’yo erini ra; yi ka ’ba ti opele ’diyi omve ra yi co yi, yi fe azita yi dri e’yo oluzu Yesu ma rusi dika ku, fe yi dri geri.

41Awa’dini yini furia ’ba e’yo lipi ’diyi milia, yi ovu ayikosi Munguni egale yi eco drinza nyazaru ru nderisi rarisi.

42O’du dria hekalua azini aku yinia wakaka, yi kuni imbata imbazu azini e’yo oluzu kini Yesu eri Kristo’iri ku.

← Chapter 4 Jump to: Chapter 6 →